Bul rette Jambyl oblysynyń ákimi Berdibek Saparbaev monıtorıngtik toptar men merdigerlik uıymdardyń ókilderimen kezdesip, Taraz qalasy boıynsha "Jumyspen qamtýdyń jol kartasy – 2020" baǵdarlamasynyń júzege asyrylý barysyn synǵa aldy. Sonymen qatar, nysandardy ýaqytyly tapsyrýdy júktedi.
Bıyl Taraz qalasynda "Jumyspen qamtýdyń jol kartasy" boıynsha júzege asyrylyp jatqan qurylys jumystarynyń basym bóligin jergilikti kompanııalar atqarýda. Degenmen, jumys tıisti qarqynda oryndalyp otyrǵan joq. Taraz qalasynyń ákimi Aıtqazy Qarabalaev qurylysshylardyń tap bolyp otyrǵan kedergileri týraly aıtyp berdi. "Keıbir merdigerler birden birneshe jobalarǵa jaýapty bolǵandyqtan, jumys kúshi men tehnıkalardyń jetispeýshiligi týyndaýda. Jalpy, Taraz qalasynda "Jumyspen qamtýdyń jol kartasy" boıynsha jalpy quny 15 mıllıardtan astam teńgege 389 jobany júzege asyrý josparlanǵan. 361 joba boıynsha jeńimpaz anyqtalǵan. Qalǵan 28 jobanyń 26-sy ońtaılandyrý úshin memlekettik vedomstvoaralyq komıssııanyń qaraýyna usynyldy", dedi qala ákimi. Bul rette Berdibek Saparbaev josparlanǵan barlyq jobalardyń iske asyrylýy kerektigin atap ótti. "Jobalardyń sanyn azaıtý – jaǵdaıdan shyǵýdyń joly emes. Iske asyrylmaǵan jobalardy jańa jobalarmen aýystyrmańyzdar. Bastalǵan is aıaǵyna deıin jetýi tıis. Sondaı-aq, basty talap – jumys sapasy bolyp qalatynyn umytpańyzdar", dedi ol.
Qala ákimi Aıtqazy Qarabalaevtyń aıtýynsha, 213 joba boıynsha qurylys jumystary júrgizilýde. Al, 29 nysannyń qurylysy aıaqtalǵan. Munda barlyǵy 2 myńnan astam adam jumys isteıdi. Olardyń jartysy "Jumyspen qamtý ortalyǵy" arqyly qamtylǵan. Josparlanǵan 5,6 myń jańa jumys orny da ýaqytyly ashylmaǵan. Bul jumystar 17 kompanııanyń sylbyrlyǵynan keshigip otyr eken. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov málimdedi. Máselen, 19 kósheni jóndeý, 3 sý qubyryn aýystyrý jumystarynyń merzimi keshiktirilýe. Al, 17 aýlany abattandyrý jumystary áli kúnge aıaqtalmaǵan. Jıyn barysynda Berdibek Saparbaev "Merdigerlerdiń ýádesine toıdyq. Sózden naqty iske kóshetin kez keldi", dedi. Al, Jambyl oblysyndaǵy jóndeý-qurylys jumystarynyń, sanıtarlyq tazalyq pen oblys ortalyǵynyń abattandyrylýyn baqylaý jónindegi 11 mobıldi top jetekshileri de iske asyrylmaǵan jobalarǵa toqtaldy. "Qazfosfat" jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirovtiń aıtýynsha, T.Rysqulov kóshesinde qurylys jumystary baıaý júrýde. Sondaı-aq, "Myńbulaq" yqshamaýdanynda shaǵyn fýtbol alańyn salý jumsysy áli bastalmaǵan. Jıynda Berdibek Saparbaev ınjenerlik ınfraqurylymdy júıeli túrde damytýdy, barlyq jumystardy qatar júrgizýdi tapsyrdy.
Jambyl oblysy
