Bıyl elektr energııasyn óndirý sektoryna 80 mlrd teńge ınvestısııa tartylýǵa tıis. Alaıda bul qarajat stansa jabdyqtaryn jańǵyrtýǵa jetpeıdi. Al stansalardyń tozý deńgeıi jyldan-jylǵa artyp barady. Qazir shamamen 60% eskirgen. Iаǵnı elektrmen jabdyqtaý sapasyna qaýip tónip tur deýge bolady.
– Bul fakt elektr qýattarynyń apattyq isten shyǵýy, tutynýshylardy elektrmen jabdyqtaý sapasynyń tómendeýi sııaqty oqıǵalardyń jıileýine, sondaı-aq kórshi elderge táýeldiliktiń ulǵaıýyna sebep bolyp otyr. Mysaly, byltyr 3 996 tehnologııalyq buzýshylyqtarǵa jol berilgen. Bıyl tehnologııalyq buzýshylyqtar sany 1,3%-ǵa azaıdy. Biraq jylý berý kezeńinde eń kóp jabdyq iske qosylǵanda 135-ke nemese 6%-ǵa artyp otyr, – deıdi Aıdos Dáribaev.
Onyń aıtýynsha, bul jaǵdaı Qazaqstandyq tutynýshylardy kórshi elderden elektr qýatyn retteý jónindegi qyzmetterdi jylyna 8 mlrd teńgeden astam somaǵa satyp alýǵa májbúrleıdi. Bul da elektr energııasynyń túpkilikti baǵasyna áser etedi.
Bıyl energııa óndirýshi uıymdardyń shekti tarıfteriniń ortasha ulǵaıýy 16% deńgeıinde boljanýda. Bul rette Qazaqstannyń barlyq aımaǵynda elektr energııasyn taratýdy iske asyratyn Ekibastuz GRES-1 shekti tarıfi 0,7%-ǵa ósedi. Elektr stansalarynyń shekti tarıfterin ýaqtyly túzetý aldaǵy kúzgi-qysqy kezeńderden tabysty ótýge múmkindik beredi. Sondaı-aq 27 myń jumys ornyn saqtaýǵa járdemdespek.
