Buǵan deıin astanadaǵy áýejaı kody IATA bekitken erejege sáıkes TSE dep atalyp kelgen. Buǵan elordanyń burynǵy kezdegi ataýy – Selınograd negizge alynǵan-dy. Endi, NQZ kody brondaý júıelerinde, otyrǵyzý talondarynda, bagaj bırkalarynda jáne aqparattyq tabloda kórsetiledi.
Altaı Abıbýllaevtyń aıtýynsha, onyń logıkalyq jáne ıdeologııalyq mańyzy zor.
«N – Nur-Sultan qalasy jáne N.Nazarbaev áýejaıyn bildiredi. Al QZ táýelsiz Qazaqstannyń jańa álipbıdegi Qazaqstan ataýyn bildiredi. Jańa kodtyń úsh maǵynasy bar: jańa áýejaı, jańa elorda jáne jalpy Qazaq eliniń halyqaralyq arenadaǵy jańa álipbıi. Áýejaı kodyn aýystyrý – 50 jyldaǵy úlken jetistik, Avıasııa komıtetiniń halyqaralyq arenadaǵy jetistigi. Osy kod arqyly elimizdiń aty halyqaralyq deńgeıde jańa serpilis alyp, brend retinde nyǵaıa bersin», dedi A.Abıbýllaev áýejaıdaǵy saltanatty tanystyrylymda.
Osy oraıda, myna nárseni eskergen jón. Elorda áýejaıynyń kodyn usynarda buǵan deıin qalyptasqan KZ ataýy emes, QZ bekitildi. Iаǵnı Qazaqstandy aǵylshynsha Kazakhstan dep emes, Qazaqstan dep túpnusqaǵa barynsha saı jazý negizge alyndy.
Bul máselege Prezıdent Qasym-Jomart Toqaev Senat Tóraǵasy kezinde nazar aýdarǵany esimizde. Memleket basshysy «Qazaqstan» sózin aǵylshyn tilinde jazǵanda latyn álipbıindegi «Qq» (kıý) árpin paıdalaný jón ekenin jetkizdi. «Aǵylshyn tilinde QAZAQSTAN elimizdiń ulttyq negizin durys kórsetpek», dep jazǵan bolatyn Qasym-Jomart Toqaev týıtterdegi paraqshasynda.
Aıta keterligi, elorda áýejaıynyń kodyn ózgertý 2014 jyly bastalǵan. Negizi, IATA-ǵa sáıkes, áýejaılarǵa kod turaqty negizde bir ret qana beriledi. Osyǵan qaramastan, qazaqstandyq dıplomattar ataýdy bekittirýge kóp kúsh saldy.
Byltyr, 2019 jylǵy 14 qazanda Polshanyń Varshava qalasynda IATA músheleriniń qatysýymen Jolaýshylar tasymaly standarttary (Passenger Standards Meeting) kezdesýi ótken. Osy jıynda NQZ ataýyn bekitý usynysy qoldaý tapty.
Sondaı-aq bul baǵyttaǵy jumys jalǵasa bermek. Keleshekte Atyraý, Aqtaý jáne Taraz qalalary áýejaılarynyń kodyn aýystyrý josparda bar.
