Qazaqstanda memlekettik qyzmettiń bedeli jyldan jylǵa artyp keledi. Memlekettik qyzmetkerlerdiń basty mindeti – azamattarǵa kómek kórsetý, olardyń máselelerin sheshý.
"Bala kezimnen el úshin keıingi urpaqqa jaýapkershilik ala biletin adamdarǵa qyzyǵatynmyn. Olarǵa qarap boı túzeıtinmin. Kúnine myń qubylǵan myna ǵalamda ýaqyt pen jastarǵa ilesý kún saıyn bir chellendjden ótý sekildi. Siz ózińizge senip, jumysyńyzdy jaqsy kórip isteseńiz, esh nárse qıyn emes. Biz úshin árbir jastyń jetistigi – elimizdiń jetistigi. Men óz urpaǵymyz ómir súretin memleket qalyptastyrýǵa, onyń bolashaǵyn nyǵaıtýǵa úles qosyp jatqanymdy maqtan tutamyn. Memlekettik qyzmetpen qatar úlgili áke, qamqor jar bolý – meniń mártebeli mindetim. "Otandy súıý - otbasynan bastalady" demekshi, balalaryma tárbıeni jeke mysalmen kórsetip, ispen dáleldegim keledi", deıdi Nur-Sultan qalalyq Jastar saıasaty basqarmasynyń bólim basshysy Baqytjan Júnisbekov.
2020 jylǵy 1 sáýirdegi esep boıynsha Nur-Sultanda 66 Memlekettik organ bar. Onyń ishinde jergilikti atqarýshy organdar sany – 28, ortalyq memlekettik organdardyń 38 aýmaqtyq bólimshesi bar. Nur-Sultandaǵy memlekettik organdardaǵy shtattyq jıyntyq 92% bolsa, onyń ishinde jergilikti atqarýshy organdar – 93,7% -dy quraıdy.
Nazar aýdaratyn másele memlekettik qyzmette erlerge qaraǵanda áıelder kóp. Názik jandar – 2 168 nemese 62,1%, erler – 1 316 nemese 37,9% kórsetkishke ıe. Memlekettik qyzmetshilerdiń 3 272-si nemese 94%-y joǵary bilimdi. Onyń ishinde memlekettik qyzmet akademııasyn bitirgen 45 adam ( 1,3%) jáne "Bolashaq" baǵdarlamasynyń 20 túlegi (0,6%) bar. Jas kórsetkishi boıynsha basym bóligi 30-39 jas aralyǵyndaǵy 1 241 adam (35,7%) qyzmet etedi.
Memlekettik qyzmettegi ortasha eńbek ótili – 9,3 jyl, al ortasha jasy – 34,4 jasty quraıdy.
