PREZIDENT POShTASYNAN

ELBASY QAMQORLYǴYNA ELI RIZA Memleket basshysynyń atyna Qyzylorda oblysy Aral aýdanynyń turǵyny, zeınetker, Qazaqstan Mem­le­kettik syılyǵynyń ıegeri Narǵalı Demeýovten hat keldi. Hat ıesi Syr óńiri respýblıkadaǵy ózge óńirler sııaqty Elbasy qamqorlyǵy arqasynda damýda ekenin aıtady. Araldyqtar úshin mańyzy zor “Syrdarııa ózeni­niń arnasyn retteý jáne Soltústik Aral teńizin saqtap qalý” jobasynyń júzege asyryla bastaýyna rızashylyq bildirgen avtor hatynda “Qazaq jerine qatysty bóligi úshin qarastyrylǵan sharalardy oryndaýǵa ózińiz bas bolyp kiristińiz. Nátıjeli jobanyń birinshi kezeńinde Syr óńiriniń búgini men keleshegi úshin úlken máni bar ǵasyrlyq nysandar – Áıtek, Kókaral, Aqlaq jáne Qaraózek qurylystary júrgizildi. Kóksaraı sý qoımasy ózińizdiń nazary­ńyz­daǵy áleýmettik mańyzy bar nysan. Onyń maqsaty men tıimdiligine tolyq qanyqqan syrboıylyqtar Sizdiń bul bastamańyzdaǵy jobańyzdy tolyq qýattaýda”, – dep jazady. *  *  * Sonymen qatar, Memleket basshysy Nursultan Na­zar­­baevtyń atyna kóktemgi sý tasqynynan zardap shekken Almaty oblysy Qyzylaǵash aýylyndaǵy orta mekteptiń 11-shi synyp oqýshysy Janar Dýbekovadan hat keldi. Hat ıesi qıyn jaǵdaıdaǵy qyzylaǵashtyqtarǵa qam­qorlyǵy úshin Elbasyǵa rahmet aıtyp, aýyldastarynyń atynan Memleket basshysyna zor densaýlyq tileıdi. OQYTÝShYLAR MEN STÝDENTTER ALǴYSY ShEKSIZ Memleket basshysy Nursultan Nazar­baev­tyń atyna “2009 jyldyń joǵary oqý ornynyń úzdik oqytýshysy” grantynyń ıegerleri, barlyǵy 56 joǵary oqý ornynyń 200 oqytýshysy qol qoıǵan hat keldi. Hat avtorlary memlekettik grant ese­binen shetelderdiń ozyq oqý oryndarynda taǵylymdamadan ótip, biliktilikterin art­tyrýlaryna, ǵylymı-zertteý jumystaryn tıimdi júrgizýlerine zor múmkinshilik týdyrǵan Elbasynyń qamqorlyǵyna sheksiz rızashylyqtaryn aıtady. Sonymen qatar, grant ıegerleri ara­sy­nan Prezıdentke jeke óz atynan hat jol­daǵan Astana qalasyndaǵy S.Seıfýllın atyn­daǵy Qazaq agrotehnıkalyq ýnıver­sıtetiniń oqytýshysy, professor Maıra Kenjebolatova: “Bilim – ǵylym salasyndaǵy osynaý ıgi shara – memlekettik deńgeıde, Siz­diń tarapyńyzdan júrgizilip otyrǵan kóregen saıasattyń aıqyn bir kórinisi. О́ıt­keni, bilim men ǵylymǵa jasalǵan qam­qorlyq – eldiń damý bolashaǵynyń kepili”, – degen pikirin bildiredi. *  *  * Elbasynyń atyna stýdent jastar atynan da kóptegen hattar kelýde. Qosym­sha memlekettik bilim granty boıynsha bilim alýdy jalǵastyrý múmkindigin berý týraly sheshim úshin rızashylyq bildirgen mazmun­daǵy hattar Abaı atyndaǵy Qazaq ulttyq pedagogıkalyq ýnıversıtetiniń, M.Áýezov atyndaǵy Ońtústik Qazaqstan memlekettik ýnı­versıtetiniń, Qazaq ulttyq agrarlyq ýnı­versıtetiniń, Atyraý munaı jáne gaz ıns­tıtýtynyń, E.Bóketov atyndaǵy Qara­ǵan­dy memlekettik ýnıversıtetiniń stý­dent­te­rinen jáne olardyń ata-analarynan keldi. Hat ıeleri Elbasyna sheksiz rızashylyqtarymen birge ıgi tilekterin jetkizip, bul úlken jaqsylyqqa laıyqty bolýǵa ýáde etedi. Máselen, Abaı atyndaǵy Qazaq ulttyq pedagogıkalyq ýnıversıteti stýdentteriniń hatynda: “Men jastarǵa senemin” dep Maǵjan aqyn aıtqandaı, bizge senim artyp, jeńildik jasap otyrǵan Elbasymyzdyń qamqorlyǵyna jaýap retinde biz de jaqsy oqyp, sapaly bilim, sanaly tárbıe alyp, táýelsiz Qazaqstannyń odan ári damýy jáne ósip-órkendeýi úshin aıanbaı eńbek etýge ýáde beremiz”, – delingen.