IIM baspasóz qyzmetiniń málimetinshe, Túrkistan qalalyq Polısııa basqarmasyna oblys ortalyǵynyń turǵyny aryzdanyp, tańǵy ýaqytta belgisiz bireý aýyldyq meshittiń sadaqa jáshigine urlyqqa túskenin jetkizdi. Oqıǵa ornyna shuǵyl jedel-tergeý tobynyń qyzmetkerleri shyqty. Polısııa qyzmetkerleriniń anyqtaýynsha, urylar ashyq turǵan esikti paıdalanyp, meshitke kirip, sadaqaǵa arnalǵan metall jáshigin ashyp, ishinen aqsha urlap ketken. Atalǵan jaıt QR Qylmystyq kodeksiniń 188-baby (urlyq) boıynsha sotqa deıingi tergep-tekserýdiń biryńǵaı tizilimine tirkeldi. Jedel-izdestirý is-sharalarynyń qorytyndysynda, Túrkistan qalalyq PB-nyń polısııa qyzmetkerleri meshittegi urlyqqa qatysy bar kúdiktini quryqtady. Ol Shardara aýdanynyń turǵyny bolyp shyqty jáne polısııa basqarmasyna jetkizildi. Qazirgi ýaqytta atalǵan derek boıynsha sotqa deıingi tergeý amaldary júrgizilip jatyr. Osyǵan uqsas taǵy bir qylmysty Kentaý qalalyq polısııa bóliminiń qyzmetkerleri ashty.
Kezekshi bólimge irgeles jatqan aýyldardyń biriniń turǵyny shaǵym túsirip, jergilikti zırattan beıtanys adam sadaqa jáshiginen aqsha urlap ketkendigin jetkizgen. Oqıǵa ornyna jetken Kentaý qalalyq PB-niń jedel-tergeý toby shuǵyl áreket etti. Urylar barlyǵy 12 myń teńge kóleminde aqshany alyp ketkenin anyqtaldy.
Atalǵan jaıt QR Qylmystyq kodeksiniń 188-baby (urlyq) boıynsha sotqa deıingi tergep-tekserýdiń biryńǵaı tizilimine tirkelip, polıseıler kúdiktini izdestirýge kiristi. Jedel-izdestirý is-sharalarynyń qorytyndysynda, Kentaý qalalyq PB-niń qyzmetkerleri kúdikti retinde atalǵan aýyldyń turǵynyn ustady. Tergeý barysynda, er adam mas kúıinde túngi ýaqytta zırat aýmaǵyna kirip, sadaqaǵa arnalǵan jáshikti ashyp, ishinen aqsha alyp, odan keıin qylmys ornynan boı tasalap ketkeni anyqtaldy. Aıǵaqty zat retinde kúdiktiden urlanǵan aqshalar alyndy. Osy derek boıynsha sotqa deıingi tergeý amaldary júrgizilip jatyr. Er adam qolhatpen bosatyldy.
Polısııa qyzmetkerleri er adamnyń basqa da osyǵan uqsas qylmystarǵa qatystylyǵyn anyqtap jatyr. Túrkistan oblysynyń polıseıleri turǵyndarǵa qyraǵy bolý jáne múlikti qaraýsyz qaldyrmaý qajettigin eskertedi. Baǵaly zattar urlanǵan nemese joǵalǵan jaǵdaıda tez arada “102” telefony boıynsha polısııanyń kómegine júginý kerek.
