Lıonel 1987 jyldyń 24 maýsymynda Argentınanyń Rosarıo qalasynda dúnıege keldi. Bes jasynan fýtbolmen shuǵyldanǵan bala lezde-aq dara talantymen oqshaýlanyp, 13 jasynda áıgili "Barselonanyń" qyraǵy mamandarynyń nazaryna ilikti. Osylaısha, ol Pıreneı túbegine attandy. Al Messıdiń odan keıingi júrip ótken joly jarqyn jeńisterge toly ekenine barsha jankúıer kýá. 2003 jyly katalonııalyq klýbtyń negizgi quramasyna qabyldanǵan ol sol kezden beri aıtýly komandanyń namysyn abyroıly qorǵaýda. Lıonel "Barselonamen" birge bıik belesterdiń barlyǵyn baǵyndyryp, talaı rekordtyq kórsetkishke qol jetkizdi.
Al Argentına quramasy sapynda Olımpıada chempıony, álem birinshiliginiń kúmis júldegeri atandy. Amerıka Kýbogynda san márte júldegerler qatarynan kórindi. Basqa da kóptegen dúbirli dop dodalarynda mol oljaǵa keneldi.
Eń bastysy, FIFA uıymy men "Frans Fýtbol basylymy taǵaıyndaǵan álem men Eýropanyń eń úzdik fýtbolshysyna tıesili "Altyn dopty" Lıonel Messı alty márte ıelendi. Sondaı-aq, ol alty ret "Altyn býtsynyń" ıegeri atandy. Kúni búginge deıin osy sport túrin serik etken tórtkúl dúnıedegi birde-bir oıynshy dál osyndaı orasan zor tabysqa jete alǵan joq.
