Qalalyq bilim berý bóliminiń málimdeýinshe, 2020 jylǵy 23-30 maýsym aralyǵynda Pavlodar qalasynyń 37 jalpy bilim berý mektepteriniń 1150 túlekterinen UBT-ǵa 933 (81%), 2019 jyly – 750 (74%) qatysqan. Onyń ishinde qazaq tilinde – 378, 2019 jyly – 350.
"Qatysýdyń eń kóp paıyzyn №7, 37, Kenjekól JOM – 100%, №35 – 98%, №14 – 96,2%, №20 – 95,7%, Bekhojın atyndaǵy – 95%, №13 – 92,3%, №25 – 90,7% mektepter qurdy", - deıdi bilim berý bóliminiń mamany Baljan Ádilhanova.
- UBT-ǵa qatysýdy qamtamasyz etý maqsatynda densaýlyq jaǵdaıy men otbasy jaǵdaıyna baılanysty UBT-ǵa kelmegen 4 túlek úshin test tapsyrý úshin qosymsha oryn usynyldy. Testileýdi ótkizý kezinde erejeni buzǵany jáne tyıym salynǵan zattardy alyp ótýge áreket jasaǵany úshin qala mektepteriniń 22 túlegi shyǵaryldy.
Qala mektepteriniń 60 túlegi 100 jáne odan da kóp ball aldy. Onyń ishinde 6 túlek 125 jáne odan joǵary ball jınady. Eń joǵary ballǵa № 35 JOM túlegi Aıdos Qobylandy ıe boldy (140 balldan 136 ball).
UBT-ny ótkizý kezinde tapsyrý ornynda kalkýlıatorlar berý, testileý ýaqytyn 4 saǵatqa deıin ulǵaıtý (buryn 3 saǵat 50 mınýt boldy), tulǵany sáıkestendirý bet taný arqyly anyqtady (Face ID), UBT elektrondyq sertıfıkatyn jáne grant berý týraly elektrondyq kýálik berý, halyqaralyq standarttalǵan SAT, AST jáne ShI testteriniń baldaryn UBT balyna aýystyrý sııaqty jańalyqtar engizildi.
"Shekti ball jınamaǵan túlekter jyl boıy UBT tapsyrýǵa múmkindigi bar. Sonymen qatar, UBT-ny ótkizýdiń beınejazbasyna saraptama júrgiziledi, tyıym salynǵan zattar tabylǵan jaǵdaıda UBT nátıjeleri, sondaı-aq bilim berý granty joıylady. UBT ótkizý pýnktteriniń aldynda adamdardyń jappaı jınalýyn boldyrmaý úshin testileý ótkizýdiń onlaın kórsetilimi uıymdastyryldy. Áleýmettik jeliler arqyly jańa jaǵdaıda UBT ótkizý boıynsha aqparattyq-túsindirý jumystary júrgizildi, sanıtarlyq-epıdemıologııalyq talaptardy saqtaý mysaldary bar beınerolıkter taratyldy", - deıdi Baljan Ádilhanova.
