Aımaqtar • 27 Maýsym, 2020

Qaraǵandy oblysynda búginnen bastap karantın rejimi qatańdatyldy

463 ret kórsetildi

Kenshiler astanasynda Saryarqa telearnasynyń efırinde ótken brıfıngte óńirdiń bas memlekettik sanıtarlyq dárigeri Qanat Asqarov Qaraǵandy oblysynda 27 maýsymnan bastap karantındik shekteýlerdiń kúsheıtiletinin málimdedi, – dep habarlaıdy Egemen.kz

"Jaman tumaýdyń" Arqa tósindegi aryny tym-qatty-aq bolyp tur. Naqty aıtar bolsaq, indetke qatysty aýrýshańdyqtyń elimiz boıynsha ósimi 2,4 % bolsa, Qaraǵandy oblysyndaǵy kórsetkish 4,4 paıyzdy qurap otyr. Sol sebepti de, tyǵyryqqa tiregen mundaı jaǵdaıdyń jergilikti atqarýshy bılikti qatty alańdatyp turǵan jaıy bar.

Osyǵan oraı uıymdastyrylǵan brıfıng barysynda Qanat Asqarov joǵaryda aıtylǵan sheshimniń qandaı sebeptermen  qabyldanǵanyn egjeı-tegjeıli túsindirdi. Indettiń órshýine maskalyq rejım men áleýmettik qashyqtyqtyń saqtalmaýy birden-bir sebepker bolǵan. Iаǵnı turǵyndar karantın jaǵdaıynda qoıylatyn talaptardy tipti de eleń qylmaıdy eken. Qaýipsizdik erejelerin adamdardyń ózderi de, kásiporyndardyń ákimshiligi de saqtamaıtyn kórinedi.

"Arnaıy qurylǵan mobıldik toptar qyzmetin qaıta bastaǵan 153 nysandy teksergende, ol jerlerde bas memlekettik sanıtarlyq dáriger  qaýlysynyń talaptary buzylǵanyn anyqtady. Negizinen, mundaı jaǵdaılar  qoǵamdyq tamaqtaný, saýda, qoǵamdyq kólik nysandarynda anyqtaldy", – dedi Qanat Asqarov.

Mine, osyndaı kúrdeli jaǵdaıda koronavırýs ınfeksııasynyń ári qaraı taralýyna jol bermeý maqsatynda búginnen bastap qosymsha sharalar engiziletin boldy. Bir sózben aıtqanda, Qaraǵandy oblysy boıynsha karantın rejımi qatańdatylatyn boldy.

Atap aıtqanda, halyqqa qyzmet kórsetý ortalyqtary qysqartylǵan jumys kúni tártibine kóship, saǵat 09.00-den 14.00-ge deıin ǵana jumys isteıdi. Memlekettik qyzmetterdiń basym bóligi onlaın rejıminde usynylatyn bolady.

Qala ishinde qoǵamdyq kólikterdiń júrý ýaqyty shektelip, endi olar saǵat 06.00-den 21.00-ge deıin ǵana turǵyndarǵa qyzmet kórsete alady. Jolaýshylar salonǵa tek aldyńǵy esik arqyly ǵana kiretin bolady. Al shyǵar kezde barlyq esikter bir mezette ashylýy tıis. Bul talaptardyń saqtalýy qatań túrde baqylaýǵa alynatyn bolady.

Taksılerge tek bir jolaýshyny nemese kámeletke tolmaǵan eki balany ertip júrgen bir eresek adamdy ǵana tasýǵa ruqsat beriledi.

Aýrýdyń aıylyn jımaı turǵanyna otbasylyq túrli jıyndar, toı-tomalaq, eske alý is-sharalarynyń tyıylmaı turǵany da túrtki bolyp otyr degendi aıtady oblystyń bas memlekettik sanıtarlyq dárigeri. Munyń bári koronavırýs ınfeksııasy jaǵdaılaryna taldaý júrgizý barysynda málim bolǵan.

"Kóptegen jaǵdaıda naýqastar ózderiniń aýrý juqtyrýyn úı jaǵdaıynda, meıramhanalarda, dámhanalarda ótkiziletin túrli jappaı saltanatty, otbasylyq, eske alý is-sharalaryna qatysqandyǵymen baılanystyrady. Indet odan ári órshigen jaǵdaıda, amal joq, qoǵamdyq tamaqtandyrý nysandarynyń jumysyn úıge jetkizip berý rejımine aýystyrý máselesi qaralady", – dedi Qanat Asqarov.

Budan bólek, buryn engizilgen karantındik shekteý sharalary sol beti qalady. Máselen, 65 jastan asqan adamdarǵa asa qajetsiz kóshege shyǵý shektelgen. Jasy 14-ke deıingi balalardyń eresektersiz júrýine, otbasy múshelerinen basqa, úsh adamnan artyq adamdardyń jınalýyna tyıym salynady. Qoǵamdyq tamaqtaný nysandarynda kelýshilerdiń sany 30 adamǵa deıin shektelgen, áleýmettik ara qashyqtyq pen otyrǵyzý jáne jumys tártibi saǵat 08.00-den 22.00-ge deıin saqtalady. Buqaralyq (ujymdyq) is-sharalardy ótkizýge tyıym salynady. Sondaı-aq saýda-oıyn-saýyq ortalyqtarynyń, saýda úıleriniń (ortalyqtarynyń), azyq-túlik jáne azyq-túlik emes bazarlarynyń jumys kúnderi men demalys kúnderi jumys ýaqyty shekteýli. Demalys SOO, saýda úıleri jáne azyq-túlik emes dúkender saǵat 9.00-den 13.00-ge deıin jumys isteıdi. Bazarlar mindetti sanıtarlyq kúnge jabylady.

Oblystyń bas sanıtarlyq dárigeri betperde taǵýdyń dym kómegi joq degen aǵaıynnyń pikirine qarsy naqty dálelge negizdelgen ýáj aıtty.

"Betperdeni taǵyp júrý indet juqtyrýdyń aldyn alýǵa kómektesedi, – dedi ol. – Durys paıdalanǵan jaǵdaıda bul maska vırýs juqtyrǵan adamnyń silekeı shashyrandylaryn jibermeı ustap qalady. Sonymen qatar, ol kirlengen qoldary betine jıi tıetin adamdardyń aýyz ben muryn qýysy ishindegi shyryshty qabattaryn qorǵaıdy. Máselen, aýyrmaǵan adamnyń qolyna mıkrob tozańy juǵady da, onyń bylǵanǵan sol qoldary betine tıedi. Sodan baryp mıkroorganızm muryn, aýyz, kózdiń shyryshty qabattaryna juǵyp, álsiregen ımmýnıtettiń jaǵdaıynda organızmge túgel taraıdy".

Brıfıng sońynda Qaraǵandy oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Qanat Asqarov turǵyndardy karantındik shekteý talaptaryn qatań saqtaýǵa shaqyrdy.

 

Sońǵy jańalyqtar

Araq aýrýdan aıyqtyrmaıdy

Koronavırýs • 10 Shilde, 2020

Dáriger keńesin onlaın túrde alýǵa bolady

Koronavırýs • 10 Shilde, 2020

Pnevmonııaǵa basqa ataý berilýi múmkin

Koronavırýs • 10 Shilde, 2020

Qazir tek ómir men ólim bar - Bas sanıtar

Koronavırýs • 10 Shilde, 2020

Batysta "jasyryn esirtki zerthanasy" tabyldy

Aımaqtar • 10 Shilde, 2020

Koronavırýs indeti 3 kezeńnen turady

Koronavırýs • 10 Shilde, 2020

Uqsas jańalyqtar