Sýret Prezıdenttiń baspasóz qyzmetinen alyndy
Prezıdent óz sózinde Nursultan Nazarbaevtyń qazirgi Qazaqstannyń negizin qalaǵanyn, egemen elimizdiń strategııalyq damý jolyn aıqyndap, halqymyzdy ortaq maqsatqa jumyldyrǵanyn atap ótti.
– Turaqtylyq pen tatýlyq, bereke men birlik – Elbasynyń sarabdal saıasatynyń nátıjesi. Kez kelgen memlekettiń tarıhynda óshpes iz qaldyrǵan biregeı tulǵalar bar. Olardyń sińirgen eńbegin baǵalaı bilý jáne jan-jaqty dáripteý – óskeleń urpaqtyń paryzy, – dedi Qasym-Jomart Toqaev.
Memleket basshysynyń aıtýynsha, Qazaqstannyń Qarýly Kúshteri Tuńǵysh Prezıdenttiń Jarlyǵymen qurylǵandyqtan, bul monýmenttiń Ulttyq qorǵanys ýnıversıtetinde ornatylýynyń sımvoldyq máni zor.
Elbasy elimizdiń qorǵanys qabiletin arttyrýǵa erekshe kóńil bóldi. Memleket eń qıyn kezeńderdiń ózinde de zamanaýı qarý-jaraq alý, otandyq qorǵanys ónerkásibi kesheniniń qýatyn arttyrý, áskerı qyzmetshilerdi baspanamen qamtamasyz etý, jalaqylaryn ýaqtyly berý, joǵary zeınetaqy tóleý mindetterin ońtaıly sheshe bildi.
– Táýelsizdik alǵan sátten bastap N.Nazarbaev áskerı áleýetimizdi qalyptastyrý barysynda eń kúrdeli degen máselelerdi sheshýge ózi tikeleı aralasty. Onyń basshylyǵymen halqymyz ben elimizdi yqtımal áskerı qaqtyǵystardan qorǵaý maqsatynda armııamyzdyń perspektıvalary men mindetteri, ulttyq qaýipsizdikti qamtamasyz etýdiń basymdyqtary men mehanızmderi aıqyndaldy. N.Nazarbaev Prezıdent bolǵan jyldary áskerı qurylymnyń zańnamalyq jáne quqyqtyq-normatıvtik bazasy ázirlendi. Sondaı-aq Qarýly Kúshterdiń qurylymy men quramy jasaqtalyp, armııanyń qarýlanýy kezeń-kezeńimen iske asyp, zamanaýı ınfraqurylym qalyptasty, – dedi Qasym-Jomart Toqaev.
Joǵarǵy Bas qolbasshy áskerimizdiń qansha jerden zamanaýı tehnıkalarmen jabdyqtalǵanymen, memlekettiń qaýipsizdigin qamtamasyz etý barysynda armııanyń jeke quramy negizgi faktor bolyp qala beretinin aıtty.
Sondyqtan Táýelsizdiktiń alǵashqy jyldarynda eń myqty áskerı kadrlar sapaly áskerı bilim berý isin uıymdastyrýǵa jumyldyryldy. Búginde Qazaqstanda orta áskerı oqý oryndarynan bastap halyqaralyq deńgeıdegi ýnıversıtetke deıingi aralyqta kópsatyly bilim júıesi qalyptasty.
– Halqymyzda «El erlerimen eńseli» degen qanatty sóz bar. Shyn máninde, Qarýly Kúshteri qýatty memlekettiń birligi bekem, abyroıy asqaq bolady. Sondyqtan biz armııamyzdyń básekege qabilettiligin arttyrýǵa qashanda basa mán beremiz. Bul rette bilim men ǵylymnyń alatyn orny erekshe. Ulttyq qorǵanys ýnıversıteti aldaǵy ýaqytta da bilikti mamandar daıarlaý isine mol úles qosady dep senemin, – dedi Memleket basshysy.
