Qoǵam • 25 Maýsym, 2020

Áleýmettik-eńbek salasyndaǵy barlyq qyzmetter elektrondyq formatqa kóshiriledi

17 ret kórsetildi

2020 jyldyń sońyna deıin áleýmettik-eńbek salasyndaǵy qyzmetterdiń 100%-n elektrondyq formatqa kóshirý josparlanýda. Bul týraly Prezıdent janyndaǵy Ortalyq kommýnıkasııalar qyzmetinde onlaın rejımde ótken halyqqa esep berý kezdesýinde Eńbek jáne halyqty áleýmettik qorǵaý mınıstri Birjan Nurymbetov málim etti, - dep habarlady mınıstrliktiń baspasóz qyzmeti.

Birjan Nurymbetov óz sózinde Eńbek jáne halyqty áleýmettik qorǵaý mınıstrligi sıfrlandyrý deńgeıi boıynsha jetekshi memlekettik organdardyń biri bolyp tabylatynyn atap ótti. Tek 2019 jyldyń ózinde ǵana áleýmettik-eńbek salasyndaǵy kórsetiletin qyzmetterdi elektrondyq formatqa aýystyrý 2,2 mlrd teńgeni únemdeýge múmkindik berdi.

Búgingi kúni Eńbekmıni birqatar mańyzdy jobalardy júzege asyrýda. Olardyń ishindegi eń mańyzdysy – Qazaqstan halqynyń 100%-y, ıaǵnı 7 mln otbasy qamtylǵan "Otbasynyń áleýmettik kartasy". Osy áleýmettik karta árbir otbasy qandaı ómirlik jaǵdaıda ekenin, kúrdeli nemese daǵdarys ahýaldan shyǵarý boıynsha jumys algorıtmin kórsetedi.

"Áleýmettik kartalardy qalyptastyrǵannan keıin kúrdeli jáne daǵdarys jaǵdaıynda bolǵan 101 myń otbasy anyqtaldy. 12,7 myń adamdy jumysqa ornalastyrý, 68,8 myń azamatty emhanalarǵa tirkeý, 72,9 myń balany balabaqshalar men mektepterge tirkeý boıynsha sharalar qabyldandy. 1451 otbasy kúrdeli jáne daǵdarys jaǵdaıynan shyǵaryldy", – dedi Birjan Nurymbetov.

Taǵy bir mańyzdy joba "Qazaqstan azamatynyń áleýmettik ID" jobasy bolyp tabylady. Bul joba áleýmettik járdemaqy alýdyń ashyqtyǵyn, yńǵaılylyǵyn arttyrýǵa baǵyttalǵan. Áleýmettik ID bul ataýly áleýmettik kómek, qoǵamdyq kólikte jeńildikpen jol júrýdi tóleýdi, kópbalaly jáne tabysy az otbasylardyń balalaryna mektepterde tegin tamaqtanýdy kózdeıdi.

"Bul jobanyń pılottyq nusqasy Respýblıkanyń 9 óńirinde iske asyryldy. 102 myń ID-karta berildi, 88 myń tranzaksııa júrgizildi. Bolashaqta biz bul jobany barlyq óńirlerde tolyǵymen qoldanýdy josparlap otyrmyz", – dedi Eńbekmıniniń basshysy.

Jumyspen qamtý jáne jumysqa ornalastyrý salasynda "Elektrondyq eńbek bırjasy" (budan ári – EEB) jáne "Elektrondyq eńbek sharttary" jobalary iske asyrylýda.

Búgingi tańda EEB – bul 214 myń jumys berýshi, mıllıondaı jumys izdeýshi, Coursera onlaın bilim berý platformasy arqyly 1,5 myń saǵatqa jýyq tegin sabaqtar.

"EEB arqasynda 1,2 mln-nan astam adam jumys taba aldy, olardyń ishinde 868 myń adam turaqty jumys oryndaryna, 341 myńy ýaqytsha jumysqa ornalastyryldy", – dep atap ótti mınıstr.

"Elektrondyq eńbek sharttary" jobasyna 35 myń uıym qosylǵan. Endigi 1,4 mln elektrondyq shart tirkeldi, bunyń ózi jumyskerlerdiń eńbek quqyqtaryn qorǵaýǵa yqpal etetin bolady.

"2019 jyldyń basynda memlekettik qyzmetterdi avtomattandyrý bóliginde elektrondyq qyzmetterdiń úlesi 42%-dy qurap edi, 2019 jyldyń qorytyndysy boıynsha ol 83%-ǵa artty. Bundaı ósimge Egov portalyndaǵy  6 memlekettik kórsetiletin qyzmetti ornalastyrý jáne 10 qyzmetti belsendi formatqa aýystyrý arqyly qol jetkizildi. 2020 jyldyń sońyna deıin biz elektrondyq qyzmetterdiń úlesin 100%-ǵa jetkizýdi josparlap otyrmyz", – dep túıindedi óz sózin Birjan Nurymbetov.

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar