Qoǵam • 01 Shilde, 2020

Dárihana aldyndaǵy dúrbeleń (Dertine daýa izdegender dári-dármek tappaı júr)

116 ret kórsetildi

Qazirgi shyrǵalań shaqta dertine daýa izdep, damyl tappaı dárihana­lardyń aldyn tozdyrǵan jurttyń qatary kúrt kóbeıdi. Shekten tys suranystyń artýynan dene qyzýyn túsiretin dárilerge qol jet­kizý shetin máselege aınaldy. Eki kún buryn indetke qarsy shara­­­­lar pysyqtalǵan keńeste Mem­­leket basshysynyń Úkimetke dári-dár­mekpen qamtamasyz etý má­se­lesin bes kúnniń ishinde sheshýdi tapsyrǵany dátke qýat bolyp tur.

Indet qarqyn alǵan tusta aýrýhana­larǵa adam syımaı, derttiń jeńil túrine dýshar bolǵandar dárigerlerdiń keńesimen úılerinde em-dom qabyldaýda. Vırýs meńdep, mazasy qashqan mun­daı azamattardyń kóbi antıbıotık almaqshy bolyp dárihanalarǵa qaraı antalady. Buǵan qosa basy aýyrmaǵan bylaıǵy jurt ta indettiń betalysynan qaýiptenip, nusqaýsyz beriletin dárilerdi aldyn ala alyp qoıýǵa qam jasap jatyr. Osydan kelip sońǵy kúnderi dári-dármek tapshylyǵy qatty sezile bastady. Onyń ústine dárihanalardyń aldyndaǵy uzyn-sonar kezek vırýstyń taralý qaýpin kúsheıte tústi.

Keshe Densaýlyq saqtaý mınıstri Alekseı Soı baspasóz máslıhatynda halyqtyń jappaı dári-dármek satyp alý jaǵdaıyna qatysty qandaı sharalar qabyldanyp jatqanyn atap ótti.

«Messendjerler men áleýmettik jelilerde tarap jatqan ártúrli alyp­qashpa áńgimelerden keıin halyq jappaı «alda kerek bop qalar» degen jeleýmen qor jınaý maqsatynda dárihanadan kóptep dári-dármek satyp ala basta­dy. Ásirese ystyq túsiretin preparattar­ǵa suranys arta tústi. Osy rette mundaı preparattardyń elimizde jetkilikti kólemde óndiriletinin, óńirlerge jetkizý jolǵa qoıylǵanyn aıta keteıin. Dárihana aldyndaǵy dúrbeleńdi eskere otyryp, dári-dármekti satyp alý men jetkizý erejelerin qaıta qaraý týraly sheshim qabyldandy. Otandyq óndirýshiler dene qyzýyn túsiretin preparattardyń iri partııasyn jetkizdi. Aptanyń aıaǵyna deıin 70 myń qaptama «Ingavırın» men 40 myń qaptama «Teraflıý» kóterme qoımalarǵa jetkizilip, odan ári qaraı óńirlerge jiberiledi. Bul preparattar emdeý hattamasyna sáıkes ambýlatorııalyq deńgeıde Covid-19 indetin emdeýge qol­danylmaıtynyn qaperge salǵym keledi», dedi Alekseı Soı.

Dári-dármekke suranystyń kúrt artýynyń bir sebebi retinde aldyn alý maqsatynda halyqtyń jappaı preparattardy satyp alyp jatqanyn aıttyq. Bul rette jetispeı jatqan dárilerdi azamattar dárigerlerdiń nusqaýynsyz, óz betinshe alyp jatyr ma degen suraq týyndaıdy. Osynyń jaıyn Nur-Sultan qalasyndaǵy №10 emhananyń terapııa bóliminiń meńgerýshisi Gúlnaz Jomartqyzynan surap bildik.

Atalǵan emhana dárigeriniń aıtýynsha, jurt jappaı alyp jatqan «Parasetamol» reseptisiz satyla beredi eken. Al bak­terııaǵa qarsy «Amızon», «Tamıflıý», «Azıtromısın» sııaqty preparattar emdeý hattamasyna sáıkes mindetti túrde dárigerdiń nusqaýymen satylady.

«Biz naýqastarǵa dene qyzýyn túsire­tin, qannyń qoıýlyǵyn suıyltatyn dáriler usynamyz. Muny men KVI-diń jeńil túrine ushyraǵandarǵa qatysty aıtyp otyrmyn. О́ıtkeni olar dárigerdiń baqylaýymen úıinde emdeledi. Mundaı naýqastar múmkindiginshe jeke bólmege jaıǵasyp, ár eki saǵat saıyn maskasyn aýys­tyryp, qolyn sabyndap jýyp, ydys­taryn da jeke qoldanǵany jón. Jaqyn­darymen keminde 1,5-2 metr araqashyq­tyq ustaýy kerek. Al jaǵdaıy aýyr nemese ortasha aýyr naýqastar arnaıy stasıonarlarǵa jatqyzylady. Úıinde oqshaýlanǵan naýqastardan dárigerler kúnine eki ret habar alyp turady. Jalpy, 14 kún baqylaýymyzda bolady. Sodan keıin PTR-test alyp, taǵy bir tekseremiz. Eger vırýs ókpege túsip ketse, PTR-test anyqtaı almaıdy. Sondyqtan keıbir naýqastardy KT men rentgenge túsiremiz», dedi Gúlnaz Jomartqyzy.

