Keıbir iri sýpermarketterdiń aldyndaǵy kezek ashy ishekteı shubatylyp, jarty shaqyrymdaı jerge jetken. Al dúkenniń ishi bolsa, tutynýshylarǵa lyq toly. Esiktegi kúzetshiler kezektegilerdi ishten azyq-túlikti arbalap shyǵarǵandardyń kezekti toby shyqqannan keıin ǵana kirgizip tur.
Turǵyndar dúken sórelerindegi qant, qaraqumyq, tuz, pııaz syndy eń qajetti azyq-túlik taýarlaryn túgin qaldyrmaı alyp jatyr. Saýda úıiniń qyzmetkerleri qoımadan tasyp, olardyń ornyn áreń degende toltyryp úlgerýde.
Al oblystyq ákimdik bolsa, osy jaǵdaıǵa oraı mynadaı resmı aqparat taratty: "Qaraǵandy oblysynyń azyq-túlik qoımalarynda jáne turaqtandyrý qorynda qajetti azyq-túlik qory jetkilikti. Taýarlardy jetkizýge qatysty irkilister joq. Qazir oblysta 671,8 tonna qus eti, 331 tonna pııaz, 201 tonna qyryqqabat bar. Kóterme saýda ókilderinde bakaleıalyq ónimderdiń eki aılyq qory jınalǵan. Jaqyn arada kartop, pııaz, sábiz, qyryqqabat, kúrish, qaraqumyq jáne ósimdik maıynyń iri partııalary kelip túsedi. Osy jyldyń naýryz aıyndaǵydaı atalǵan taýarlarǵa degen suranys úsh ese artqan kúnniń ózinde, qolda bar azyq-túlik óńirdiń barlyq turǵyndaryna jetkilikti bolady. Áleýmettik mańyzy bar azyq-túliktiń baǵasy udaıy baqylaýda".
Oblys ákimdigi taratqan resmı aqparatta sýpermarketke kirý kezegi karantındik sharalardy saqtaýmen baılanysty ekendigi aıtylǵan. Sondaı-aq, atalǵan habarlamada iri dúkender men basqa da qoǵamdyq oryndarǵa barǵan kezde áleýmettik qashyqtyqty saqtaý, betperde kıip, qoldy antıseptıktermen óńdeý qajettigi eskertilgen.
Qaraǵandy oblysy
