Aımaqtar • 29 Maýsym, 2020

Toı jasaımyn dep jazaly bolǵandar

554 ret kórsetildi

О́tken demalys kúnderi Qyzyljarda toı ótkizýdiń eki faktisi anyqtalyp, tıisti adamdar jazaǵa tartyldy, - dep habarlaıdy Egemen.kz.

Oblystyń bas sanıtarlyq dárigeri senbi-jeksenbi kúnderin karantın dep jarııalap, barlyq kóńil kóterý oryndary jabylatynyn jarııalaǵanyna qaramaı «Kongress» pen «Emırat» meıramhanalarynda toı ótken. Máshınelerin alysqa toqtatyp, qonaqtardy meıramhananyń qyzmettik esikterinen kirgizgenimen qyraǵy kórshiler úılengenderdiń de qosalqy esikten kirip bara jatqanyn túsirip alyp, jelige salyp qoıǵan...

Árıne, toı ótkizýshilerdi de túsinýge bolady. Olar qýanysh kúnin aldyn ala belgilep qoıǵan, alys-jaqyndaǵy qonaqtaryn shaqyryp qoıǵan. Endi kelip qalǵan qonaqtarǵa qaıta kete berińder demeıdi ǵoı. Biraq... zaman talabyn da túsiný kerek. Prezıdent Q.Toqaev biz pandemııamen kúreste «soǵys jaǵdaıyndamyz» degende «soǵys» degen sózdi jaı aıtqan joq. Betin aýlaq qylsyn, soǵys bola qalsa da eshqandaı toı bolmaıdy ǵoı. Mynaý da sodan keıin bolmaı tur emes pe? Qonaqtardyń tym bolmasa 1-2 naýqas bolsa, basqalarǵa da juqtyrady. Al naýqas juqtyrǵandardyń bári birdeı táýir bolyp ketip jatqan joq... Sondyqtan halqymyz ózin-ózi jáne jaqyndaryn aman saqtaý úshin toı-tomalaqtan bas tarta turýy kerek. Toıdy keıinge qaldyraýdan buzylǵany jaman. Jalǵyz balasynyń ómir-boıy ańsaǵan toıyn dárigerdiń talabymen polısııa kúshi taratyp jatsa, ol da jaqsylyq emes...

Ázirge, ondaı óreskeldik joq, tek toı ótkizgen jáne ony qabyldaǵan meıramhana qojaıynyna sottyń sheshimimen 300 AEK deıin aıyppul salynýy múmkin. Toı keıin de bolady, eń bastysy amandyq bolýy kerek.

Jalpy, Petropavlda tótenshe jaǵdaı bastalǵannan bergi sońǵy eki aıdyń ishinde osyndaı bes fakti anyqtalǵan.

PETROPAVL

Sońǵy jańalyqtar

Uqsas jańalyqtar