Aımaqtar • 26 Maýsym, 2020

Gúlshara Ábdiqalyqova BAQ qyzmetkerlerin kásibı merekesimen quttyqtady

13 ret kórsetildi

Qyzylorda oblysynyń ákimi Gúlshara Ábdiqalyqova BAQ qyzmetkerlerin kásibı merekesimen quttyqtady, - dep habarlaıdy oblys ákimdiginiń baspasóz qyzmeti.

"Sizderdi búgingi Buqaralyq aqparat quraldary qyzmetkerleri kúnimen quttyqtaımyn! Elbasy Nursultan Ábishuly Nazarbaev "Aqparattyq sala – qazirgi zamanǵy mádenıettiń jahandyq jáne naqty ulttyq ólshemindegi bólinbes bólshegi" - degen bolatyn. Tehnologııalardyń qaryshtap damýy álemdegi aqparat almasý jyldamdyǵyn eselep arttyryp, medıa saladaǵy básekelestikke ákeldi, ári jýrnalıst mamandyǵyna aıryqsha jaýapkershilik júktedi.

Qazirgi qoǵam úshin jýrnalıst jedeldik pen shynaıylyqty, ıkemdilik pen biliktilikti boıyna sińirgen, máseleni jan-jaqty zerttep, taldap, kórermen men oqyrman nazaryna usynatyn kásibı, ámbebap maman.

Sizder ǵalamdyq damý kóshine ilesý maqsatymen elimizde jáne óńirimizde jasalyp jatqan tyń reformalardy halyqqa túsindirip, nasıhattaý arqyly aımaǵymyzdyń damýyna aqparattyq qoldaý kórsetip kelesizder.

Memleket basshysy Qasym-Jomart Kemeluly Toqaevtyń tapsyrmasyna sáıkes byltyr Úkimet qaýlysymen Buqaralyq aqparat quraldary qyzmetkerleriniń kúni bekitildi.

Topyraǵy kıeli Syr óńirin memleketshil, halyqshyl jýrnalısterdiń altyn ustahanasy dep atasaq, qatelespeımiz. Aımaq jýrnalıstıkasynyń qalyptasýy men damýyna eleýli eńbek sińirgenderdiń arasynan Asqar Toqmaǵanbetov, Qalqabaı Ábenov, Myrqy Isaev, Nurdildá Ýálıev, Evgenıı Han, Ahat Janaev, Sahıtjan Bermaǵanbetovti jáne t.b. atap óter edim.

Pandemııamen kúres kezinde qaýip-qaterdi elemesten, halyqqa qajetti aqparatty der kezinde jetkizip, tynbaı atqarǵan qyzmetterińiz úshin Syr eli halqy atynan zor rızashylyǵymdy bildiremin.

El ómiriniń árbir jetistigin óz jetistigim dep bilip, qıyndyǵyna júregimen berilip, árbir sátti qalt jibermeýge tyrysatyn barsha baspasóz, teledıdar, radıo, ınternet basylymdary qyzmetkerleriniń eńbegine shyǵarmashylyq tabys tileımin.

Jetkizer jaqsylyqtaryńyz taýsylmasyn, qalamdaryńyz muqalmasyn! Elimiz tynysh, jurtymyz aman bolsyn! Jaqyndaryńyzǵa janashyr bolyńyz! Biz birgemiz!" - delingen Gúlshara Ábdiqalyqovanyń quttyqtaýynda.

Sońǵy jańalyqtar

Uqsas jańalyqtar