Aımaqtar • 17 Maýsym, 2020

Dúr silkindirgen dúrbeleń

3625 ret

kórsetildi

1 mın

oqý úshin

Keshe Petropavldaǵy "Qazaqtelekom" keńsesiniń aldynda bir dúrbeleń boldy. Qaptaǵan polısııa mashınalaryn kórgen turǵyndar áleýmettik jelilerge habarlasyp, ne bolǵanyn anyqtamaq bolyp, bir-birine jarysa jazyp jatty. Polısııa da aınalany qyzyl jippen qorshap, onsyz úrkip turǵan halyqtyń úreıin ushyra tústi.

Jaqsybaı SAMRAT

Dabylyn bezildetip jetken túrli quqyq qorǵaý men tótenshe jaǵdaılar qyzmetteriniń mashınalary halyqtyń kóńil aýdarmasyna qoımady. Artynan polısııany "102" nómiri arqyly shaqyrǵan "Qazaqtelekom" qyzmetkerleriniń ózi ekeni anyqtaldy. Ǵımarattan barlyq qyzmetkerler men kelýshiler shyǵaryldy.

Sóıtse... jurttyń bárin dúrliktirip júrgen esik aldyna umyt qaldyrylǵan telefon qorapshasy bolyp shyqty. Ony ańdaǵan pysyqaı kúzetshi qozǵap kórýge de qorqyp, birden óziniń bastyǵyna habarlaǵan. Anaý da munyń anyq-qanyǵyna jetýge júregi daýalamaı birden polısııa shaqyrǵan. Shaqyrýmen kelgen jarylǵysh zattar jónindegi ınspektor men ıt jetektegen kınolog qorapshada ne jatqanyn tez anyqtap, onyń eshqandaı jarylǵysh zat emes telefon apparaty ekenine jurttyń kózin jetkizedi.

"Bul zatty osynda jańa telefon alýǵa kelgen klıentterdiń biri umyt qaldyrýy múmkin. Qazir beınekameranyń túsirimderi tarazylanyp jatyr. Ol qorapshany kim qaldyrǵanyn túsirip alǵan bolýy kerek", deıdi tergeýshi Kámılá Maqına.

PETROPAVL