Parlament • 30 Maýsym, 2020

Máýlen Áshimbaev: Parlament ótken sessııada 98 zań qabyldady

22 ret kórsetildi

Búgin Parlamenttiń altynshy shaqyrylymynyń besinshi sessııasy aıaqtaldy. Osyǵan oraı Senat Tóraǵasy Máýlen Áshimbaev facebook-tegi paraqshasyna arnaıy jazba jazyp, atqarylǵan jumystar jóninde málimdedi, - dep jazady Egemen.kz

Senat Tóraǵasynyń aıtýynsha, bul sessııada depýtattar aýqymdy jumys atqaryp, 98 zań qabyldaǵan.

"Olardyń árqaısysy muqııat qaralyp, jan-jaqty talqylanyp, pysyqtaldy. Pandemııa kezinde depýtattyq korpýs Memleket basshysynyń halyqty áleýmettik qoldaýǵa jáne daǵdarystyń saldaryn joıýǵa arnalǵan bastamalaryn zańnamalyq turǵydan qamtamasyz etti. Parlament Ekonomıkalyq ósimdi qalpyna keltirý jónindegi keshendi jospar aıasynda birqatar zańǵa engizilgen tolyqtyrýlardy qabyldady. Olar eńbekaqy tóleý qorynan ustalatyn salyqtan jáne áleýmettik tólemderden bosatýǵa, sondaı-aq, múlikke, kólikke jáne jerge salynatyn salyqtar boıynsha azamattardyń aıyppuldary men ósimpuldaryn keshirýge arnalǵan. Odan bólek, halyq pen bıznesti qoldaý maqsatymen qolǵa alynǵan basqa da sharalar bar", deıdi Senat Tóraǵasy.

Sonymen qatar Máýlen Áshimbaev Memleket basshysynyń saıası reformalary da zańmen bekitilgenine nazar aýdarǵan.

"Sonyń aıasynda saıası partııalardy tirkeý úshin qajetti músheler sany eki esege qysqardy. Parlamenttik oppozısııa ınstıtýty qalyptasýda. Partııalyq saılaý tizimderine áıelder men jastar úshin 30 paıyzdyq mindetti kvota engizildi. Beıbit jınalystar men mıtıngter ótkizý úshin eskertý tártibi bekitildi jáne jala jabý týraly bap qylmystyq kodeksten alyndy. Qoǵamǵa qaýip tóndiretin aýyr qylmystar – pedofılder, esirtki satý, adam saýdasy, áıelder men balalarǵa qatysty zorlyq jáne brakonerlik úshin jaza kúsheıtildi",  deıdi Máýlen Áshimbaev.

Sondaı-aq, Senat Tóraǵasy ustazdardyń júktemesin azaıtýǵa jáne olardy áleýmettik qorǵalýyna múmkindik beretin "Pedagog týraly" jańa zań qabyldanǵanyn aıtyp, bul qujat muǵalimder úshin, sonyń ishinde aýyldyq jerlerdegi mamandarǵa arnalǵan jańa áleýmettik kepildikter men yntalandyrý tetikterin qarastyratynyn jetkizgen.

Odan bólek, jazbada: "Sarapshylardyń qatysýymen bolǵan jan-jaqty qoǵamdyq talqylaýlardan keıin "Halyq densaýlyǵy jáne densaýlyq saqtaý týraly kodekske" túzetýler men tolyqtyrýlar engizilip, qol qoıý úshin Memleket basshysyna joldandy. Qujatta medısına qyzmetkerleriniń mártebesin kóterý maqsatymen arnaıy jańa kepildikter, jeńildikter jáne yntalandyratyn tólemder qarastyrylǵan. Atalǵan zań halyqqa medısınalyq qyzmet kórsetý sapasyn arttyrý, medısına tehnologııasyn damytý jáne osy saladaǵy baqylaýdy jetildirý máselelerin de qamtıdy. Temeki ónimderin qoldanýǵa qatysty shekteýler qabyldandy.

Uly Jeńistiń 75 jyldyǵy qarsańynda "Ardagerler týraly" Zań qabyldandy. Onda ardagerlerdiń sanaty naqty saralanyp, jeńildikter men áleýmettik kepildikter úshin quqyqtyq negizder belgilengen bolatyn.

Qabyldanǵan Ákimshilik prosestik kodeks bılik organdary men azamattardyń arasynda týyndaǵan daýlardy qaraý kezinde azamattardyń quqyǵyn qorǵaý mehanızmin bekitedi. Kodeks memlekettik organdardyń jaýapkershiligin arttyryp, azamattar men memlekettiń arasyndaǵy konstrýktıvti dıalogtyń nyǵaıa túsýine múmkindik beredi. Bul «Halyq únine qulaq asatyn memleket» qaǵıdasymen úndesedi.

Parlament ótken sessııada osyndaı jáne ózge de zańdardy qabyldaý arqyly Memleket basshysynyń saılaý aldyndaǵy baǵdarlamasynda jáne Joldaýynda aıtylǵan tapsyrmalardyń sapaly ári ýaqtyly iske asyrylýyna jol ashty. Sonymen qatar elimizdiń daǵdarystan keıingi damý strategııasyn zańnamalyq turǵydan qamtamasyz etýge jaǵdaı jasady.

Aldaǵy aılarda depýtattar óńirlerge baryp, halyqpen kezdesedi. Kezdesýlerdiń formaty men kestesi elimizdegi jáne jekelegen eldimekenderdegi epıdemııalyq jaǵdaılarǵa baılanysty bolady.

Parlament depýtattary aldaǵy ýaqytta Elbasy saıasatynyń sabaqtastyǵyn saqtaýǵa jáne Memleket basshysynyń eldi jańǵyrtý baǵdaryn iske asyrýǵa baǵyttalǵan zańdardy ýaqtyly jáne jedel qabyldaý jolyndaǵy belsendi jumysyn jalǵastyra beredi", – delingen.

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar