"Ár qatysýshyǵa 7 baǵyt boıynsha ózin-ózi damytý baǵdarlamasy usynylady: sport jáne dene shynyqtyrý, daryn men daǵdy, eriktilik, týrıstik saıahattar, kitap oqý, ulttyq mura jáne eńbek tájirıbesi. Qatysýshynyń jas shamasy 14 pen 29 jas aralyǵynda bolýy kerek. Qalǵanynyń bári – turǵylyqty jeri, bilimi, mamandyǵy – mańyzdy emes. Árbir talapshyl jas qazaqstandyq "Elbasy Medali" ıegeri bola alady", dedi Nur-Sultan qalalyq bilim basqarmasynyń bastyǵy Sholpan Qadyrova búgin ótken baspasóz konferensııasynda.
Baǵdarlamaǵa qatysý úshin me.fpp.kz onlaın-platformasyna tirkelip, usynylǵan – altyn, kúmis nemese qola baǵyttaryn tańdaý kerek. Sodan keıin, ózińizge arnaıy bekitilgen tálimgerdiń kómegimen óz qalaýyńyzǵa saı is-sharalar men kesteni tańdap, jeke damý baǵdarlamasyn jasaı alasyz. Múmkindigi shekteýli jastardyń baǵdarlamaǵa qatysa alatyndaı jeke keste qurýyna da jaǵdaı jasalady.
"Taǵy bir erekshe toqtala ketetin jaǵdaı, baǵdarlama sheńberinde eriktilerdiń qyzmeti Memleket basshysynyń "Eriktiler jylynyń" ashylýy kezinde aıtqan mindetterine sáıkes bolady. "Elbasy medali" jastardyń tek biliminiń jáne tabysynyń sımvoly ǵana bolyp qalmaıdy. Bul bolashaq mektep túlekteri úshin de eldegi JOO-da bilimderin jalǵastyrýǵa baǵyttalǵan tyń qadam", dedi Sh.Qadyrova.
Qalamyz boıynsha dál qazir 1351 adam baǵdarlamaǵa qatysýǵa ótinish bergen, olardyń qatary áli de artady. Baǵdarlamaǵa qatysý tártibi Úkimet Qaýlysymen bekitilip, Tuńǵysh Prezıdent Qorynyń qoldaýymen ótýde.
Eske sala keteıik, 2019 jyly Qazaqstannyń Tuńǵysh Prezıdenti – Elbasy belsendi jáne talantty jastardy qoldaýǵa baǵyttalǵan jalpyulttyq "El Úmiti" bastamasyn kóterdi. Jańa bastama aıasynda Tuńǵysh Prezıdent – Elbasy qory qazaqstandyqtar men memleket bolashaǵy úshin birneshe tyń jobalardy iske qosty. Daryndy balalardy demeý úshin "Qabilet" kásibı baǵdarlaý quraly sekildi basqa da jobalar iske asýda.
