Mine, osyǵan oraı kenshiler astanasynda onlaın rejiminde ótken baspasóz máslıhatynda Qaraǵandy emhanalarynyń basshylary tájvırýs indetin sımptomsyz tasymaldaýshylar qalaı baqylanatyny jáne indet juqtyrǵandar qandaı kórsetkishter boıynsha aýrýhanaǵa jatqyzylatyny týraly egjeı-tegjeıli aıtyp berdi.
Qaraǵandy oblystyq densaýlyq saqtaý basqarmasy basshysynyń orynbasary Gamal Toqsambaev sımptomsyz naýqastar PTR-testileý jasaǵan kezde anyqtalatynyn habardar etti.
"Júkti áıelder, sozylmaly júrek-qan tamyrlary aýrýlary bar pasıentter, qant dıabetimen jáne tynys alý júıesiniń syrqatymen aýyratyn adamdar mindetti túrde tekseriledi. Sondaı-aq, PTR-testileýden buryn juqtyrǵandarmen jaqyn qarym-qatynasta bolǵan adamdar da ótkiziledi", dep túsindirdi ol.
Eger PTR-taldaý oń nátıje kórsetse, biraq sımptomdar bolmasa nemese olar álsiz bolsa, onda pasıentti úı karantınine ornalastyryp, emhanalardyń baqylaýyna alady eken. Bul týrasynda «Qaraǵandy qalasynyń №3 emhanasy» KMK dırektory Sánııa Boranqulova aıtyp berdi.
"Biz KVI syrqaty bar sımptomsyz naýqastardy baqylaıtyn arnaıy bólim qurdyq. Pasıentterge dárigerler nemese medısınalyq orta býyn qyzmetkerleri qońyraý shalyp otyrady. Olarǵa baqylaý jasaý ońaıyraq bolý maqsatynda, mysaly kimmen qashan áńgime júrgizilgenin, kimge dárigerdiń kómegi kerek ekenin bilip otyrý úshin pasıentter kún saıyn birneshe topqa bólinedi", deıdi maman.
Al Qaraǵandydaǵy №1 kópsalaly aýrýhana dırektorynyń orynbasary Radmıla Gabdrakıpova keıbir pasıentterge qannyń ottegimen qanyǵý deńgeıin baqylaýǵa qabiletti arnaıy quraldar – pýlsoksımetrler ýaqytsha paıdalanýǵa tegin beriletinin jetkizdi. Bul quraldardyń kómegin qart adamdar, júrek-qantamyr júıesi, búırek, tynys alý júıesi, qant dıabeti jáne basqa da sozylmaly aýrýlary bar naýqastar alady. Al medısına qyzmetkerleri pasıentterge atalǵan quraldy qalaı durys paıdalanýdy úıretedi, qandaı kórsetkishpen birden dárigerdi shaqyrý kerektigin túsindiredi.
Onlaın baspasóz máslıhaty barysynda medısına mamandary myna bir jaıtqa basa nazar aýdarý kerektigin aıtty. Máselen, qanynda sımptomsyz vırýs belgisi bar naýqastar zeınetkerlermen, júkti áıeldermen nemese balalarmen birge turatyn bolsa, olar emdelýge jatqyzylýy múmkin. Mundaı pasıentter úshin kenshiler astanasyndaǵy "Týrıst" jáne "Merıdıan" qonaq úıleri arnaıy túrde qaıta jabdyqtalǵan.
Jalpy, talap boıynsha koronavırýs ınfeksııasyn sımptomsyz tasýshylar úı karantıninde eki apta ýaqyt jatýy kerek. Keıin olardan qaıtadan alynǵan PTR-taldaý teris nátıje kórsetse, onda naýqas burynǵy qalpyna keldi dep sanalady. Eger, test qanda koronavırýs belgisi baryn rastasa, ondaı jaǵdaıda pasıent dárigerlerdiń baqylaýynda qalyp, em alýdy ári qaraı jalǵastyra beredi.
Qaraǵandy oblysy
