Qoǵam • 29 Maýsym, 2020

IMD baǵasy: Kásipkerler ekinshi jyl qatarynan sybaılas jemqorlyqtyń tómendegenin atap ótti

19 ret kórsetildi

Osy aıda Halyqaralyq menedjmentti damytý ınstıtýtynyń (Institute for Management Development, Shveısarııa) álemdik básekege qabelettilikti zertteý ortalyǵy "IMD-2020" jahandyq básekege qabilettilik reıtınginiń nátıjelerin jarııalady, - dep habarlaıdy Egemen.kz.

Eldiń básekege qabilettiligi ulttyq ekonomıkanyń básekege qabiletti bıznes qalyptasatyn ortany jasaý jáne qoldaý qabiletimen qabyldanady.

Qazaqstan saýalnama negizinde qalyptasatyn jáne kásipkerlerdiń jemqorlyqty qabyldaýyn kórsetetin paraqorlyq pen jemqorlyqqa qarsy is-qımyl ındıkatory boıynsha ekinshi jyl qatarynan óz ornyn jaqsartty.

Bıyl baǵalaýǵa qatysqan 63 memlekettiń arasynda elimiz 29-dan 27-ge, ıaǵnı 2 orynǵa kóterilip, 10 balldyń 5,01 ballyn alyp, ortasha álemdik kórsetkishten (4,80) asty.

Bul elimizdiń osy reıtıngke qatysqan kezeńdegi eń joǵary nátıjesi (2018 jyly – 39 oryn jáne 3,43 b.; 2019 jyly – 29 oryn jáne 4,28 b.).

Qazaqstan bul talap boıynsha Polshadan (28 oryn), Izraılden (30), Ońtústik Koreıadan (31), Lıtvadan (32), Qytaıdan (33), Ispanııadan (39), Chehııadan (44), Reseıden (51) jáne t.b. joǵary ornalasqan.

Joǵaryda atalǵan jetistikter basqa 8 halyqaralyq reıtıng agenttikteriniń málimetterimen qosa Transparensı Interneshnldiń sybaılas jemqorlyqty túısiný ındeksiniń ballyn esepteý barysynda eskeriletinine nazar aýdaramyz.

Jalpy, bıznes júrgizýdegi jemqorlyqtyń birtindep tómendeýin Búkilálemdik banktiń "Enterprise Survey", Qazaqstandaǵy Transparensı Interneshnldiń "Sybaılas jemqorlyqtyń jaı-kúıine monıtorıngin" jáne  PRS "Eldik táýekelderdi baǵalaýyn" qosa alǵanda basqa agenttikter júrgizgen zertteýlerdiń nátıjeleri de aıǵaqtaıdy.

Osy turǵydan alǵanda Covid-19 pandemııasynyń áserinen álemde oryn alǵan qıyn jaǵdaıǵa qaramastan, ınvestısııalyq belsendiliktiń jandanyp jatqanyn atap ótken jón.

Sybaılas jemqorlyqqa qarsy is-qımyl Agenttigi men "Atameken" UKP óz taraptarynan otandyq jáne sheteldik ınvestorlardyń jalpy somasy 12 trln teńgeden astam 475  jobasyn súıemeldeı otyryp, kásipkerlerdi sybaılas jemqorlyq kórinisteri men ákimshilik tóreshiktikten qorǵaýdy jalǵastyrýda.

Jyl basynan beri Antıkor qylmystyq-quqyqtyq sharalar aıasynda laýazymdy tulǵalardyń bıznes júrgizýge zańsyz aralasýynyń 80-nen astam faktisin anyqtap, 200-ge jýyq kásipkerdiń quqyǵyn qalpyna keltirdi.

Sońǵy jańalyqtar

Uqsas jańalyqtar