Máselen, «Embimunaıgaz» AQ qoǵammen baılanys qyzmetiniń habarlaýynsha, maýsymnyń basynan beri Jylyoı aýdanyndaǵy Tereń-О́zek, Qısymbaı, Qyzylqoǵa aýdanyndaǵy Kenbaı ken oryndarynda «Embimunaıgazdyń» 62 jáne merdiger kompanııalardyń 55 qyzmetkerinen koronavırýs anyqtalyp otyr. Buǵan qosa, mindetti skrınıng kezinde «Embimunaıgazdyń» 19 jumysshysynan da vırýs juqtyrý jaǵdaıy tirkeldi. Barlyq jumysshylar qajetti em alý úshin Qulsary jáne Atyraý qalalaryndaǵy juqpaly aýrýlar aýrýhanalaryna jatqyzyldy. Sımptomsyz aýyryp jatqan jumysshylar otbasynyń ózge múshelerinen oqshaýlanyp, úı karantınine ornalastyrylypty. Al úıde oqshaýlaý talaptaryn saqtaýǵa múmkindigi joq adamdar Atyraý qalasynyń Bereke shaǵyn aýdanyndaǵy arnaıy jabdyqtalǵan úılerde karantınde jatyr. PTR-testeri teris nátıje kórsetken jumysshylar jumys oryndarynda baqylaýǵa alyndy.
Osyndaı derekterdiń tirkelýimen Qyzylqoǵa aýdanyndaǵy Mııaly aýylynda karantın, Muqyr aýylyna shekteý engizildi. Al Jylyoı aýdanynda karantın merzimi 2 shildege deıin sozyldy. Qurmanǵazy aýdanynyń Aqkól aýyly da karantınge jabyldy. Tipti Atyraý qalasynda indetti juqtyrýshylar qatary kóbeıip barady. Qazir koronavırýs ınfeksııasy Atyraý qalasy men barlyq aýdanda tirkelip, jalpy sany 1362-ge jetti.
Qaýipti indet adamnyń jasyna da, atqaratyn jumysyna da qaramaıtyny ańǵarylyp otyr. Osyǵan dálel retinde birneshe mysaldy alǵa tartýǵa bolady. Birinshiden, atyraýlyqtardy saqtyq sharalaryn qatań saqtaýǵa úndegen burynǵy bas memlekettik sanıtarlyq dáriger Temirbek Musaǵalıevtiń ózi de koronavırýstyń «qaqpanyna» túskenin áleýmettik jeli arqyly habarlady. Ol qazir Ulttyq saraptama ortalyǵynyń Atyraý oblystyq fılıalyn basqarady.
– Men tapsyrǵan PTR-test qorytyndysy oń nátıje kórsetti. Men sanıtarlyq qorǵanys talaptaryn qatań saqtap, maska taqtym, qolǵap kıdim. Qolyma dezınfeksııa júrgizdim. Sizder sekildi koronavırýstyń meni aınalyp ótetinine senimdi edim. Biraq olaı bolmaı shyqty. Vırýs qalaǵa kirdi, – dep jazdy Temirbek Musaǵalıev.
Qazir bul fılıalda dırektordan ózge taǵy 13 adamnyń indetke shaldyqqany anyqtaldy. Olardyń bári ákimshilik personalda jumys istegendikten, osyndaǵy zerthanaǵa qatysy joq bolyp shyqty. Al ortalyq ǵımaratta dezınfeksııa júrgizilip, zerthana qalypty rejimde jumysyn jalǵastyrýda.
Oblystyq densaýlyq saqtaý basqarmasy basshysynyń orynbasary Gúlnafıs Tańbaevanyń málim etýinshe, 180 kereýetke eseptelgen ınfeksııalyq stasıonarda 193 pasıent em alyp jatyr. Jansaqtaý bóliminde jatqan jeti pasıenttiń úsheýiniń jaǵdaıy aýyr dep baǵalanyp otyr.
– Qazir №2 oblystyq ınfeksııalyq aýrýhanadaǵy ınfeksııalyq stasıonar naýqastarǵa tolyp boldy. Sol sebepten, kelesi aptada Mahambet aýdanynan ınfeksııalyq stasıonar ashýdy josparlap otyrmyz, – deıdi Gúlnafıs Tańbaeva.
Sońǵy bir aptada qaýipti indetke shaldyqqan bes adam kóz jumdy. Jalpy, qaıtys bolǵandar – 8 adam. Mine, osyndaı sebepter Atyraý qalasy men Atyraý oblysy aýmaǵynda karantındik shekteý sharalarynyń qoldanylýy epıdemııalyq jaǵdaı tolyq turaqtanǵanǵa deıin sozýǵa sebep bolyp otyr.
Atyraý oblysynyń bas memlekettik sanıtarlyq dárigeri Amantaı Jumaǵalıev qol qoıǵan qaýlyǵa sáıkes, endi turǵyndar men jeke kólikterdiń túngi saǵat 23:00-den tańǵy 06:00-ge júrýine bolmaıdy. Sondaı-aq oıyn-saýyq, sporttyq jáne basqa da buqaralyq is-sharalardy, otbasylyq, eske alý sharalaryn (banketter, úılený toılary, mereıtoılar, as berýler), sonyń ishinde úıde jáne adamdar kóp jınalatyn ózge de is-sharalardy ótkizýge, qoǵamdyq oryndarǵa, onyń ishinde alańdarǵa, saıabaqtarǵa, jaǵalaýlarǵa barýǵa, menshik nysanyna qaramastan barlyq mektepke deıingi balalar uıymdarynyń qyzmetine tyıym salynyp otyr. Qala syrtyndaǵy saýyqtyrý ortalyqtarynyń jáne mektep janyndaǵy lagerlerdiń, kınoteatrlardyń, teatrlardyń, kórmelerdiń, ınternet pen kompıýterlik oıyn klýbtarynyń jáne adamdar kóp shoǵyrlanatyn basqa da nysandardyń qyzmeti toqtatyldy. Sonymen birge dinı nysandar qyzmetine jáne halyqtyń onda barýyna tyıym salyndy.
Ázirge epıdemııalyq ahýaldyń qashan turaqtalatyny, soǵan oraı karantındik shekteý sharalarynyń qashanǵa deıin sozylatyny belgisiz. О́ıtkeni turǵyndar arasynda qaýipti indetke shaldyǵý toqtar emes. Al turǵyndardyń ózderinen áli de saqtyq sharalaryna nemquraıdy qaraý men beıqamdyq baıqalady. Teginde jaqynyńa janashyr bolý qajettigin árkimniń uǵynǵany jón ǵoı.
Atyraý oblysy
