Qoǵam • 25 Maýsym, 2020

Qazaqstannyń esebi Eýrokomıssııanyń Ushý qaýipsizdigi komıtetinde qaraldy

4 ret kórsetildi

Maýsym aıynda Eýropalyq komıssııa Eýropalyq odaq elderine ushýǵa tyıym salynǵan áýe kompanııalardyń jańartylǵan tizimin jarııalady, - dep habarlady IIDM baspasóz qyzmeti.

Buǵan deıin Brıýssel qalasynda (Belgııa) Eýropalyq komıssııanyń Ushý qaýipsizdigi jónindegi komıtetin Eýropaǵa ushýǵa tyıym salynǵan áýe tasymaldaýshylar tizimin jańartý máselesi boıynsha tyńdaý ótti, onyń barysynda qazaqstandyq áýe kompanııalary máselesi qaraldy.

Bek Eır áýe kompanııasynyń ushaǵymen bolǵan apattan keıin Eýropalyq komıssııa Qazaqstan Respýblıkasynyń avıasııalyq bıliginiń eldegi ushý qaýipsizdigin tıimdi baqylaý men qadaǵalaýdy qamtamasyz etý qabiletine alańdaýshylyq bildirdi. 2020 jylǵy 14 aqpanda Eýropalyq komıssııa eldiń avıasııalyq bılikteriniń uıymdyq qurylymyn ózgertý boıynsha júrgizilip jatqan jumys týraly, sońǵy úsh jyldaǵy sala sýbektilerine júrgizilgen baqylaý-qadaǵalaý qyzmetiniń nátıjeleri týraly jáne negizgi jolaýshylar áýe tasymaldaýshylarynyń (Eır Astana, SKAT jáne Bek Eır) ushý qaýipsizdiginiń jaǵdaıy týraly resmı suranys jiberdi.

28 aqpanda Azamattyq avıasııa komıteti Qazaqstannyń avıasııalyq ákimshiligimen birlesip, 2019 jyldyń 1 tamyzynan bastap brıtandyq basqarý modeline jáne aldyńǵy qatarly eýropalyq elderinde negizdelgen azamattyq avıasııa salasyn retteýdiń jańa tásilin iske qosý týraly aqparatty usyndy. Salany basqarýdyń jáne ushý qaýipsizdigin qamtamasyz etýdiń osy transformasııasy Ult josparynyń 68-qadamynyń aıasynda júzege asyrylýda.  Sonymen qatar, Eýropalyq komıssııaǵa eldegi ushý qaýipsizdiginiń qazirgi jaǵdaıy jáne Bek Eır áýe kompanııasynyń tekserý nátıjeleri týraly aqparat berildi. Keıin, 2020 jylǵy 21 sáýirde Qazaqstannyń avıasııalyq ákimshiligi Bek Eır áýe kompanııasynyń paıdalanýshy sertıfıkatyn qaıtaryp alǵany týraly jáne Azee Air áýe kompanııasynyń paıdalanýshy sertıfıkatyn ýaqytsha toqtatý týraly habarlady.

Sonymen qatar Qazaqstannyń avıasııalyq ákimshiliginiń bas dırektory P.Grıffıtstiń Eýropalyq komıssııa ókilderimen kezdesýi ótti, kóterilgen máselelerdi talqylaýǵa arnalǵan telekonferensııalar ótkizildi.

Esep qorytyndysy boıynsha Eýropalyq komıssııa QR IIDM Azamattyq avıasııa komıtetiniń tóraǵasynyń atyna qabyldanǵan sheshim týraly hat joldady.

Zerttelgen aqparatqa súıene otyryp, Eýropalyq komıssııa búgingi tańda qazaqstandyq áýe kompanııalardy Eýropalyq odaqqa ushýǵa tyıym salynǵan áýe tasymaldaýshylar tizimine ("qara tizim") engizýge negiz joq dep sheshim qabyldady.

Azamattyq avıasııa komıteti jáne Qazaqstannyń avıasııalyq ákimshiligi Eýropalyq komıssııamen jáne Ushý qaýipsizdigi jónindegi eýropalyq agenttikpen (EASA) eldegi ushý qaýipsizdigin baqylaý jáne qadaǵalaý júıesin uıymdastyrýdy eýropalyq standarttaryna keltirý jáne Amerıka Qurama Shtattaryna ushýǵa arnalǵan Federaldyq avıasııa ákimshiliginiń (FAA) 1-sanatyn alý arqyly Qazaqstanda ushý qaýipsizdigin qamtamasyz etý deńgeıin arttyrý úshin birlesken jobany iske asyrýdy josparlap otyr.

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar