Burynǵymen salystyrǵanda elimizde qazir bul baǵytta biraz bastama bar. Máselege Memleket basshysy aıryqsha mán berip, brakonerlikpen jáne ormandy zańsyz otaýmen kúres júrgizýdi baqylaý kúsheıe tústi.
Oblys ákimdiginiń bastamasymen Aral teńizi akvatorııasyndaǵy Jalańash kólin sýǵa toltyrý máselesiniń qarastyrylýyn bizdiń óńirdegi úlken istiń birine jatqyzar edim. Ony tipti óz qarjysyna jasaýǵa nıetti jergilikti kásipkerler de bar. Bul joba iske assa, birinshiden tolyp ketýine baılanysty qaýip tónip turǵan Kókaral bógetine qysym azaıady, ekinshiden uly teńiz ultanyna ketip jatqan teńiz sýy úlken oıpatqa tolady.
Kógaldandyrý, qorshaǵan ortany qorǵaý, tabıǵatty lastamaý memlekettiń ǵana mindeti emes ekenin esten shyǵarmaǵan jón. Bul árqaısymyzdyń aýlamyzdan, kóshemizden bastalýy kerek. Osy baǵyttaǵy naqty is pen nasıhattan keıin kógaldandyrýǵa mán bere bastaǵandar qatary kóbeıgeni qýantady. Aýlasyn, aýylyn kórkeıtip jatqan turǵyndardan úlgi alyp jatqandar da az emes.
Bıylǵy taǵy bir jańalyq – oblys ortalyǵynda aryq júıesin jańartyp, parkter men alleıalarǵa, kóshelerge aıaq sý jetkizý qolǵa alyndy. Tabıǵat janashyrlarynyń úmitin oıatqan osy bastamanyń aıaqsyz qalmaıtynyna senemiz. Basqa aýdandar da osy úlgini úrdiske aınaldyrsa degen tilegimiz de joq emes.
Qazir Qyzylorda burynǵydan kóp ózgerdi. Kóshe tazalyǵyna mán berilip, udaıy nazarda bolyp keledi. Endi sol tazalyqtyń saqtalýy turǵyndardyń jaýapkershiligine tikeleı baılanysty.
Jurtty tabıǵatqa janashyrlyq tanytýǵa baýlý úshin kóp qarjy qajet emes, tek nıet bolsa boldy. Mysaly, azamattardyń qoldaýymen eki kósheniń turǵyndaryn osy iske jumyldyrdyq. Osy kúni alǵashqy kóshedegi aryq tazalanyp, aıaq sý berildi. Kásipkerler de úlken iske úles qosyp, N.Nazarbaev dańǵyly boıyndaǵy meshit aýlasyna sý qubyryn júrgizýge kómek berdi. Qazir ol aýmaq saıaly alleıaǵa aınaldy. Osynyń bári – kóptiń jumylýymen bitken jumys. Tabıǵatqa janashyr jandardyń qozǵalysy bastaldy, onyń nátıjesi de kóp kúttirmeıtini anyq.
Bolat NURHOJAEV,
óńirlik eko-ambassador
Qyzylorda oblysy
