Bıyl Jetisýdaǵy erikti jastardyń qatary kóbeıgen. Derek boıynsha, jyl basynda oblysta 1 043 volonter resmı sanaqqa kirgen bolsa, qazir bul úles 2 074 adamdy qamtyp otyr eken. Esesine, aımaqta eriktiler qolymen atqarylǵan is te ilgerilep, qolǵanatqa jarap, qaıyrym jasaýǵa beıil jastar sany ósken. Onyń jarqyn mysalyn «Biz birgemiz» jalpyulttyq aksııasy kezinde atqarylǵan is-sharalardan baıqaýǵa bolady. Juqpaly indettiń aldyn alý men taralýyna tosqaýyl qoıý maqsatynda jarııalanǵan tótenshe jaǵdaı kezinde jetisýlyq erikti jastar áleýmettik kómekti qajet etetin 15 000 otbasyna qolushyn sozypty. Karantın jaǵdaıyndaǵy jumys volonterlerdi betperde tigý men sanıtarlyq zattar óndirisin damytýǵa da jumyldyrǵan eken. Atap aıtqanda, volonterlerdiń muryndyq bolýymen 6 215 dana medısınalyq maska tigilip, 6 000 lıtr suıyq antıseptık daıyndalǵan. Munyń bári turǵyndarǵa tegin taratylypty.
Oblysta volonterlerdiń jumysyn úılestirýmen «Meıirimdi Jetisý» front-keńsesi aınalysyp otyr. Eriktilerdiń jumysyn bir ortalyqta úılestirip, turǵyndar tarapynan kelip túsken ótinish pen shaǵymdardy jınaqtaýmen aınalysqan ortalyqqa alǵashqy kúnderi adamdar jıi habarlasqan. Iаǵnı tótenshe jaǵdaı jarııalanǵan alǵashqy kúnnen bastap turǵyndardyń ótinishin qabyldaıtyn qaýyrt jelige 2 634 adam habarlasyp, kómek suraǵan. Onyń ishinde 1 098 adam áleýmettik kómekke muqtajdyǵyn aıtyp, azyq-túlikpen qamtýdy ótinse, 302 turǵyn qashyqtan oqytýǵa qatysty suraq qoıǵan. Qaýyrt jelige habarlasqan taǵy 368 adam densaýlyq saqtaý salasyna qatysty ótinish aıtyp, mamandardyń kómegine zárý ekenin jetkizgen. Sondaı-aq 42 500 teńge kólemindegi áleýmettik tólemge qatysty anyqtama alý úshin birer táýlik ishinde 864 adam qońyraý shalypty. Al «Meıirimdi Jetisý» front-keńsesiniń qyzmetkerleri turǵyndar ótinishin túgeldeı jazyp alyp, olardy tıisti oryndarǵa joldaý arqyly oń sheshimin tabýǵa yqpal etip otyrdy.
– Erikti jastardyń janqııarlyq isi karantın kezinde erekshe kózge tústi. Mysaly, 20 myńnan astam turǵyny bar «Asyl arman» turǵyn úı kesheni oqshaýlanǵan kezde oblys jastary men volonterler kún saıyn turǵyndarǵa azyq-túlik jetkizip otyrdy. Jalpy, bul jerde volonterlerdiń jumysy tek daıyn azyq-túlik pen qajetti zattardy jetkizip berýmen shektelgen joq. Muqtaj adamdardyń tizimin jasap, olardy qajetti zattarmen qamtý úshin demeýshi izdep úlken qajyr men qaırat kórsetti. Atap aıtqanda, volonterler men demeýshilerdiń tize qosýymen Talǵar aýdanynda 6 mln teńge kóleminde 540 otbasyna azyq-túlik jetkizgen. Eńbekshiqazaq aýdanynda 21 mln 700 myń teńge kóleminde 3 186 otbasyna kómek kórsetildi. Sonymen qatar erikti jastar 500 000 teńge qarjy kózin jınap, eki otbasynyń 1 jyldyq páteraqysyn tólep berdi. Alakól aýdanynda isker azamattardyń qoldaýymen 60 mln teńge kóleminde demeý qarjy jınalyp, oǵan 790 otbasyna azyq-túlik jetkizildi. Al Uıǵyr aýdanynda turatyn volonter Nursultan Bolatuly bas bolyp 1 700 000 teńgege 258 otbasyna qolushyn sozdy. Sol sııaqty Balqash aýdanynyń turǵyny Almas Qystaýbaev óz jerlesterine 10 tonna kúrishti tegin taratty. Aıta bersek mundaı mysaldar jetkilikti. Iаǵnı volonterlerdiń «Biz birgemiz» aksııasy aıasynda atqarǵan isi kópke úlgi bolarlyqtaı, – deıdi Almaty oblystyq Jastar saıasaty basqarmasynyń bólim basshysy Jansaıa Smaǵulova.
Almaty oblysy
