Aımaqtar • 01 Shilde, 2020

Balqashty qoqystan kim qutqarady?

32 ret kórsetildi

Týrızmniń ordasyna aınalady degen Balqashtyń mańaıy kúl-qoqystan kóz ashpaı-aq qoıdy. Qalany aıtpaǵannyń ózinde, jaǵajaılar men kórshi eldi mekenderdi qoqystan tazartý kádimgideı úlken problemaǵa aınalǵan, – dep habarlaıdy Egemen.kz.

Degenmen, seń endi qozǵalyp, bul salada baıaý bolsa da is-árekettiń nyshany baıqala bastady. Mysaly, qazirgi ýaqytta qala mańyndaǵy Tehsnab kentindegi taý bolyp úıilgen qoqysty tysqa shyǵarý qol alynǵan. Buǵan deıin mundaǵy turǵyndar qoqys shyǵarýǵa kelisim-shart bolmaǵandyqtan, turmystyq qaldyqtardy ár jerge tastaı bergen eken.

Balqash qalalyq turǵyn úı-kommýnaldyq sharýashylyq bóliminiń sektor meńgerýshisi Asylmurat Túsipov kenttegi birneshe jyldan beri jatqan 400 tekshe metr qaldyqtyń tysqa shyǵarylǵanyn aıtady.

"Biz ruqsat etilmegen qoqystardy joıýmen aınalysamyz. Qazir barlyq jerdi tazalaımyz. Jeke sektor turǵyndarymen qatty turmystyq qaldyqtardy shyǵarýǵa kelisim-sharttar jasasý úshin túsindirý jumystaryn júrgizetin bolamyz. Buǵan qosa, qoqys tógetin oryndarǵa beıne kameralar ornatamyz, sodan keıin qoqysty retsiz tógetinderge aıyppul salynady bastaıdy", – deıdi ol.

Bul jerde jergilikti atqarýshy bılik pen kommýnaldyq qyzmet ókilderiniń turǵyndarǵa ókpeleıtin jóni bar. Olardyń kóbi salaqtyq tanytyp, úıinen shyqqan kúl-qoqysty kóringen jerge tóge salýdy ábden ádetke aınaldyryp alǵan.

"Qoqys shyǵarý týraly ótinishpen bizge eshkim kelgen joq. Ázirge eshqandaı kelisim joq. Ol úshin Tehsnab kentiniń turǵyndary bizge kelip, kelisim shart rásimdeýleri kerek. Bizde tehnıka jetkilikti", – deıdi "Balqash Ýnıversal" JShS-niń ýchaske bastyǵy Manat Dildashev.

Búgingi kúnde kenttegi árbir úı úshin aı saıynǵy tarıf ornatylyp, ekonomıst mamandar naqty esepteýler jasaý ústinde. Osyndaı qadamdardan keıin sanasy oıana bastaǵan kent turǵyndary bul bastamaǵa qoldaý bildire bastaǵan.

"Biz tóleýge daıynbyz, – deıdi olar. – Kentimizdiń kóptegen turǵyndary da munymen kelisedi. Buryn biz qaldyqtardy qaıda tastaıtynymyzdy bilmeıtinbiz".

Kommýnaldyq qyzmettiń ókilderi aldaǵy ýaqytta Tehsnab  kentin ǵana emes, JBI yqsham aýdanyn, Shubartúbek jáne Jumysshy eldi mekenderin, saıajaılar men jaǵajaılardy da kúl-qoqystan tazartýdy josparlap otyr.

Budan bólek, "Balqash Ýnıversal" kásiporny Balqash qalasynyń konteınerlik alańdaryn retke keltirýmen aınalyspaqshy. Bul jumys aıaqtalǵan soń, 190-ǵa jýyq qoqys jáshikteri alańdarmen birge senimdi basqarýǵa beriledi.

 

Qaraǵandy oblysy

Sońǵy jańalyqtar

Uqsas jańalyqtar