Qazir elordadaǵy №10 emhananyń provızorlyq kabınetinde 700-ge jýyq adam tirkelgen eken. Iаǵnı osynsha adam koronavırýs ınfeksııasyn juqtyrǵan. Onyń ishinde stasıonarǵa jatqandary da, úıinde oqshaýlanǵandary da bar. Bul emhanaǵa kún saıyn myńǵa jýyq turǵyn júginedi. Jalpy, emhanaǵa 85 myń qala turǵyny tirkelgen.

Densaýlyq saqtaý vıse-mınıstri Lıýdmıla Bıýrabekova Facebook-tegi paraqshasynda COVID-19 koronavırýs ınfeksııasyn dıagnostıkalaý jáne emdeý klınıkalyq hattamasyna tolyqtyrýlar engizilgenin jazdy.

«COVID-19-dy dıagnostıkalaý jáne emdeý klınıkalyq hattamasynyń 10-redaksııasyna koronavırýs ınfeksııasyn emdeýde aıtarlyqtaı tolyqtyrýlar engizildi. COVID-19 kezinde bakterııaǵa qarsy terapııany bakterııalyq ınfeksııa qosylǵan jaǵdaıda ǵana qoldanýǵa basa nazar aýdaryldy. COVID-19 kezinde ókpeniń vırýspen zaqymdanýy empırıkalyq bakterııaǵa qarsy terapııany bastaý úshin kórsetkish bola almaıdy», dedi vıse-mınıstr.

Onyń aıtýynsha, hattamany ázirleý­shiler jaǵdaıy ortasha aýyr naýqastarǵa vırýsqa qarsy preparattardy stasıonarǵa jatqyzǵanǵa deıin ambýlatorlyq jaǵ­daıda qoldaný usynysyn quptaǵan. Bul úshin hattamaǵa ambýlatorlyq kezeńde emdeý syzbasy qosylyp otyr: gıdroksıhlorohın jáne lopınavır/rıtonavır.

Buǵan qosa endigi ýaqytta naýqastar stasıonar deńgeıinde Japonııa men Reseıde COVID-19-dy emdeýde keńinen qoldanylǵan «Favıpıravır» dárisin ala alady. Pnevmonııanyń aýyr túrinde terapııa deksametazon preparatymen tolyqtyryldy.

Hattamanyń 10-nusqasy jaqyn arada Densaýlyq saqtaý mınıstrliginiń resmı saıtynda jarııalanady.

Jalpy, dárihanalardaǵy dári-dár­mek tapshylyǵy máselesi kóp uza­maı sheshiletin sııaqty. Bul oıdy Nur-Sul­tan qalasynyń Taýarlar men kórseti­letin qyzmetterdiń sapasy men qaýip­siz­digin baqylaý departamentiniń farma­sevtı­kalyq qyzmetti baqylaý bóliminiń basshysy Ásııa Moldımanova da qýattaı tústi.

«Elordada dári-dármektiń kóterme saýdasymen aınalysatyn qoımalar negizinen fılıaldar bolyp keledi. Basty keńseleri Almaty, Shymkent, Qaraǵandy qalalarynda ornalasqan. Olar qazirgi epıdemııalyq jaǵdaıdyń ýshyǵýy­na baılanysty aldymen óz qalalaryn­daǵy dárihanalardy qamtamasyz etip jatyr. Endi basqa óńirlerge de dáriler jibere bastaıdy. Osy aptada dári-dármek astanaǵa jetedi. Sondaı-aq termometrdiń jetispeýshiligi de jaqynda sheshiledi. Bul taýarlar Qytaıdan ákelinedi. Qazir kedendik rásimdeýlerdi tezdetý tapsyryldy», dedi ol.

 

Sońǵy jańalyqtar

Dáriger keńesin onlaın túrde alýǵa bolady

Koronavırýs • Búgin, 22:00

Pnevmonııaǵa basqa ataý berilýi múmkin

Koronavırýs • Búgin, 21:40

Qazir tek ómir men ólim bar - Bas sanıtar

Koronavırýs • Búgin, 19:10

Koronavırýs indeti 3 kezeńnen turady

Koronavırýs • Búgin, 17:35

О́z tanysyn tonap ketken ury ustaldy

Aımaqtar • Búgin, 14:30

Ustazdardan zańsyz aqsha jınalmaý kerek

Aımaqtar • Búgin, 12:32

Muhtar Shahanov aýyryp jatyr

Qazaqstan • Búgin, 11:56

Gongkongta mektepter qaıta jabylady

Álem • Búgin, 11:10

Uqsas jańalyqtar