Taıaýda, medısına mamany óziniń basynan ótken qıyn kezeńdi, indetpen qalaı kúreskenin jáne ony qalaı jeńip shyqqanyn jýrnalıster qaýymyna onlaın-rejiminde aıtyp berdi.
Shynyn aıtqanda, dáriger koronavırýs ınfeksııasyn qaı jerden juqtyrǵanyn ózi de bilmegen eken.
"Jumysta biz saqtyq sharalarynyń barlyq talaptaryn qatań oryndadyq. Meniń birneshe áriptesim jáne men COVID-19 juqtyrǵanymyzǵa qaramastan, bizdiń pasıentterimizdiń eshqaısysy aýyrǵan joq. Biraq, biz – dárigerler qoǵamnan oqshaýlanbaǵanbyz. Men kez kelgen qarapaıym adam sııaqty avtobýspen júremin, dúkenge baramyn. Árıne, jumysymyz osyndaı bolǵandyqtan, biz únemi qaýip-qater aımaǵynda júremiz", – dedi ol.
Elızaveta Kalmbahtyń aıtyp otyrǵany ras. Tap qazirgi ýaqytta medısına qyzmetkerleri men tártip saqshylary koronavırýspen kúreste aldyńǵy shepte júr. Bir sózben aıtqanda, qaýip-qater bulardyń basyna kúni-túni tónip turady.
Dáriger indetti juqtyrǵanyn ózi anyqtapty.
"Men birden koronavırýs ınfeksııasyn juqtyrdym dep kúdiktendim. О́tıkeni, mende osy dertke tán belgiler boldy: bulshyq etterim, keýdem aýyra bastady. Bul belgiler meniń ystyǵym kóterilgen soń birneshe saǵattan keıin paıda boldy", – dedi Elızaveta Kalmbah.
Aýyrǵanyn osylaısha sezgen dáriger-reanımatolog sanaly azamat retinde qoǵamnan óz erkimen oqshaýlanyp, birden áriptesteriniń kómegine júgingen. О́kinishke qaraı, zertteý nátıjeleri Elızaveta Kalmbahtyń COVID-19 indetin juqtyrǵanyn rastapty. Ol ol ma, arada birneshe kún ótkende pasıenttiń jaǵdaıy kúrt nasharlap, ony jan saqtaý bólimine aýystyrýǵa májbúr bolǵan.
Mine, osyndaı syn saǵatta dáriger óziniń áriptesteriniń qoldan kelgen kómektiń bárin jasaǵandaryna dán rızashylyq bildiredi. Infeksııalyq gospıtalda bolǵan kezde ol telefon arqyly týystarymen jáne jaqyndarymen kez kelgen ýaqytta sóılesip turǵan eken.
"Áriptesterim meni barynsha qoldady. Olar úılesimdi jáne tıimdi jumys istedi. Maǵan múmkin bolǵan kómektiń bárin jasady", – deıdi indettiń bar aýyrtpashylyǵyn bastan keshken reanımatolog dáriger.
Qazirgi tańda Qaraǵandydaǵy professor Hafız Maqajanov atyndaǵy kópsalaly aýrýhananyń 100 orynǵa eseptelgen juqpaly aýrýlar gospıtali pasıentterge lyq tolǵan. Onyń ishinde toǵyz naýqas jan saqtaý bóliminde jatyr eken. Al bir pasıent ókpeni jasandy jeldetý apparatyna qosylǵan.
Atalǵan aýrýhananyń jan saqtaý jáne qarqyndy terapııa bóliminiń meńgerýshisi Sergeı Kım ókpeni jasandy jeldetýge qosý amalynyń eń sońǵy tótenshe shara ekendigin aıtady. Túrli elderdiń dárigerlik tájirıbesine súıengen sońǵy málimetter osylaı deýge negiz beredi eken.
"Apparatqa qosý úshin adamnyń tynys alýyn tolyq toqtatý kerek. Eger múmkindik bolsa, ınvazıvti emes ádisterge júgingen jón. Bul rette adam ózi dem alady, al apparat oǵan kómektesedi. Jan saqtaý bóliminde qazir segiz naýqas dál osylaı tynys alýda. Bári de esterin bilip jatyr. Keıde olardy tamaqtandyrý úshin apparattaryn sóndire turamyz. Keıbir pasentterimiz, tipti, dárethanaǵa óz kúshterimen bara alady", – deıdi bólim meńgerýshisi Sergeı Kım.
Sońǵy kelip túsken málimetterge súıensek, Qaraǵandy oblysynda 1188 adamnyń koronavırýs ınfeksııasyn juqtyrǵany resmı túrde anyqtalǵan. О́kinishke qaraı, alty naýqas aýrýdy kótere almaı, kóz jumdy. Al 477 pasıent pandemııa qursaýyn buzyp shyǵyp, qatarǵa oraldy.
Qaraǵandy oblysy
