Aýdan ákiminiń baspasóz hatshysy Amanjol Erenulynyń aıtýynsha, oqýshylar onlaın formatta esse jazyp, fızıka, matematıka, aǵylshyn tilinen jeke tapsyrmalar oryndaǵan. Nátıjesinde ekinshi irikteý týrynyń qorytyndysy boıynsha joǵary nátıje kórsetken 3 oqýshy respýblıkalyq kezeńge joldama alady.
"Sharaǵa Nur-Sultan qalasynan "IQanat bilim qory" qoǵamdyq qorynyń dırektory Aıjan Sadyqova arnaıy qatysyp, oqýshylarǵa sáttilik tiledi, - deıdi Amanjol Erenuly. - Birinshi kezeńniń jeńimpazy dep tanylǵan jáne ekinshi kezeńge qatysýshy oqýshylarǵa sertıfıkattar men syılyqtaryn tabys etti. Sonymen qatar byltyrǵy jylǵy qatysýshylarynan Pavlodar oblysynan joǵary kórsetkish kórsetken 5 oqýshy resmı volonter atandy. Bul 5 oqýshynyń ishinen 2 oqýshy - bizdiń aýdanymyzdan Aqqýly jalpy orta bilim beretin mektebiniń 10-synyp oqýshylary Dılnaz Valıhanova ben Anel Hamıt. Olarǵa "IQanat bilim qory" qoǵamdyq qorynyń dırektory volonter kitapshasyn tabys etti.
Aıta keterligi, IQanat olımpıadasy aýyl mektepteriniń 9-synyp oqýshylaryna arnalǵan respýblıkalyq baǵdarlamasy – qazaqstandyq mesenattardyń bilim berý salasyndaǵy jobasy. Baǵdarlamanyń maqsaty – aýyl mektepteriniń oqýshylaryn ulttyq jáne shetel ýnıversıtetterine túsýleri úshin qoldaý, yntalandyrý.
