Búkil álem dúnıeni dúrliktirgen pandemııada dárigerlerdiń qadiri eselep artty. Talaıdyń ómirin jalmaǵan qaýipti dertpen aldyńǵy shepte kúresip júrgen medısına qyzmetkerleriniń eńbegi erlikke para-par.
Osynaý aıtýly mereke qarsańynda «Nazarbaev Zııatkerlik mektepteri» derbes bilim berý uıymynyń fılıaly «Nur-Sultan qalasyndaǵy Halyqaralyq mekteptiń» oqýshylary dárýi dertke daýa dárigerlerge rııasyz alǵystaryn bildirip, erekshe quttyqtaýdy uıǵardy. Bir top zııatker qoldaryna qalam alyp, búginginiń batyrlaryna arnaǵan aqjarma tilekteri men júrekjardy lebizderin qaǵaz betine túsirdi.
Sóz basyn «Egemen Qazaqstan» gazetiniń ardageri, aıtýly aqyn Qorǵanbek Amanjoldyń dárigerlerdiń ólsheýsiz eńbegin baǵalaýǵa shaqyrǵan óleńimen bastaǵan oqýshylar odan ári tolǵanysty oılarymen órbitti.
– Biz eń ardaqty mamandyq ıeleri dárigerlerdi kásibı merekelerimen quttyqtap, alǵys aıtýdan jalyqpaımyz. Adamzattyń amandyǵy jolynda uıqy kórmeı, ýaqytpen sanaspaı eńbek etip júrgen búgingi kúnniń batyrlary – medısına qyzmetkerleri barlyq qurmetke laıyq dep bilemiz. Olar birneshe aıdan beri otbasylarynan jyraqta júrip, qaýipti dertti aýyzdyqtaýǵa bar kúshterin salýda. Abzal jandarǵa demeý bolsyn, ári kóńil-kúı syılasyn degen maqsatta bir býma hattarymyzdy joldaǵaly otyrmyz, – deıdi oqýshylar.
