"21 ǵasyrdyń Maıqy bıi – dep mártebe tutyp júrgen Janat Ahmadı aǵamyz da pánıden baqıǵa jol salypty. Qazynaly qarııa bolady-aý – dep júrgende, bu ketkeni ne etkeni?! Qazaq qalamgerleri men qabyrǵaly qalyń jurtqa qaıǵyra kóńil aıtamyn. Baladaı jetelep, danadaı qurmettep, qadir-qasıetin qaımaqtaı qalqytyp júrgen jeńgemizge qudaı qýat bersin", – dep jazdy Baqyt Bedelhanuly.
Janat Ahmadı 1943 jyly 15 qazanda Shyǵys Túrkistannyń Qulja gýbernııasy, qazirgi Ile Qazaq oblysyna qarasty Qorǵas aýdanynda Úsh Aqsý–Mazy degen jerde dúnıege kelgen. Qulja qalasyndaǵy 3 jyldyq sharýamaldárigerlik mektebi dep atalatyn tehnıkýmnyń zootehnıkalyq bólimin 1961 jyly tamamdaıdy.
1962 jyly atamekeni – Qazaqstanǵa keledi. Memlekettik Ortalyq Ulttyq muraǵatynda kishi ǵylymı qyzmetker, aǵa ǵylymı qyzmetker bolyp qyzmet istegen. 1995 jyldan beri taza shyǵarmashylyqpen aınalysyp edi.
2006 jyly Shyǵys Túrkistan, Úrimshi qalasy "Jas órender" baspasynan arab árpimen "Esengeldi bı" tarıhı romany, 2008 jyly "Kitap" baspasynan "Jarylǵap bı" tarıhı romany, 2009 jyly "Kitap" baspasynan "Qaradan týǵan han Nurabaı" tarıhı romany, "Ademprınt" baspasynan "Ýaqyt yrǵaǵy" atty resenzııa, ádebı syn maqalalar kitaby jaryq kórgen.
Halyqaralyq "Alash" ádebı syılyǵynyń laýreaty.
