Onda senatorlar "Halyq densaýlyǵy jáne densaýlyq saqtaý júıesi týraly" Qazaqstan Respýblıkasynyń kodeks jobasyn jáne "Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly" ilespe zań jobasyn talqylady.
Nátıjesinde Senat zań jobalaryn talqylaý barysynda usynylǵan ózgerister men tolyqtyrýlardy eskere otyryp, olardy Májiliske qaıtarý týraly sheshim qabyldady.
Máýlen Áshimbaevtyń aıtýynsha, qaralǵan zań jobalary otandyq densaýlyq saqtaý salasyn damytýǵa jańa serpin beredi.
"Kodeks jobasy Senattyń barlyq qomıtetterinde jan-jaqty ári muqııat pysyqtaldy. Qoǵamda talqylanyp jatqan ózekti máseleler qaralyp, utymdy pikirler aıtyldy. Soǵan sáıkes, Senat "Halyq densaýlyǵy jáne densaýlyq saqtaý júıesi týraly" kodeks jobasyna jáne ilespe jobaǵa birqatar mańyzdy túzetýler engizdi. Olar, eń aldymen, Memleket basshysynyń Ulttyq qoǵamdyq senim keńesiniń úshinshi otyrysynda bergen densaýlyq saqtaý salasyna qatysty tapsyrmalaryn iske asyrýǵa baǵyttalǵan. Atalǵan kodeks jobasy ult densaýlyǵyn nyǵaıtýmen qatar, medısına qyzmetkerleriniń quqyǵyn qorǵaý sııaqty birqatar mańyzdy basymdyqtardy qamtıdy. Aldaǵy ýaqytta bul qujat otandyq medısınanyń órkendeýine óz úlesin qosady dep senemiz", – dep atap ótti Máýlen Áshimbaev.
Kodekstiń 77-babyna engizilgen ózgerister Qazaqstan Respýblıkasynyń azamattary "emdeýge jáne basqa da medısınalyq aralasýlardy, onyń ishinde profılaktıkalyq egýlerdi júrgizýge aqparattandyrylǵan kelisim berýge nemese bas tartýǵa" quqyly ekenin naqtylaýdy kózdeıdi.
Al 78-bapta "qajetsiz júktilikti jáne jynystyq jolmen beriletin ınfeksııalardyń taralýyn boldyrmaý maqsatynda" reprodýktıvti densaýlyǵyn qorǵaý týraly aqparatty qoljetimdi túrde alý jónindegi balanyń quqyqtary týraly tujyrymdamadan bas tartý usynyldy. Túzetýler boıynsha balalardyń "reprodýktıvti densaýlyǵyn qorǵaý týraly aqparatty qoljetimdi túrde alýǵa" ǵana quqyǵy bekitiledi.
Zań jobasyndaǵy ózgerister indetter men juqpaly aýrýlardyń paıda bolý qaýpi tóngen jaǵdaıda memlekettik sanıtarlyq bas dárigerdiń shekteý is-sharalaryn engizý quqyqtaryn naqty retteıdi jáne júıelendiredi.
Sonymen qatar otyrysta Memleket basshysynyń Ulttyq qoǵamdyq senim keńesiniń úshinshi otyrysynda bergen tapsyrmasy boıynsha medısına qyzmetkerleriniń "dárigerlik qatelikter" úshin jaýapkershiligin zańnamalyq retteý máselesi qaraldy.
Qylmystyq kodekste 7 baptan turatyn "medısınalyq qylmystyq quqyq buzýshylyqtar" degn arnaıy taraý saqtalyp otyr. Qoǵamǵa tónetin qater dárejesiniń tómendigine baılanysty, eger ony laýazymdy adamdar jasamasa ne aýyr zardaptarǵa ákep soqpasa klınıkalyq zertteýler júrgizý jáne profılaktıkanyń, dıagnostıkanyń, emdeý men ońaltýdyń jańa ádisteri men quraldaryn qoldaný tártibin buzý ákimshilik quqyq buzýshylyq qataryna aýystyrylady.
Negizsiz ótinishter boıynsha dárigerlerdi qýdalamaý úshin qylmystyq isti qozǵaýǵa saraptama komıssııasynyń qorytyndysy qajet bolady.
Senat Qazaqstan Respýblıkasynyń Qylmystyq-prosestik kodeksindegi tıisti túzetýlerdi maquldady.
Sondaı-aq depýtattar "Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jáne qylmystyq zańnamany jetildirý máseleleri boıynsha ózgerister men tolyqtyrýlar engizý týraly" Qazaqstan Respýblıkasy Zańyn eki oqylymda qabyldady.
Bul qujat Memleket basshysy Q.K.Toqaevtyń tapsyrmasyn oryndaý úshin ázirlengen. Zań jobasynyń basty maqsaty – buzylǵan nemese daýly materıaldyq sýbektıvti quqyqtardy nemese zańmen qorǵalatyn múddelerdi naqty qorǵaýdy qamtamasyz etý maqsatyndaǵy sot aktileri men ózge de organdardyń aktilerin májbúrlep iske asyrý tártibiniń tıimdiligin arttyrý. Sondaı-aq, zań jobasy jala japqany úshin jaýaptylyqty qylmystyq sıpattan aryltýdy kózdeıdi.
