Oqıǵa • 30 Maýsym, 2020

Araqashyqtyqty saqtaý – aǵaıynnan alshaqtaý emes

90 ret kórsetildi

Keshe Memleket basshysy koronavırýs indetiniń taralýyna qarsy kúres sharalary jóninde keńes ótkizip, jumysyna salǵyrt qaraǵan birneshe ákimge eskertý jasap, sógis berdi. Kún saıyn koronavırýs ınfeksııasyn juqtyryp jat­qan naýqastardyń sany 600-ge jýyq­tap qaldy. Bul – indettiń belgi­leri baıqalyp, densaýlyǵy syr ber­gender­diń ǵana esebi. Munyń syrtynda sımptomsyz dertke dýshar bolǵandar kúnine myńnan asyp jyǵylady.

Búkil álemdi sarsańǵa sal­ǵan vırýs elimizdiń barlyq aımaǵyna tarap, qarqyn alyp keledi. Ásirese ótken aptada 5 óńirdegi ósim qatty baıqaldy. Atap aıtsaq, koronavırýs ınfeksııasyn juqtyrýdyń ósimi boıynsha Shyǵys Qazaqstan oblysy – 62,24%, Soltústik Qazaqstan oblysy – 59,11%, Qostanaı oblysy – 41,23%, Aqmola oblysy – 39,33% jáne Pavlodar oblysy 34,80%-dy kórsetti.

Jalpy, 29 maýsymdaǵy jaǵdaı boıynsha Qazaqstanda 21 327 adam indettiń qury­ǵy­na ilingen. Olardyń emde­lip shyqqany – 13 008, jan tapsyrǵany – 183. Al statıs­tıkaǵa qosylmaǵan korona­vırýstyń belgileri joq 16 639 tasymaldaýshy tirkelgen.

Osylaısha, naýqastardy derttiń belgileri bar-joǵyna qaraı bólý arqyly barynsha qoldan kelgen kómek kórsetilip jatyr. Iаǵnı indettiń jeńil túrine ushyraǵandar úılerinde oqshaýlanyp, óz aýmaǵyndaǵy em­hana dárigerleriniń keńesi­men em-dom qabyldaýda. Al aýrýhanalar men arnaıy stasıo­narlarǵa tek jaǵdaıy aýyr jáne ortasha aýyr naýqastardy jatqyzýǵa týra kelip tur.

Sonyń ózinde arnaýly stasıonarlarda tósek-oryn tapshylyǵy qatty sezilýde. О́tken aptanyń sońyna qaraı Nur-Sultan qalasy Qoǵamdyq densaýlyq saqtaý basqarmasy basshysy Sáýle Qısyqova naýqastardyń sany úsh esege deıin óskenin, juqpaly aýrýlar jáne provızorlyq aýrýhanalarda jatqan adamdardyń sany 2,5 myńǵa deıin jetkenin málimdegen edi. Joǵaryda aıtqandaı, aýrýhanaǵa tek hali nashar jurt túsip jatyr.

Onyń aıtýynsha, 12 maýsymnan bastap Nur-Sultan qalasyndaǵy medısınalyq uıymdardyń tósek-oryn qoryn qaıta qurýǵa baılanysty juqpaly jáne provızorlyq aýrýhanalardaǵy tósek-oryn sany 1351 orynǵa ulǵaıtyldy. Úsh kúnde qosymsha 830 tósek-oryn daıyndalǵan. Onyń ishinde Ulttyq ǵylymı medısınalyq ortalyqtyń bazasynda taǵy 200 ınfeksııalyq tósek-oryn daıyndaldy. Búginde elordada koro­­navırýs ınfeksııasymen kúresýge 3 135 tósek-oryndyq 12 densaýlyq saq­taý uıymy jumyldyryldy.

Mıllıonnan asa turǵyny bar astanada indetti tejeý ońaı tımeı tur. Bul keseldiń keleńsizdigine erte qamdanǵan bas qalanyń ózinde jaǵdaı ýshyqqanda, basqa óńirlerdegi ahýaldyń aýyrlaǵanyn baǵamdaı berýge bolady.

Indet elimizde endi etek ala bastaǵanda elordada 13 kúnniń ishinde koronavırýs­pen aýyrǵan adamdardy emdeýge arnalǵan juq­paly aýrýlar ortalyǵy ashylǵan edi. 200 tósek-orynǵa shaqtalǵan bul modýldik ortalyq qazir tolyp tur deýge bolady.

