Qazir osy maqsatta 389 joba maquldanyp, Taraz qalasy boıynsha jumys bastalyp ta ketti. «Jumyspen qamtýdyń jol kartasy» baǵdarlamasy aıasynda Taraz qalasy boıynsha josparlanǵan 389 jobanyń konkýrsy ótkizilip, 14 mıllıard 231,2 mıllıon teńgege 347 jobanyń jeńimpazdary anyqtalǵan. Onyń ishinde oblystyq basqarmalardan ótetin nysandar 4 742,8 mıllıon teńge bolatyn 23 joba, al qala arqyly ótetin nysandar 9 mıllıard 488,4 mıllıon teńge bolatyn 324 joba bar.
"Jumyspen qamtýdyń jol kartasy – 2020" baǵdarlamasy qaladaǵy birqatar máseleni sheshedi. Taraz qalalyq ákimdiginiń málimeti boıynsha, búginde shahardaǵy 163 kópqabatty úıdiń aldyndaǵy aýlalarǵa, 96 kóshe men 4 kósheniń joldary men trotýarlarǵa jóndeý jumystary júrgizilýde. "Jol salý, saıabaqtardy abattandyrý sııaqty jumystardyń barlyǵy osy baǵdarlama arqyly bólingen qarajatpen jasalýda. Bıyl biz qarjy kózin taýyp, qaladaǵy mektepterdiń syrtta ornalasqan dárethanalaryn ishke ornatýdy josparlaǵan edik. Endi "Jumyspen qamtýdyń jol kartasy» baǵdarlamasy boıynsha 7 mekteptiń ishine dárethana salýǵa qarjy bólinip, onyń da jumystary bastaldy. Sondaı-aq, qalada 6 birdeı bilim nysanynda qurylys jumystary bir mezette bastaldy. Transporttyq ınfraqurylym boıynsha jalpy 92,5 shaqyrymdy quraıtyn 100 kósheni ortasha jóndeýge 3 mıllıard 334,3 mıllıon teńge bólinse, qala kósheleriniń shuńqyrlaryn qalypqa keltirý jumystaryna qala bıýdjetinen 200,0 mıllıon teńge bólinip, jóndeý jumystary júrgiziletin bolady. Al, Súleımenov kóshesiniń sońyndaǵy jańa alqapta ishkikvartaldyq avtomobıl joldarynyń qurylysy men "Býryl A, B, V" turǵyn alqabynyń joldaryna qıyrshyq tas tóseý jumystary aǵymdaǵy jyly jalǵasyn tabatyn bolady", deıdi Taraz qalasynyń ákimi Aıtqazy Qarabalaev.
Sonymen qatar, bıylǵy jyly qala kósheleriniń syrtqy jaryqtandyrý júıelerin ornatý jumystaryna jobalyq-smetalyq qujattamalaryn ázirleýge 50,0 mıllıon teńge qarjy qarastyrylǵan. Almaty qalasynyń "Altocom Asia" JShS-niń usynysy boıynsha memlekettik-jekeshelik áriptestik negizinde "Aqyldy kóshe jaryǵy» jobasy aıasynda Taraz qalasynyń syrtqy jaryqtandyrý jelilerin qaıta jańǵyrtýǵa úshjaqty kelisimshart jasalǵan. Alaıda koronavırýs indetiniń saldarynan Almaty qalasynan taýarlardy jetkizýge shekteý qoıylyp, múmkindik bolmaǵandyqtan, joba boıynsha jumystar bastalǵan joq. Joba negizinde qalanyń 158 kóshesine syrtqy jaryqtandyrý jumystary júrgizilip, qala boıynsha 14131 dana shamshyraq aýystyrylatyn bolady. Taraz qalasy kósheleriniń boıyndaǵy baǵanalardan eski jaryq shamdary jınaqtalyp, jınaqtalǵan shamdardyń jaramdylary kádege jaratýǵa jiberiledi. Budan ózge, qaladaǵy Y.Súleımenov kóshesiniń sońyndaǵy 6 turǵyn úıdiń qurylysyn júrgizý, 6 turǵyn úıdiń ınjenerlik jelilerin jóndeý, atalǵan alqaptaǵy jeke turǵyn úılerdi elektrmen qamtamasyz etý, «Dańq» alleıasyn abattandyrý, "Áýejaı" aýmaǵyndaǵy drenaj jelisin jóndeý, aýla alańdaryn abattandyrý, Qonaev jáne Seıfýllın kósheleriniń qıylysyndaǵy skverdi abattandyrý jáne jalpy uzyndyǵy 41,1 shaqyrymdy quraıtyn 35 kósheni ortasha jóndeý, Taraz qalasyndaǵy qubyr ótkelderin jáne lotokty aryq júıelerin qalpyna keltirý sııaqty jalpy 55 nysannyń jumystary bastalǵan. Bastalǵan jumystarda jalpy 625 jumys orny ashylyp, onyń ishinde «Jumyspen qamtý ortalyǵy» mekemesi arqyly jalpy 264 adam joldanǵan. Aldaǵy ýaqytta "Tekturmas" tarıhı-mádenı kesheniniń qurylysyn jalǵastyrý jáne "Áýlıeata" eskertkishiniń aýmaǵyn abattandyrý jumystary qolǵa alynyp, magıstraldyq-kommýnıkasııalar jelisi jáne "Oqýshylar saraıyny" qurylysy júrgiziletin bolady. Búginde "Tekturmas" etnotarıhı keshenin qaıta jańǵyrtýdyń ekinshi kezeńi bastalyp ketti. Jospar boıynsha eski bekinis jóndelip, keshen shekarasy kirpishtermen qalanǵan qabyrǵamen qorshalatyn bolady. Ondaǵy baqylaý alańdary men qamal alleıamen jalǵasyp, bul jerge oblystyń tarıhı nysandary men jádigerlerdiń maketteri ornalasady. Bekinis pen baqylaý alańdarynyń arasynda uzyndyǵy 15-20 metr bolatyn panoramalyq panel jobaǵa engen. Munda el táýelsizdigi tarıhyndaǵy mańyzdy oqıǵa – Atlah jáne Ańyraqaı shaıqastary týraly qundy dúnıeler kórinis tabady. Budan bólek, jaǵalaý, toǵan jáne jasandy sarqyrama salý da kózdelip otyr. Taǵy bir úlken joba – "Qarasý" alqabynda "Densaýlyq" saıabaǵy boı kóteredi. Saıabaqta birneshe sport alańdary, velosıped jolaǵy jáne workout alańshalary ashylady dep kútilýde. Sondaı-aq, Taraz qalasynda boı kóteretin "Anaǵa taǵzym" erekshe ǵımaraty da kóne shahardyń kórikti jerleriniń birine aınalady. Qazirgi tańda analardyń qurmetine arnalǵan eskertkishtiń maketi ázirlenýde. Sonymen qatar, Qazaq handyǵynyń 550 jyldyǵyna arnalǵan eskertkish mańynda etnoaýyl paıda bolady. Jýyrda "Arbat-3" jaıaý júrginshiler alleıasynyń qurylys jumystary aıaqtalyp, biregeı sándik elementter men jaryqtarmen bezendirilgen alleıa Taraz qalasynyń kórikti jerleriniń birine aınalady.
Jambyl oblysy
