Prezıdent • 29 Maýsym, 2020

Memleket basshysy koronavırýs indetiniń taralýyna qarsy kúres sharalary jóninde keńes ótkizdi

100 ret kórsetildi

Beıne baılanys rejımi arqyly ótkizilgen jıynǵa Úkimet músheleri, birqatar memlekettik organdardyń basshylary, qalalar men oblystardyń ákimderi qatysty, - dep habarlaıdy Egemen.kz.
 

Qasym-Jomart Toqaev óz sózinde der kezinde jarııalanǵan qatań karantın sharalary ýaqyttan utyp, epıdemııanyń qatty órship ketpeýine múmkindik bergenin atap ótti. О́kinishke qaraı, Tótenshe jaǵdaı rejımi toqtatylǵannan keıin barlyq karantın sharalary bosańsyp ketti.

"Bıylǵy 11 mamyrda shekteýler alynǵannan keıin vırýstyń taralýy 7 ese ósti. Bul kóp jaǵdaıda birqatar memlekettik organdardyń jumysyndaǵy kemshilikterge baılanysty bolyp otyr. Memlekettik basqarý júıesiniń ortalyq jáne jergilikti organdary Tótenshe jaǵdaı rejımi toqtaǵannan keıingi kezeńde tıimdi jumys isteýge daıyn bolmaǵanyn atap ótý qajet. Vedomstvoaralyq komıssııa ózine júktelgen mindetti atqarýǵa shamasy jetpedi. Muny ashyq moıyndaý kerek. Densaýlyq saqtaý mınıstrligi ortalyq jáne jergilikti bılik organdarynyń jumysyn úılestire almady", – dedi Memleket basshysy.

Prezıdenttiń aıtýynsha, jergilikti jerlerde tıisti jumystar der kezinde atqarylmaı, tıimdiligi az sharalardyń qabyldanýy saldarynan eńbek ujymdarynda, iri óndiris oryndarynda jappaı vırýs juqtyrý oshaqtary paıda boldy. Atyraý oblysyndaǵy Teńiz ken orny indet juqtyrýdyń ortalyǵyna aınaldy. Onda dertke shaldyqqan 1222 adam tirkeldi. Almaty qalasynda turǵyndardyń ǵana emes, medısına qyzmetkerleriniń arasynda da naýqastanǵandar óte kóp. Elordadaǵy kóptegen mekemeler karantın jaǵdaıynyń ózinde sanıtarlyq talaptardy saqtamaǵan. О́ńirlerdegi aýrýhanalarda naýqastar jatatyn orynǵa, medısına kadrlaryna, dári-dármekke, medısınalyq qural-jabdyqtarǵa tapshylyq qatty baıqalady.

"Jumysyna salǵyrt qaraǵany úshin Nur-Sultan qalasynyń ákimi A.Kólginovke, Almaty qalasynyń ákimi B.Saǵyntaevqa eskertý jasaımyn. Shymkent qalasynyń ákimi M.Áıtenovke, Aqtóbe oblysynyń ákimi O.Orazalınge, Pavlodar oblysynyń ákimi Á.Sqaqovqa jáne Vedomstvoaralyq komıssııanyń tóraǵasy E.Toǵjanovqa sógis jarııalaımyn. Atyraý, Qostanaı, Batys Qazaqstan oblystarynyń ákimderine óńirlerdegi ahýaldy retteý qajettigin eskertemin. Atalǵan másele barlyq oblystyń basshylaryna da qatysty. Tıimdi aqparattyq jumystyń óz deńgeıinde júrgizilmeýi de jaǵdaıdy ýshyqtyra túsýde. Bizdiń halyqpen aradaǵy dıalogymyz óz deńgeıinde nátıje bermedi. Aqparattar legi teris pikirlerdiń yqpalynda ketip, dárigerlerdiń erlikke para-par eńbekteri kórinbeı qaldy", – dedi Qasym-Jomart Toqaev.

Sonymen qatar Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıevke sıfrlandyrý salasyndaǵy jumystarǵa salǵyrt qaraǵany úshin eskertý berildi.

Memleket basshysy Vedomstvoaralyq komıssııanyń shuǵyl ári qatań úılestirý jumystaryn qamtamasyz etýge, onyń oryndalýyna monıtorıng júrgizýge jáne baqylaýǵa qaýqarsyz bolyp otyrǵanyn aıtty.

