Almaty qalasy mańaıynan «Kók jaılaý» taý-shańǵy kýrorty salynatyn bolyp uıǵaryldy. Bul týraly Meta.kz habarlady.
Kezinde birqatar ekologtar ulttyq tabıǵı qoryqtyń kindik tusyna ornalasatyn osy kýrortty sileýsin, taý eshkisi, maral sııaqty janýarlardyń júrýine kedergi keltiredi degen bolatyn.Arada biraz ýaqyt ótkennen keıin Almaty qalalyq týrızm basqarmasynyń bastyǵy Baqytjan Jolamanov elimiz ekologtarymen mámilege kelgenin jáne «Kók jaılaý» taý-shańǵy kýrortynyń 2015 jyly salynatynyn málim etti. «Ras jańadan salynatyn «Kók jaılaý» taý-shańǵy kýrorty tóńireginde biraz daý-damaı týyndady. Biraq, qazirgi qoldanystaǵy saıahat nysandarynyń kólemi shaǵyn bolýy sebepti oǵan kelýshiler sany da az. Mysaly, «Shymbulaq» pen «Aqbulaq» 6-7 myń adamǵa ǵana qyzmet kórsete alady. Al bolashaqtaǵy «Kók jaılaý» kýrorty osy olqylyqtyń ornyn toltyrýǵa qyzmet jasaıdy»,- deıdi B. Jolamanov.
Jańa nysan túsetin oryn 2,7 gektar aýmaqty qamtıdy. Ol jerden qonaqúıler, restorandar, attraksıondar jáne taǵy da basqa nazar aýdararlyq nysandar boı kóteredi. Jalpy alǵanda, álemniń birqatar elderi taý shańǵy týrızmin damytýǵa aıryqsha kóńil bólip otyr. Eger biz «Kók jaılaýdy» iske qosar bolsaq, Reseıdiń Sibir jurty da bizge kele bastaıdy. О́ıtkeni, olar shańǵy tebý úshin sonaý Alpi taýyna barady eken.
Almaty qalalyq týrızm basqarmasynyń bastyǵy Baqytjan Jolamanovtyń málimdeýinshe, «Kók jaılaý» taý-shańǵy kýrorty qurylysy 2-3 jyl kóleminde bitýi tıis. Al 2017 jyly osy jerden Qysqy ýnıversıada oıyndaryn ótkizý josparlanyp otyr.
Danııar Túımebaı.
