Jedel-izdestirý is-sharasy barysynda Keles aýdandyq polısııa bólimshesiniń polısııa qyzmetkerleri Túrkistan oblysy PD Esirtki qylmysyna qarsy kúres basqarmasymen birlesip, zańsyz esirtki ekken kúdiktini quryqtady. Anyqtalǵandaı, egde jastaǵy er adam óz aýlasynda quramynda esirtkisi bar ósimdik túpterin iri mólsherde ósirgen.
Keles aýdany turǵynynyń úıin tintý kezinde jedel ýákilder kóknár tárizdes 4730 túp esirtki ósimdigin tárkiledi. Saraptamaǵa sáıkes, quramynda esirtki bar kóknár túpteriniń jalpy salmaǵy 205 kg-nan asty, al keptirilgen kóknárdiń salmaǵy 12,5 kg-ǵa jýyqtady.
Atalǵan jaıt Keles APB sotqa deıingi tergep-tekserýdiń biryńǵaı tizilimine QR Qylmystyq kodeksiniń 300-babynyń 2-bóligi (quramynda esirtki zattary bar ósirýge tyıym salynǵan ósimdikterdi zańsyz ósirý) boıynsha tirkeldi. Kúdikti qamaýǵa alyndy. Polısııa qyzmetkerleri sotqa deıingi tergeý amaldaryn júrgizip jatyr.
Qazirgi ýaqytta tártip saqshylary kúdiktiniń quramynda esirtkisi bar ósimdikterdi ne sebeppen ósirip, saqtaǵanyn anyqtap jatyr. Túrkistan oblysynyń polıseıleri atalǵan baptyń sanksııalary úsh jyldan segiz jylǵa deıingi merzimge bas bostandyǵynan aıyrýdy qarastyratynyn eskertedi.
Eger siz osyndaı qylmystyń kýágeri bolsańyz, tez arada “102” telefony arqyly polısııaǵa habarlasyńyz.
