Álem • Keshe

Polshanyń kelesi prezıdenti kim bolady?

23 ret kórsetildi

Polshada prezıdenttik saılaý ótti. Daýys berý qorytyndysy boıynsha qazirgi el basshysy Andjeı Dýda men Varshava ákimi Rafal Tshaskovskıı tıisti 50 paıyzdyq mejeden asa alǵan joq. Osyǵan baılanysty saılaýdyń ekinshi kezeńi 12 shildege josparlanyp otyr.

Qazirge deıin Dýda – 43,7 pa­ıyz, Tshaskovskıı 30,3 paıyz daýys jınaǵan. Aıta ketý ke­rek, Polsha ortalyq saılaý komıs­sııasy bıýlletenderdiń 99,78 pa­ıyzyn sanap shyqty. Saılaý­dyń nátıjesi aldaǵy ýaqytta naqty belgili bolady. Alaıda qazirdiń ózinde prezı­dent­ti anyqtaý ekinshi kezeńge qal­dyrylǵany aıtpasa da túsinikti.

Memleket basshysy qyz­me­tinen 11 kandıdat úmitker bol­dy. Elde 27 myńnan astam saı­laý ýchaskesi jumys istedi. Pre­zı­dent saılaýynyń birinshi týry ma­myr aıynda ótýi tıis edi. Biraq ko­ronavırýs pandemııasyna baı­lanysty saılaý keıinge shegerildi.

Exit poll júrgizgen saýal­na­maǵa súıensek, Andjeı Dý­dany qoldaıtyndar sany 42  pa­ıyz­dy quraǵan. Al onyń basty qar­sylasy – Varshavanyń meri Rafal Tshaskovskııge halyqtyń 30 paıyzy daýys bergenin aıtqan. Úshinshi oryn táýelsiz úmitker Shımon Holovnıaǵa buıyrdy. Ol 14 paıyz daýys jınaǵan.

A.Dýda exit-poll-dyń nátıjesi shyqqannan keıin halyqqa joldaý jasap, qoldaıtyndar sany art­qa­nyn málimdedi. Osydan bes jyl buryn birinshi kezeńde da­ýys bergender sany qazirgiden ál­deqaıda az bolatyn. «Bes jyl boıy saıasatta júrip, kóptegen synǵa qalyp, shabýyl jasalyp, qıyn sheshim qabyldadym. Sonyń arqasynda osy nátıjege qol jetkizip otyrmyn», dedi ol.

Al Tshaskovskıı óz sózinde basqa úmitkerlerge daýys bergen tur­ǵyndardy ózin qoldaýǵa shaqy­ryp, Dýdaǵa qarsy shyǵýǵa úgit­tedi. «Bul nátıje mańyzdy má­se­leni kórsetti. Qoǵamnyń 58 paıyzdan astamy ózgeristi qa­laıdy. Sol azamattarǵa sizderdiń úmitkerlerińiz ekenimdi, ózgeristiń úmitkeri ekenimdi aıtqym keledi», dep málimdedi.

«Bul án burynǵy ánnen óz­gerek» demekshi, bul jolǵy saılaýdyń ózgesheligi kóp bolyp tur. Máselen, 2015 jylǵy daýys berý kezinde elektorattyń 49 paıyzy ǵana qatysqan. Bıyl bul kórsetkish 63 paıyzdy qurady.

Ekinshi kezeńniń basty favo­rıti – Andjeı Dýda ekenine qaramastan, Tshaskovskııdiń de múmkindigi mol. Birinshiden, qazirgi prezıdentti qoldaıtyndardyń basym bóligi orta jastan asqandar. Onyń ústine, taıaýda Dýda myrza geılerge qatysty pikir bildirip, eldegi quqyq qorǵaýshylar men sheteldikterdiń synyna qalǵan edi. Endi oǵan Polshada qyryn qaraıtyndar tabylýy múmkin.

Ekinshiden, Ipsos kompa­nııasy júrgizgen exit-poll-dyń nátıjesine súıensek, Tshaskovs­kııdi kóbine jastar jaǵy qol­daıdy. Al Dýdaǵa daýys bergen 18-29 jas aralyǵyndaǵylar ne­bári 19 paıyz ǵana. Iаǵnı, ekinshi kezeńde basqa úmitkerlerdi qol­daǵan jastardyń Tshaskovskııdiń jaq­tasyna aınalýy ábden yq­tımal.

Úshinshiden, bıylǵy saılaý naýqany kezinde úmitkerler túr­li tásildi qoldandy. Ásirese ha­lyq­­aralyq jobalardy da paı­dala­nýdy kózdegen-di. Máselen, pre­zı­denttikten úmitkerler endi Vıs­lın múıisine kanal qazý jobasyn saıası naýqannyń bir bóligine aınaldyrdy.

Esterińizde bolsa, Polsha­daǵy Vıslın múıisine kanal sa­lý týraly áńgime qozǵalyp, she­shim qabyldanǵan-dy. Qurylys aıaq­talǵanda 100 shaqyrymǵa deıingi sý joly qysqartylyp, Baltyq teńizine tikeleı shyǵýǵa múmkindik jasalmaq. Joba týraly talaıdan beri aıtylyp kele jatqanymen, onyń qurylysy 2019 jyly bas­talǵan-dy. Polsha pre­zıdenti Andjeı Dýdanyń aı­týynsha, kanal salý arqyly Pol­sha Re­seı­diń yqpalynan qutylyp, táýel­sizdigin nyǵaıta túspek. El prezı­dentiniń paıymdaýynsha, mundaı jobalar qosymsha jumys ornyn ashady.

Polshada bul jobaǵa qar­sy­lar jeterlik. Ásirese eldegi op­po­zı­sııa ókilderi jobanyń ózin aq­ta­­maıtynyn alǵa tartady. «Aza­mat­tyq alań» oppozısııalyq blok ta­ra­pynan saılaýǵa túsip jatqan Ra­fal Tshaskovskıı jeńiske jet­se, qu­rylysty toqtatýǵa ýáde berdi.

Bir qyzyǵy, ekinshi kezeńniń nátıjesi birinshi týrda úshinshi oryn alǵan Shımon Holovnıaǵa baılanysty bolmaq. Onyń 14 pa­ıyz daýys jınaǵanyn joǵaryda aıttyq. Gazeta Wyborcza basy­ly­mynyń habarlaýynsha, Sh.Ho­lovnıa aldaǵy ýaqytta eki úmit­kerge qatysty ustanymyn málim­demek. Iаǵnı, Shımonnyń jaqtas­tary ekinshi kezeńde kimge daýys beretini onyń bir aýyz sózine baılanyp tur.

Sońǵy jańalyqtar

Qalalar arasynda blokbeketter qoıylmaıdy

Qazaqstan • Búgin, 15:47

Elbasy koronavırýstan jazylyp shyqty

Elbasy • Búgin, 15:07

8 elden 15 fınteh-startap irikteldi

Qazaqstan • Búgin, 13:37

Tabys ósip, qaryz edáýir azaıdy

Ekonomıka • Búgin, 12:23

Dollardyń búgingi baǵamy belgili boldy

Ekonomıka • Búgin, 11:35

Uqsas jańalyqtar