Aımaqtar • 26 Maýsym, 2020

Jol salasynda maman tapshy

28 ret kórsetildi

Qazaqstanda jol salasynda maman tapshy. Resmı derekterge súıensek, avtomobıl joldaryn salý jáne jóndeý jumystaryna 3 myńdaı adam qajet eken. Bul týraly "Jol aktıvteriniń ulttyq sapa ortalyǵy" RMK MOF baspasóz qyzmetine silteme jasaı otyryp Egemen.kz habarlaıdy.

Quzyrly mekemeniń barlyq fılıaldaryna jol sheberleri, ınjener-smetashy, zerthanashylar, jol ınjenerleri, avtogreıder júrgizýshileri men mehanızatorlar jetispeıdi. Bir qýantarlyǵy, sońǵy jyldary otandyq joǵary oqý oryndary men kolledjderde jol salasy mamandaryn daıarlaý isi jańadan qarqyn aldy. Bul salaǵa memleketten jyl saıyn grant bólinedi. Máselen, 2019-2020 oqý jylyna 9750 grant qaralyp otyr.

Shahmardan Esenov atyndaǵy Kaspıı memlekettik tehnologııalar jáne ınjınırıng ýnıversıeteti men Halel О́zbekǵalıev atyndaǵy Mańǵystaý polıtehnıkalyq kolledjimen Mańǵystaý oblysyndaǵy jol sapasyn baqylaý ortalyǵy áriptestik baılanys ornatqan. Oǵan bıyl 4-shi kýrs oqıtyn eki stýdenttiń fılıal ǵımaratynda aqyly óndiristik tájirıbeden ótip jatqanyn dálel retinde aıtýǵa bolady.

Nartaı Ýrynbaev pen Orazaly Aqylbekov esimdi jastar joldan burǵylanyp alynatyn synamalardy (kern) zerthanalyq jaǵdaıda tekserý, olardyń tyǵyzdyǵy men basqa da tehnıkalyq talaptarǵa sáıkes kelýin baqylaý jumystaryn kórip qana qoımaı, óz qoldarymen atqaryp ta júr.

"Jol salasynyń mamany atanýdy mektepte oqyp júrgen shaǵymda maqsat etip alǵa qoıdym. Shúkir, búginde armanym oryndaldy. Buıyrsa, oqýymdy aıaqtaǵan soń "Jol aktıvteriniń ulttyq sapa ortalyǵy» Mańǵystaý fılıalyna jol zerthanashysy bolyp qyzmetke turýdy qalaımyn. Qazirgi tańda biraz tájirıbe jınaqtap qaldym. Bir jaǵynan óndiriste júrgenim úshin qomaqty aqy da tólenedi. Keleshek osy ujymnyń bir múshesi bolǵym keledi", deıdi Nartaı Ýrynbaev.

"Jol aktıvteri ulttyq sapa ortalyǵy" RMK bas dırektory Zamır Saǵynovtyń bastamasymen 2020 jyly "1000 mektep" naýqany bastaldy. Kózdelgen maqsat − mektep bitirýshilermen tikeleı kezdesý ótkizip, jol mamandyǵyna tartý.

"Karantın bastalǵanǵa orta bilim berý mekemelerine ortalyqtyń jol ınjenerleri, zerthanashylary men kartograf-dıezıst mamandary baryp, búgin oqýshy − erteńgi jas mamandarmen júzdesti. Sanepıdemıologııalyq jaǵdaı turaqtalǵan soń, bul jumystar jańa qarqynmen jalǵasady. Mańǵystaý oblysynda 154 mektep bolatyn bolsa, bizdiń ujym qyzmetkerleri 26 orta bilim berý ordasyna baryp, 9-11 synyp oqýshylarymen kezdesti. Bul jerde Aqtaý qalasynan bólek, ortalyqqa jaqyn turǵan Munaıly jáne Túpqaraǵan aýdandary da qamtyldy", deıdi fılıal dırektory Eltaı Taıalıev.

Tanymdyq kezdesýlerde oblysta salynyp jatqan kólik joldarynyń sapasyn baqylaý aıtylyp, jol mamandyqtary týrasynda jan-jaqty túsinik berildi.

Sońǵy jańalyqtar

Uqsas jańalyqtar