Úkimet basshysy munaıǵa álemdik baǵanyń tómendeýine jáne syrtqy ekonomıkalyq konıýnktýranyń nasharlaýyna qaramastan, 2019 jyldyń qorytyndysy boıynsha Qazaqstan ekonomıkasynyń sońǵy 6 jyldaǵy eń joǵary ósimi – 4,5%-ǵa qol jetkizilgenin atap ótti. Sonymen qatar ósimniń 85%-y shıkizattyq emes salalardy damytý esebinen qamtamasyz etildi.
Ekonomıka ósiminiń negizgi draıverleri — óńdeý ónerkásibi (4,5%), qurylys (12,9%), kólik (5,1%) jáne saýda (7,6%) boldy. Negizgi kapıtalǵa calynǵan ınvestısııalar 8,5%-ǵa, onyń ishinde jeke ınvestısııalar 9,5%-ǵa ósti. Syrtqy saýda aınalymy $97 mlrd deıin ósti, syrtqy saýdanyń oń saldosynyń ósimi $19 mlrd qurady. Inflıasııa josparlanǵan dáliz sheginde 5,4%-dy qurady. Eńbek naryǵynda turaqtylyq saqtaldy. Jumyssyzdyq deńgeıi 4,8% boldy. Eń tómengi jalaqy 1,5 ese ósti.
Osy jyldyń 5 aıynyń qorytyndysy boıynsha Qazaqstannyń JIО́ 1,7%-ǵa tómendedi. Bul rette ekonomıkanyń negizgi salalarynda ósim qamtamasyz etildi. Taýarlar óndirisi 4,8%-ǵa artty.
"Qazirgi jaǵdaıda Úkimettiń negizgi mindeti – ekonomıka ósiminiń oń qarqynyna shyǵý úshin qajetti jaǵdaılardy jasaý. Ol úshin elimizdegi áleýmettik-ekonomıkalyq turaqtylyqty saqtaý boıynsha aýqymdy sharalar qabyldanyp jatyr", — dedi A. Mamın.
Úkimet basshysy tótenshe jaǵdaı kezinde ekonomıkany turaqtandyrýǵa jáne halyqty qoldaýǵa baǵyttalǵan jedel ári shuǵyl sharalardyń 2 toptamasy (bıylǵy 23-30 naýryz aralyǵy) qabyldanǵanyn atap ótti. Áleýmettik áljýaz toptarǵa qarjylyq kómek kórsetildi, onyń ishinde qajetti dári-dármektermen jáne azyq-túlikpen qamtamasyz etildi, bank nesıeleri boıynsha tólemder ýaqytsha toqtatyldy, salyq jáne basqa da mindetti tólemderdi tóleý merzimi keıinge shegerildi. Daǵdarys jaǵdaıynda jeke sektordyń turaqtylyǵyn qamtamasyz etý úshin ShOB-ty jeńildikpen nesıeleý jáne bıznesti aýqymdy yntalandyrý sharalary qabyldandy.
Memlekettik baǵdarlamalar aıasynda jumyspen qamtý sharalarymen osy jyldyń sońyna deıin 1,2 mln-nan astam azamat qamtylatyn bolady. Jumyspen qamtýdyń jańa jol kartasy aıasynda 6,5 myńnan astam joba iske asyrylady. Bul 255 myń jumys ornyn ashýǵa jáne ınjenerlik-kommýnıkasııalyq jáne áleýmettik ınfraqurylymdy jańǵyrtý arqyly óńirlerde halyqtyń turmys sapasyn jaqsartýǵa múmkindik beredi. Bıznestiń jol kartasy ekonomıkanyń aralas salalarynda 100 myń jańa turaqty jumys ornyn qurýǵa negiz bolady.
Úkimet 2020 jylǵa arnalǵan Ekonomıkalyq ósimdi qalpyna keltirý jónindegi keshendi jospardy ázirlep, belsendi túrde iske asyrýda. Ol iskerlik belsendilikti yntalandyrýǵa, jumyspen qamtýdy jáne halyqtyń tabysyn qoldaýǵa baǵyttalǵan naqty salalyq sharalardy qamtıdy. Keshendi jospardy iske asyrý úshin Parlament qysqa merzimde zańnamaǵa shuǵyl túzetýler toptamasyn qarastyryp jatyr.
Bıylǵy 1 tamyzǵa deıin Ekonomıkalyq ósimdi qalpyna keltirý jónindegi memlekettik komıssııanyń jumysy aıasynda 2025 jylǵa deıingi Strategııalyq jospardyń jańa redaksııasy ázirlenedi. Ol elimizdiń jańa ekonomıkalyq baǵdarynyń negizgi baǵyttaryn anyqtaıdy.
"Jańa ekonomıkalyq shynaıylyq orta merzimdi perspektıvada eldiń sapaly ári turaqty damýyn qamtamasyz etý úshin ekonomıkalyq saıasatqa túbegeıli ózgeristerdi engizýdi talap etedi", — dep atap ótti A. Mamın.
