Tótenshe jaǵdaı toqtaǵannan keıin bosańsyp ketkenimiz ras. Sonyń saldarynan vırýstyń odan saıyn órshýine jol berip qoıdyq. Aınalamyzda osy báleketke ushyrap, aýyryp qalǵan adamdardy jıi kezdestirip jatyrmyz. Bul indet týǵan-týystarymyz, dostarymyz, áriptesterimiz, kórshilerimiz – bárine jetip úlgerdi. Sondyqtan qoǵamnyń bútindigi, eldiń turaqtylyǵy úshin engizilip jatqan qatań karantın sharalary óte durys qadam dep bilemin. Shekteý sharalary ekonomıkamyzǵa barynsha zııan keltirmeıtindeı, jan-jaqty máselelerdi tereń taldaǵannan keıin qabyldanyp otyr.
Bizdiń halyq osy zamanǵa deıin basynan qanshama náýbetti ótkizdi. Talaı tar jol, taıǵaq keshýden birligimizdiń, tózimdiligimizdiń arqasynda óttik. Bir úıdiń balasyndaı bir birimizge janashyr, tirek bola bilsek, kez kelgen qıynshylyqty eńseremiz. «Tártipke baǵynǵan el qul bolmaıdy» degen Baýyrjan Momyshuly atamyzdyń dana sózi bar ǵoı. Búgingi tańda temirdeı tártipke boıusynyp, qaýipsizdik talaptaryn qatań ustanýymyz kerek. Sonda ǵana bul tyǵyryqtan shyǵyp, bolashaǵymyz jarqyn bolady.
Sherzod PÝLATOV,
Qazaqstan halqy assambleıasy Tóraǵasynyń orynbasary