Zań jobasy sot oryndaýshysy qabyldaıtyn is júrgizý qujattaryn, is-áreketterdi ońtaılandyrýǵa jáne osy is-áreketterdiń dáıektiligin aıqyndaýǵa; jeke sot oryndaýshylary keńsesiniń qyzmetin retteýge; jeke sot oryndaýshylarynyń tártiptik tájirıbesin jetildirýge; sıfrlyq tehnologııalardy engizýge, atqarýshylyq is júrgizý taraptary úshin májbúrlep oryndatý júıesiniń ashyqtyǵy men qoljetimdiligin arttyrýǵa; azamattardyń konstıtýsııalyq quqyqtary men bostandyqtaryn iske asyrýda qylmystyq jáne ákimshilik zańnamanyń erejelerin jetildirýge baǵyttalǵan.
Odan bólek, Senat otyrysynda "Qazaqstan Respýblıkasynyń keıbir zańnamalyq aktilerine sıfrlyq tehnologııalardy retteý máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń Zańy eki oqylymda qabyldandy.
Qujattyń mindetteri – derbes derekterdi qorǵaý salasyndaǵy ýákiletti organdy jáne onyń negizgi fýnksııalaryn aıqyndaý; sıfrlyq tehnologııalardy qoldanýǵa baılanysty qoǵamdyq qatynastardy retteý jáne aqparattyq-kommýnıkasııalyq tehnologııalar salasyndaǵy jobalardy iske asyrý kezinde jaǵdaı jasaý; beıne monıtorıngtiń ulttyq júıesin qurý jáne onyń jumys isteýi úshin quqyqtyq negiz belgileý.
Zańdy qabyldaý azamattardyń jeke derekterin qorǵaý jónindegi zańnamalyq kepildikterdi kúsheıtýdi; ındýstrııalyq, ınnovasııalyq, syrtqy saýda qyzmeti salasyndaǵy ýákiletti organdardyń fýnksııalaryn ajyratýdy; "zııatkerlik robot" uǵymyn zańnamalyq aıqyndaýdy; elektrondyq ónerkásip salasyndaǵy memlekettik saıasatty iske asyrý jónindegi ýákiletti organdy aıqyndaýdy qamtamasyz etedi.
Búgin "Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly" zań da talqylanyp, qabyldandy.
Zań jobasynyń maqsaty tutynýshylardyń quqyqtaryn qorǵaý salasyndaǵy quqyqtyq qatynastardy odan ári jetildirý, tutynýshylyq daýlardy sotqa deıin retteý ınstıtýtynyń róli men mártebesin kúsheıtý, sondaı-aq, bıznestiń tutynýshylar aldyndaǵy áleýmettik jáne materıaldyq jaýapkershiligin arttyrý bolyp tabylady.
Qujat tutynýshylardyń shaǵymdaryn qaraýdyń 3 satyly júıesin engizýge; Qazaqstan Respýblıkasynyń Úkimeti janyndaǵy konsýltatıvtik-keńesshi organ sanalatyn tutynýshylardyń quqyqtaryn qorǵaý jónindegi mekemearalyq keńes qurýǵa múmkindik beredi. Zań jobasy tutynýshylardyń quqyqtary men zańdy múddelerin qorǵaý jónindegi sharalar engizýge jaǵdaı jasaıdy; olardy qorǵaýdyń ınstıtýsıonaldyq júıesi bekitiledi; tutynýshylardyń ókilderi aıqyndalady; Qazaqstan Respýblıkasynyń tutynýshylardyń quqyqtaryn qorǵaý týraly zańnamasynyń saqtalýyn memlekettik baqylaý tetigi retteledi.
Budan basqa, "Avtomobıl kóligi týraly" Qazaqstan Respýblıkasynyń Zańyna halyqaralyq avtomobıl tasymaldaryn qadaǵalap otyrý máseleleri boıynsha tolyqtyrýlar engizý týraly" Qazaqstan Respýblıkasynyń Zańy qabyldandy.
Zań jobasynyń maqsaty – navıgasııalyq plombalardy jáne onyń ınfraqurylymyn paıdalana otyryp, tranzıttik tasymaldardy qadaǵalaý júıesin qurý, sondaı-aq, osyndaı júıeniń ulttyq operatoryn jáne onyń ózara is-qımyl tártibin, onyń ishinde Eýrazııalyq ekonomıkalyq odaqqa múshe memleketterdiń memlekettik organdarymen anyqtaý.
Qujattyń negizgi mindetterine Qazaqstan Respýblıkasynyń memlekettik satyp alý týraly zańnamasyna sáıkes konkýrstyq negizde halyqaralyq tasymaldardy qadaǵalaý júıeleriniń ulttyq operatoryn aıqyndaý jónindegi Qazaqstan Respýblıkasy Úkimetiniń quzyretin belgileý; Qazaqstan Respýblıkasynyń aýmaǵy arqyly avtomobıl tasymaldary kezinde navıgasııalyq plombalardy qoldaný jónindegi zańnama normalaryn bekitý, sondaı-aq, ózara is-qımyl, plombalardy jalǵa alý, jaýapkershilik máselelerin retteý jatady.
