Aldymen tiginshiligimen tanymal bolǵan anasy Molquıma Quspanǵalıeva aıaqpen qozǵalysqa keltiriletin urshyǵyn dalaǵa tastaǵysy kelmepti. Sóıtip, anasy tutynǵan buıymdardy kóneniń kózindeı saqtaýdy jón kóredi. Keıin soǵys ardageri, ishki ister salasynyń úzdigi atanǵan ákesi Batyrǵalı Muqashevtyń qoldanǵan buıymdaryn da jınaqtaıdy.
Osylaısha, óz úıinde mýzeı jasaqtala bastaǵanyn baıqamaı qalady. Keıin mýzeı qory aýyl azamattarynyń buıymdarymen tolyǵyp, ótken ǵasyrdyń 60-70-jyldaryn kóz aldyńyzǵa elestetedi. Keıbir jádigerlerdiń júzjyldyq tarıhy bar. Mýzeı bilte sham, útik, quman sekildi turmystyq buıymdarmen tolyqty. Tipti dıirmenniń tasy da tur. Televızor men radıoqabyldaǵyshtyń, mýzykalyq aspaptardyń birneshe túri bar. Táýelsizdikpen birge aınalymǵa engen teńgeniń alǵashqy nusqalaryn da kezdestirýge bolady.
– Án jazylǵan plastınkany aınaldyratyn eski patefondy tabý qıyn ǵoı. Is tigetin mashına, radıonyń birneshe túri – munyń bári kóne jádiger. Keıbirin aǵaıyndardan, dostarymnan surap aldym. Belgili qalamger Rahmet Imanǵalıevtiń jazý mashınkasyn balalary tapsyrdy. Idaıat Qýanǵalıev degen kórshimniń tranzıstoryn aǵanyń kózindeı saqtap otyrmyn, – deıdi Ǵalymjan Muqashev.
Qoly bosaǵan sátte ózi jasaqtaǵan shaǵyn mýzeıdegi kóne buıymdardy qalpyna keltirip, keıbirin óńdeıdi. Sol sebepten bolar, elý jyl burynǵy patefondar, radıo-tranzıstorlar áli kúnge deıin jumys isteıdi. Mys pen jezden, aǵashtan jasalǵan kóne buıym, ásirese telefon men fotoapparattyń alýan túri tizilip tur. Bolashaqta mýzeıdi keńeıtip, aýdan jurtshylyǵyna tanystyrýdy maqsat etip otyr. Keıbir jádigerdiń tusyna shyqqan jylyn, ataýyn jazyp qoıýdy qolǵa almaq.
Atyraý oblysy
