ERG baspasóz qyzmetiniń habarlaýynsha, indet taraǵan osy bir qysyltaıań shaqta da Eýrazııalyq top áleýmettik saladaǵy qaıyrymdylyq jobalaryn qarjylandyrýdy jalǵastyra beredi. Mysaly, kompanııa áleýmettik qoldaý bastamasy arqyly erekshe oıyn alańyn salýǵa 8 mln teńge jumsady. Dástúrli Innovatorlar forýmynyń baǵdarlamasyndaǵy «Áleýmettik jobalar» baıqaýynda kompanııa qyzmetkerleri ózderi turyp jatqan qalanyń, qalaǵa qarasty aýyldyq aýmaqtyń áleýmettik máselelerine arnalǵan jobalaryn usynady. Baıqaý sharty boıynsha «Úzdik» jáne «Erekshe» dep baǵalanǵan jobalar ǵana júzege asyrylady.
– Biz turatyn turǵyn úı kesheniniń aýlasy keń. Ár páterden shyǵatyn kishkentaı balalar da kóp. Biraq ókinishke qaraı, aýladaǵy balalardyń oıyn alańy ábden tozǵan edi. Átkenshekteri synǵan, syrǵanaqty tot basyp, tipti oryndyqtar da qalmaǵan. Mine, osy másele ata-analardy alańdatyp, kóptiń kóńilinde júretin, – deıdi zaýyt qyzmetkeri Jan Azanbaev.
Jan bastaǵan turǵyndar oılana kele osy jobany qolǵa aldy. Aýla balalardyń jas erekshelikterine saı arnaıy aýmaqtarǵa bólindi. Sátin salyp, joba baıqaýda «Úzdik» ári «Erekshe» atalymynda jeńimpaz atandy. Búginde bul joba iske qosylyp, jarqyrap, jaınap tur. Balalardyń da, ata-analardyń da qýanyshynda shek joq. Erekshe alań balalardyń kúlkisine tolyp, alańsyz oınaýlaryna óte yńǵaıly boldy.
– Tipti bormen sýret salýǵa arnalǵan stend, strıtbol alańy, búldirshinderge arnalǵan mýzykalyq stend pen vorkaýt-kesheni de bar, – deıdi J.Azanbaev.
Taǵy bir ereksheligi, bul otbasylyq alańǵa aınaldy: balalarmen qatar eresekterdiń de sportpen aınalysatyn trenajerler jıyntyǵy ornatyldy. Aýmaq abattandyrylyp, oryndyqtar men qoqys jáshikteri, beınebaqylaý júıesi qoıyldy. Iá, alyp kásiporyndar óńir turǵyndary aldyndaǵy áleýmettik jaýapkershiligin tótenshe jaǵdaı kezindegi qıyndyqtarǵa qaramastan oryndaýda. Bıyl ERG men ákimdik arasynda toptyń «Týǵan jeri» sanalatyn óńirlerge jalpy quny 6,8 mlrd teńgeden asatyn áleýmettik mańyzdy jobalardy birlese júzege asyrý týraly memorandýmdar jasalǵan. 2001-2019 jyldar aralyǵynda Eýrazııalyq top quıǵan áleýmettik ınvestısııalardyń jalpy kólemi 272,5 mlrd teńgeden asqan. Sonymen birge respýblıkalyq «Biz birgemiz» qoryna 4,6 mlrd teńge, Túrkistan oblysy Maqtaaral aýdanynda apattan zardap shekkenderge 2 mlrd teńge kóleminde járdem bergen.
Pavlodar oblysy,
Aqsý qalasy
