"Bir birgemiz" respýblıkalyq aksııasyna "Fenıks", "Amanat" volonterlar klýbtary, "Dýman" pedagogıkalyq otrıady men "Jas Otan" jastar qanatynyń ókilderi óz úlesin qosty. Tuńǵysh Prezıdenttiń bastamasy boıynsha 17 myń 225 aqmolalyqqa jalpy somasy 170 mln teńgeni quraıtyn qarjylaı kómek kórsetildi. Jaqsylyq jasaýdan jarysqan jastar arasynan úzdik 27 volonterǵa Elbasy Nursultan Nazarbaevtyń atynan alǵys hat tabystaldy.
"Qurmetti volonterlar! Biz sizderdiń júrek qalaýymen qoǵamnyń damýyna qosqan úlesterińizdi joǵary baǵalaımyz jáne sizderge barynsha qoldaý kórsetemiz. Sizderdiń qatarlaryńyzǵa qosylýǵa umtylǵan oblysymyzdyń turǵyndary da kún sanap artyp keledi. Shynaıy kóńilmen jasalǵan jaqsylyq qoǵamdaǵy izgilik pen ózara syılastyqty qalyptastyratynyna senimdimin. Sizderge oblystyń barsha turǵyndarynyń atynan alǵys bildiremin! Sizderdi elimizdiń naǵyz patrıottary dep bilemin!", deıdi oblys ákimi Ermek Marjyqpaev.
О́ńirde volonterlyq qozǵalys qarqyn alyp keledi. Oblys aýmaǵynda 70-ten astam volonterlyq ortalyq qyzmet atqarady. Olar 3 myńǵa tarta eriktini qamtıdy. Sondaı-aq, ózge de jastar uıymdary, qoǵamdyq mekemeler de volonterlyq sharalarǵa belsene aralasýda.
"Biz birgemiz" respýblıkalyq aksııasy áli de jalǵasýda. Onyń aıasynda azamattardy qarjylaı qoldaýdyń 4-shi tolqyny júrgizilmek. Bul joly 3950 aqmolalyqqa 197 mln 500 myń teńge kómek usynylady.
