Úkimet • 30 Maýsym, 2020

Asqar Mamın “Sıfrlyq bilim” aýqymdy jobasyn júzege asyrýdy tapsyrdy

23 ret kórsetildi

Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda sıfrlyq ekonomıka úshin adamı kapıtaldy damytý máselesi qaraldy,- dep habarlaıdy Egemen.kz.

Atqarylyp jatqan jumystar týraly QR bilim jáne ǵylym mınıstri Ashat Aımaǵambetov, sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev, "Astana" halyqaralyq qarjy ortalyǵynyń (AHQO) basqarýshysy Qaırat Kelimbetov baıandady.

2019 jyly Adamı damý ındeksi boıynsha Qazaqstan 189 eldiń ishinde 50-oryndy ıelendi. QR-da 1826 robotty tehnıka kabıneti, 447 STEAM zerthana, 1746 AT-synyby, 21 AT-ortalyq jumys isteıdi.

Qazaqstan halqynyń sıfrlyq saýattylyq deńgeıi 82,1%-ǵa jetti. Oqý oryndarynda jyl saıyn 50 myńnan astam AT mamany shyǵarylady jáne AT mamandyqtary boıynsha memlekettik tapsyrys kólemi jyl saıyn artýda. О́ńirlerde AT boıynsha 16 quzyrettilik ortalyǵy quryldy. 

Qazaqstanda azamattardyń bazalyq AT-quzyrettiligin damytýdy, AT-kadrlardy maqsatty daıarlaýdy jáne basqa salalardyń qyzmetkerlerin pánaralyq AT-daıarlaýdy kózdeıtin halyqtyń sıfrlyq saýattylyǵyn arttyrý boıynsha "Sıfrlyq bilim" aýqymdy jobasy iske asyrylady. Atalǵan joba aıasynda jyl saıyn 400 myńnan astam adamdy oqytý josparlanyp otyr.

Úkimet basshysy tehnologııalyq jańǵyrtý, sıfrlyq platformalardyń múmkindikteri, jasandy zerde, óndiristi avtomattandyrý kadrlar daıarlaýdy ózgertýdi jáne adamı kapıtaldy damytýdy talap etetinin atap ótti. AT biliktiligi bar mamandardy daıarlap qana qoımaı, jumys istep júrgen azamattardyń daǵdylaryn sıfrlandyrýǵa beıimdeý jáne olardyń sıfrlyq saýattylyǵyn arttyrý da mańyzdy.

"Qazaqstandyqtardyń barlyǵy sıfrlyq alańdarda jumys jasap, elektrondyq qyzmetterdi ala bilýi qajet", — dedi A. Mamın. 

Premer-Mınıstr Bilim jáne ǵylym mınıstrligine Sıfrlyq damý, ınnovasııalar jáne aeroǵarysh ónerkásibi mınıstrligimen jáne ákimdiktermen birlesip, "Sıfrlyq bilim" aýqymdy jobasynyń iske qosylýyn qamtamasyz etýdi tapsyrdy. Sonymen qatar sıfrlyq daǵdylarǵa oqytý, AT mamandaryn daıarlaý jáne qaıta daıarlaý boıynsha baǵdarlamalardy ázirleý, aldyńǵy qatarly oqý oryndarynyń tájirıbesin óńirlik ýnıversıtetter men kolledjerde taratý, "Astana" halyqaralyq qarjy ortalyǵynyń tájirıbesi men usynystaryn eskerip, jańa kásiptik standarttarǵa sáıkes bilim berý baǵdarlamalaryn jańartý jumysyn jandandyrý qajet ekeni atalyp ótti. 

Sıfrlyq damý, ınnovasııalar jáne aeroǵarysh ónerkásibi mınıstrligine "Sıfrlyq Qazaqstan" memlekettik baǵdarlamasynyń is-sharalar keshenin jańartý, baılanys operatorlarymen birlesip, otandyq bilim berý resýrstaryna shekteýsiz qol jetkizý máselesin pysyqtaý tapsyryldy.

"2025 jylǵa qaraı halyqtyń sıfrlyq saýattylyǵy deńgeıin 87%-ǵa deıin jetkizý kerek jáne óńirler úshin biryńǵaı jumys algorıtmin ázirleý qajet", — dedi A. Mamın. 

Úkimet basshysy óńirlerdiń ákimdikterine "sıfrlyq portfeldiń" talaptaryna sáıkes zamanaýı kompıýterlik jabdyqtar men robotty tehnıka kabınetterin, mektepterge arnalǵan STEM qosymsha satyp alýdy qamtamasyz etýdi tapsyrdy.

Sońǵy jańalyqtar

Uqsas jańalyqtar