Atalǵan ortalyqtyń dırektory min­detin atqarýshy Lázzat Rýspekova búgin­de bul jerde 176 naýqas jatqanyn atap ótti. Onyń ishinde 20 naýqas jan saqtaý bóliminde jatyr eken. Jan saqtaý bóliminde bary da osy – 20 oryn. Iаǵnı bul bólim lyq tolyp tur. Soǵan qarap ómir men ólimniń arasyndaǵy naýqastar jatatyn bólimge adamdar syımaı jatýy da múmkin ekenin, jaǵdaıy múshkil azamattar az emes ekenin ańǵardyq. Degenmen buǵan deıin juqpaly aýrýlar ortalyǵy alǵash ashylǵanda onda 200 tósek-orynnyń 100-inde jasandy tynys alý qurylǵysy ornatylǵany málim bolǵan edi. Sondyqtan naýqastardyń ómirin saqtap qalý úshin dárigerlerdiń aıanyp qalmasy anyq.

– Qazir ortalyqta 20 shaqty bos oryn bar. Biraq munda kún saıyn naýqastar ákelinip jatqandyqtan, oryn jetkilikti dep aıta almaımyz. Bizge kóbine hali nashar naýqastardy jatqyzady. Búgin orta­lyqqa 5 adam tústi. Jazylyp nemese jaǵdaıy edáýir táýir bolyp shy­ǵyp jatqandar da bar. Munda jatqan naý­qas­tardyń kóbiniń ókpesi qabynǵan. Jalpy koronavırýs ınfeksııasy pnevmonııamen aýyratyndardyń dertin odan saıyn kúsheıtip jiberdi, – dedi Lázzat Rýspekova.

Ol osyndaı qysyltaıań kezde ómirin táýekelge tigip, kúni-túni qyzmet etip júrgen medısına mamandary da indet juqtyryp, qyzmetkerler tapshylyǵy kúsheıe túskenin aıtty. Tósek-oryn tabyl­ǵanymen, naýqastarǵa qaraıtyn dáriger­ler jetispeı, olardyń da aýyryp qalǵa­ny jyǵylǵanǵa judyryq bolyp tur. Alaıda qyzmetine adal, halyqqa qamqor abzal jandar qalaıda tez saýyǵýdyń qareketin jasap, qatarǵa qaıta qosylyp, jumysyna kirisip ketip jatyr. Mysaly, biz sóz etken elordadaǵy juqpaly aýrýlar ortalyǵynyń aýyryp qalǵan medısına mamandary beti beri qaraǵannan keıin, eki apta jaǵdaıyn taǵy baqylap, odan soń jumysqa qaıta shyǵyp jatyr eken.

Astanadaǵy jańadan salynǵan juqpaly aýrýlar ortalyǵynyń dırektory Anna Sepkeniń densaýlyǵyna baılanysty onyń mindetin ýaqytsha Lázzat Rýspekova at­qa­ryp otyr eken. Lázzat Rýspekova – negi­­zinde Nur-Sultan qalasyndaǵy №2 qala­­lyq emhananyń bas dárigeri. Jańa orta­lyq­­taǵy qyzmetti atqara bastaǵanyna bir ap­ta­­daı bolǵanyn aıtqan ol buǵan deıin ózi ju­mys isteıtin №2 emhanada da indetpen kú­res belsendi júrgizilip jatqanyn atap ótti.

Indet juqtyrǵandardyń sany azaıar túri joq. О́kinishke qaraı, jurttyń kóbi áli de beısaýat, beıǵam júr. Saqtyq sharalaryn qatań ustaýdy, kópshilik jerden meılinshe aýlaq bolýdy eskere bermeımiz. Sonyń saldarynan jaqyndarymyz qıyn jaǵdaıǵa túsip, san soǵyp qalyp jatyrmyz. Araqashyqtyq saqtaǵanymyz – aǵaıynnan alshaqtaǵanymyz emes, aınalamyzdyń amandyǵyn oılaǵanymyz. Osyny jete túsinip, tereń sezine bilsek, bul báleketke bóget bola alatyn qoǵamdyq ımmýnıtetimiz de kúsheıe túser edi.

 

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar