Qazaqstan • 25 Maýsym, 2020

Múmkindigi shekteýli jandarǵa áleýmettik qoldaý sharalary kúsheıtiledi

584 ret kórsetildi

Bul týraly Prezıdent janyndaǵy Ortalyq kommýnıkasııalar qyzmetinde onlaın rejıminde ótken halyqqa esep berý kezdesýi barysynda Eńbek jáne halyqty áleýmettik qorǵaý mınıstri Birjan Nurymbetov málimdedi, - dep habarlaıdy Egemen.kz.

Qazaqstanda 697,6 myń múgedektigi bar adam turyp jatyr. 2020 jyly Qazaqstanda múgedektigi bar adamdardy áleýmettik qoldaýǵa arnalǵan shyǵyndar 10%-ǵa, tehnıkalyq ońaltý quraldarymen jáne arnaýly áleýmettik qyzmettermen qamtamasyz etýdi qarjylandyrý 17%-ǵa ósti. 

Eńbekmıniniń basshysy múgedektigi bar adamdarǵa qoldaý kórsetý mınıstrlik jumysynyń eń basty degen basymdyqtarynyń biri bolyp tabylatyndyǵyn atap ótti. Máselen, erekshe qajettilikteri bar adamdardy áleýmettik qoldaýdy kúsheıtý jáne olardy qoǵam ómirine tartý maqsatynda 19 normatıvtik-quqyqtyq aktige ózgerister engizilgen.

"2020 jyly Áleýmettik qyzmetter portaly iske qosyldy. Onyń kómegimen múmkindigi shekteýli adamdar ónim jetkizýshilerden tehnıkalyq qalpyna keltirý quraldaryna (budan ári – TQKQ) jáne arnaýly áleýmettik qyzmetterge (budan ári – AÁQ) tikeleı tapsyrys bere alady. Portalda qazirdiń ózinde TQKK 24 túri ornalastyrylǵan, al portaldyń tolyq iske qosylýy 2021 jylǵa josparlanyp otyr. Budan basqa emdeý-shıpajaılyq em alý merzimi de retteledi (14 kúntizbelik kún). Múgedekterdiń ótinishi boıynsha jeke kómekshilerge aqy tóleýdiń biryńǵaı tártibi belgilendi. Kohlearlyq ımplanttardy qaıtarý mindettemesi olardan alynyp tastaldy; múgedektik toby merzimi shekteýsiz belgilenetin, orny tolmaıtyn anatomııalyq aqaýlardyń tizbesi keńeıtildi; eresekterge 5 jylǵa múgedektik belgilenetin aýrýlardyń tizbesi bekitildi. Medısınalyq-áleýmettik saraptamany syrttaı júrgizýge kezeń-kezeńimen kóshý josparlanýda", - dedi Birjan Nurymbetov.


Mınıstrdiń málimetinshe, múgedektigi bar adamdardy áleýmettik qoldaýdy qarjylandyrý 10% -ǵa ósti jáne 2019 jylǵy 315 mlrd teńgemen salystyrǵanda, 2020 jyly 347 mlrd teńgeni quraǵan.  TQKQ jáne AÁQ-men qamtamasyz etýdi qarjylandyrý 17%-ǵa artyp, 2019 jylǵy 86 mlrd teńgege qaraǵanda, 101 mlrd teńgeni qurady. Sonymen qatar mınıstr, aldaǵy jyldary múgedektigi bar jandardyń ekonomıkalyq belsendiligi úshin múmkindikter jasaý negizgi basymdyq retinde belgilengenin atap ótti.

"Búginde Qazaqstanda eńbekke qabiletti múgedektigi bar adamdardyń jalpy sanynyń tórtten bir bóligi ǵana eńbek qyzmetimen aınalysady. EYDU elderinde bul kórsetkish 40%-ǵa jetedi. Kelesi eki jyl ishinde aldymyzǵa múgedektigi bar adamdardyń jumyspen qamtylýyn 30%-ǵa jetkizý mindetin qoıdyq. Ol úshin qosymsha 20 myń adamdy jumyspen qamtý qajet. Múgedektigi bar adamdarmen, úkimettik emes uıymdarmen jáne jumys berýshilermen birge múgedekterdi ekonomıkalyq qyzmetke tartýǵa kedergi bolatyn negizgi túıtkilderdi jáne olardy sheshý joldaryn anyqtadyq", - dedi Birjan Nurymbetov.

Sońǵy jańalyqtar

Uqsas jańalyqtar