Jobalaýshylardyń ıdeıasy boıynsha, "Arbat" jaıaý júrginshiler joly "Kóne Taraz" kesheni men Qarahan baba kesenesin baılanystyrady. Munda jalpy aýdany 2,5 gektardy quraıtyn uzyndyǵy 320 metrlik sazdy sýburqaq iske qosylady. Sondaı-aq, segiz túrli aǵashtyń 160-tan astam kósheti otyrǵyzylyp, jaryqtandyrylý júrgiziledi. Kóne shahardyń kelbetin arttyrý úshin oryndyqtar men besedkalar ornatylady. Sonymen qatar, 18 myń sharshy metrge órnektastar tóseledi. Mundaǵy jumysqa barlyǵy 50 adam tartylǵan jáne olardyń ortasha jalaqysy 100 myń teńgeni quraıdy.
Merdiger uıymnyń dırektory Erkebulan Egizbaevtyń aıtýynsha, nysandy merziminen buryn tapsyrý kózdelýde eken. Iаǵnı, nysan shilde aıynyń sońynda tapsyrylady dep kútilýde. Búgingi tańda jumystyń 50 paıyzdan astamy aıaqtalǵan. Jaıaý júrginshiler alleıasynyń janyna saýda pavılondaryn salý josparlanǵan. Taraz qalasynda ótken ǵasyrdyń basynda salynǵan "Áýlıe-Ata" meshitin qaıta qalpyna keltirý jumystary da qolǵa alynýda. Bul jumystar bıýdjetten tys qarajattar esebinen atqarylýda.
Sondaı-aq, Berdibek Saparbaev "ATHLETIC" kópfýnksıonaldy sport kesheninde de boldy. Keshenniń barlyq bólmeleri avtonomdy jylytý, ystyq jáne salqyn sýmen qamtylǵan. Kelýshiler úshin dýsh, kıim aýystyratyn jáne jýynatyn bólmeleri bar. Munda fýtbol, voleıbol, boks, kúrestiń barlyq túrleri, dzıýdo, taekvondo, aýyr atletıka, armrestlıng jáne taǵy da basqa sport túrleri boıynsha jattyǵýǵa bolady. Sonymen qatar, Berdibek Saparbaev Taraz qalasy, "Saltanat" yqshamaýdanyndaǵy №19, 20, 22, 23 kóppáterli turǵyn úılerdi jańǵyrtý jumystarynyń sapasyn tekserdi. Munda ákim jergilikti turǵyndarmen kezdesti. Oblys ákimi Memleket turǵyndardyń úıin jóndeýge qomaqty qarjy bólip otyrǵanyn, endi turǵyndar tarapynan da ortaq jaýapkershilik bolýy qajettigin, turǵyn úıdiń jaǵdaıyn ózderiniń de baqylaýda ustaýy kerektigin aıtty.
Jalpy, Taraz qalasynda 797 kóppáterli turǵyn úı jańǵyrtý jumystaryn qajet etedi. Aǵymdaǵy jyly bıýdjet qarajaty esebinen jalpy quny 3,4 mıllıard teńgege 80 turǵyn úıdi jańǵyrtý josparlanǵan. Sonymen qatar, 24 turǵyn úıde 1,1 mıllıard teńgege tıisti jumystar bastalady. Qarajat bul maqsatqa 7 jylǵa deıingi merzimge 0,1 paıyzdyq mólsherlememen qaıtarymdy negizde bólingen.
Jambyl oblysy