"Pandemııamen kúres jónindegi barlyq sheshimderdi, onyń áleýmettik jáne ekonomıkalyq teris áserlerin joıýdy Premer-Mınıstr basshylyq etetin tıisti Memlekettik komıssııa aıasynda pysyqtaýdy tapsyramyn. Memlekettik komıssııa eń mańyzdy degen resýrstardyń taralýyn bir ortalyqtan baqylaýdy qamtamasyz etýi tıis. Qazirgi epıdemıologııalyq ahýaldy turaqtandyrý úshin shuǵyl sharalar qabyldaý maqsatynda Memlekettik komıssııaǵa eki kúnniń ishinde bıylǵy naýryz-mamyr aılaryndaǵydaı qatań karantın rejımin engizý máselesi boıynsha maǵan usynys ázirlep, engizýdi tapsyramyn", – dedi Qazaqstan Prezıdenti.

Sonymen qatar Qasym-Jomart Toqaev laboratorııalyq zertteýlerdiń tıimdiligin arttyrýdy, reagentter men jumsalatyn materıaldardyń úzdiksiz jetkizilýin sheshýdi, PTR-laboratorııalardyń sany men qýattylyǵyn arttyrýdy tapsyrdy.

"Turǵyndardyń laboratorııalar mańyndaǵy kezektiń kóptigine, sanıtarlyq normalardyń saqtalmaýyna qatysty shaǵymdanýy ádiletti. Munyń bári tikeleı aýrý juqtyrý qaýpin kúsheıtedi. Sondyqtan vırýs juqtyrýdyń aldyn alý jáne bir ortalyqtan taratýdy qamtamasyz etý, sondaı-aq, esepke qoıý maqsatynda PTR synamalaryn tapsyrýdy onlaın jazylý nemese Call ortalyq arqyly júrgizý qajet. Indet oshaqtaryndaǵy jumystar úshin, ásirese aýyldyq jerlerde mobıldi laboratorııalardy uıymdastyrý jáne mobıldi qyzmetti odan ári damytý úshin qarjy bólý asa mańyzdy, – dedi Memleket basshysy.

Qasym-Jomart Toqaev azamattardy qajetti dári-dármektermen qamtamasyz etip, emdeýdiń mańyzdylyǵyn atap ótti. Osy rette problemalardy sheshý úshin Úkimet pen óńirlerdiń ákimderine barlyq qarjylyq jáne ınfraqurylymdyq resýrstardy jumyldyrý tapsyryldy.

"Pandemııanyń ekinshi tolqynyn eskere otyryp, shildeniń sońyna deıin juqpaly dertke shaldyqqandarǵa arnalǵan tósek oryndaryn 50 paıyzǵa arttyrýdy tapsyramyn. Bul úshin óńirler barlyq rezervti, sonyń ishinde, jeke jáne vedomstvolyq medısına ortalyqtaryn paıdalanýy kerek. Úkimetke dári-dármektermen qamtamasyz etý máselesin bes kúnniń ishinde sheshýdi tapsyramyn", – dedi Prezıdent.

Qasym-Jomart Toqaev memlekettik organdardyń koronavırýsqa qarsy kúres jónindegi júrgizip jatqan aqparattyq jumystarynyń mańyzdylyǵyn aıryqsha atap ótti. Onyń aıtýynsha, bul jumys bastapqy kezeńde jaqsy uıymdastyryldy. Biraq memlekettik organdar sońǵy kezde bul isti bosańsytyp jibergendeı áser qaldyrady.

"Ákimder men mınıstrler qarapaıym halyqpen baılanys ornatýdy qoıdy. Olardyń aryz-shaǵymdaryna der kezinde jaýap bermeıdi. Sondyqtan turǵyndardyń kópshiligi qaıda bararyn bilmeı, toryǵýda. О́kiletti qyzmet oryndarynan durys jaýap ala almaǵan turǵyndardan shaǵymdar kóp túsip jatyr. www.coronavirus2020.kz saıtyna qyryq myńǵa jýyq suraq kelip tústi. Qazirgi tańda onyń úshten birine ǵana jaýap berildi. Mundaı qarym-qatynastyń nátıjesinde teris ári jalǵan aqparattar órship tur. Bul bizdiń jumysymyzdy odan saıyn qıyndatýda", – dedi Memleket basshysy.

Qazaqstan Prezıdenti aqparattyq jumystarǵa qatysty tásildi túbegeıli ózgertý qajet ekenin aıtty. Jaýapty tulǵalar ótkizetin turaqty brıfıngterdi jolǵa qoıyp, indet juqtyrǵan kezdegi is-áreketterdiń algorıtmi jóninde halyqty naqty ári sapaly aqparatpen qamtamasyz etý jóninde tapsyrma berdi.

"Telearnalarda tikeleı efır arqyly dárigerlerden keńes alyp, turǵyndardyń suraqtaryna naqty jaýap beretin baǵdarlamalar uıymdastyrýǵa ne kedergi? Azamattarǵa emdelýdiń protokoly men algorıtmin jetkizý kerek. Dári-dármekter men ony paıdalaný jóninde túsindirý qajet", – dedi Qasym-Jomart Toqaev.

Ákimder men mınıstrlerge bıýdjetti qaıta qaraý jáne konferensııa, dóńgelek ústel, saltanatty sharalar, konsaltıngtik jáne PR-qyzmet sekildi qajetsiz shyǵyndardan bas tartý jóninde tapsyrma berildi. Bul qarjynyń barlyǵy epıdemııamen naqty kúreske baǵyttalýy kerek. Sonymen qatar Memleket basshysy baǵany turaqtandyrýǵa, azamattardy qajetti azyq-túlikpen, jumyspen qamtamasyz etýge, ekonomıkalyq belsendilikti arttyrýǵa jáne sıfrlyq tehnologııany damytýǵa qoldaý kórsetý qajettigin atap ótti. Ekonomıkalyq ósimdi qaıta qalpyna keltirý jónindegi keshendi jospar júıeli ári tolyqqandy oryndalýy tıis. Bul másele árbir ákimniń erekshe baqylaýynda bolýy qajet.

Qasym-Jomart Toqaev Úkimetti shuǵyl sharalar qabyldaýmen qatar, koronavırýs pandemııasynyń uzaqqa sozylýyna daıyn bolýǵa shaqyrdy. Osyǵan baılanysty orta merzimdi perspektıvaǵa arnalǵan Qazaqstandyqtardyń ómiri men densaýlyǵyn saqtaý jónindegi ulttyq josparyn ázirleýdi tapsyrdy.

"Iá, bul – qaýipti aýrý. Ony emdeıtin vaksına áli jasalǵan joq. Biraq ony qaýipti eken dep baıbalam salyp, úreıge boı aldyrmaý kerek. Sondaı-aq jónsiz áreketke baryp, dárigerlerge til tıgizip, sanıtarlyq rejımdi buzýǵa jol berilmeıdi. Al naýqastanyp qalǵandar saryýaıymǵa, pessımızmge salynbaǵany jón. Em alýmen qatar, aǵzanyń kúshi, adamnyń kóńil-kúıi onyń qulantaza aıyǵyp ketýine yqpal etedi. Densaýlyq saqtaý mınıstrligi jáne sanıtarlyq dárigerlerdiń usynymdary men talaptaryn esten shyǵarmaýdy suraımyn. Munyń bári memlekettiń eń basty ıgiligi – sizderdiń, Qazaqstan Respýblıkasy azamattarynyń ómiri men densaýlyǵyn qorǵaýǵa arnalǵan", – dedi Memleket basshysy.

Keńes barysynda Densaýlyq saqtaý mınıstri Alekseı Soı, Nur-Sultan qalasynyń ákimi Altaı Kólginov, Almaty qalasynyń ákimi Baqytjan Saǵyntaev, Shymkent qalasynyń ákimi Murat Áıtenov, Shyǵys Qazaqstan oblysynyń ákimi Danıal Ahmetov sóz sóıledi.

Sońǵy jańalyqtar

Qalalar arasynda blokbeketter qoıylmaıdy

Qazaqstan • Búgin, 15:47

Elbasy koronavırýstan jazylyp shyqty

Elbasy • Búgin, 15:07

8 elden 15 fınteh-startap irikteldi

Qazaqstan • Búgin, 13:37

Tabys ósip, qaryz edáýir azaıdy

Ekonomıka • Búgin, 12:23

Dollardyń búgingi baǵamy belgili boldy

Ekonomıka • Búgin, 11:35

Uqsas jańalyqtar