1 shildeden bastap barlyq qurama komandalardyń oqý-jattyǵý jıyndary belgisiz merzimge toqtatyldy. Mundaı sheshim Qazaqstanda koronavırýs indetiniń órshýine jáne kóptegen iri halyqaralyq jarystardyń keıinge shegerilýine baılanysty qabyldanǵan.
Sonymen birge, qazirgi tańda jattyǵý jıyndaryn ótkizip jatqan komandanyń barlyǵy toqtatylyp, budan keıin josparlanǵan jıyndar ótpeıtin bolady.
"Mundaı sheshim qazirgi tańda jaǵdaıdyń ýshyǵýyna baılanysty qabyldandy. Osyǵan qaramastan birneshe qurama komandalar ózderiniń jattyǵý jıyndaryn oıdaǵydaı jaqsy ótkizip úlgerdi. Al keıbir komanda barlyq qatań talapty saqtana otyryp, sport nysandarynda jattyǵýdy jalǵastyrýda. Sportshylardyń densaýlyǵy birinshi orynda bolǵandyqtan, jaǵdaıdy eskerip, jattyǵý jıyndaryn toqtatqandy jón sanadyq. Sondaı-aq, budan keıingi josparlanǵan jıyndardy belgisiz ýaqytqa keıinge shegerip, sportshylardy oqýshaýlaǵandy durys taptyq", - deıdi jedel shtabtyń jetekshisi, sport dıreksııasynyń dırektory Elsııar Qanaǵatov.
1-29 maýsym aralyǵynda 12 sporttyq nysanda 26 oqý-jattyǵý jıyndary ótkizildi. Oǵan 22 ulttyq qurama komandalary qatysty. OJJ qaýipsizdik sharasy qatań saqtalǵan sport nysandarynda kezeń-kezeńimen ótti. Jıynnyń aldynda sportshylar COVID-19 úshin mindetti testti tapsyrdy.
UOK akkredıtasııasynan ótken mamandandyrylǵan sporttyq bazalar Qazaqstan Respýblıkasy memlekettik Bas sanıtar dárigeriniń 10.05.2020 jyly shyǵarylǵan №36 sporttyq nysandar, bazalar jáne zaldardyń jumys isteý Algorıtmi, «Qazaqstan Respýblıkasy turǵyndary arasynda koronavırýs ınfeksııasynyń aldyn alýǵa baılanysty is-sharalardy ári qaraı qataldatý» týraly Qaýlysyna saı sanıtarlyq-dezınfeksııaly rejımdi qatań saqtaǵaýymen oqý-jattyǵý jıyndary ótti.
