Aımaqtar • 06 Shilde, 2020

Qaraǵandyda Elorda kúniniń qurmetine Soltústik-Shyǵys aınalma joly ashyldy

54 ret kórsetildi

Qaraǵandy oblysynyń ortalyǵynda Soltústik-Shyǵys aınalma joly resmı túrde ashyldy, – dep habarlaıdy Egemen.kz oblys ákiminiń baspasóz qyzmetine silteme jasap.

Budan bylaı tranzıttik avtokólikter kenshiler astanasynyń joldaryn talqandap, aýasyn lastap, kóshelerin qaq jaryp ótpeıtin boldy. Olar endi jańa jolmen qalany syrtynan aınalyp ótedi.

Aınalma joldyń ashylýyna arnaıy kelgen Indýstrııa jáne ınfraqurylymdyq damý vıse-mınıstri Berik Kamalıev saltanatty sáttiń Elorda kúni merekesimen tuspa-tus kelgenin rızashylyqpen atap ótti.

"Soltústik-Shyǵys aınalma joly 2017 jyly Elbasynyń tapsyrmasy boıynsha salyna bastaǵan edi. Jol halyqaralyq standarttarǵa sáıkes keledi jáne Ekaterınbýrg-Almaty dálizine enedi. Munda jeti kólik aıryǵy bar. Bul – birinshi sanattaǵy jol", – dep bitken iske joǵary baǵa berdi ol.

Mamandardyń esebine súıensek, oblys ortalyǵymen kúnine 22 myńnan astam avtokólik ótedi eken. Al jańadan salynǵan bul jol bolsa, Qaraǵandyny aınalyp ótip, qalany tranzıttik avtomobılder men aýyr júk kólikterinen bosatýǵa múmkindik beredi.

j-02

Soltústik-Shyǵys aınalma joly tórt jolaqty etip salynǵan, asfaltbetondy jabyny bar. Jol jabynynyń birinshi jóndeýge deıingi qyzmet merzimi 15 jylǵa teń. Qozǵalys qaýipsizdigin qamtamasyz etý úshin jolaqtar arasynda ırek bileý ornatylǵan. Joldyń eseptik jyldamdyǵy saǵatyna 120 shaqyrym bolady.

Aınalma joldardy qaıta qurý aıasynda jeti jol aıryǵy, toǵyz jol ótpesi, Soqyr ózeni arqyly ótetin kópir jáne demalys úshin eki alań salynǵan. Joba Qaraǵandy, Nur-Sultan, Pavlodar jáne Shyǵys Qazaqstan oblystary baǵyttary boıynsha kólik aıryqtaryn qarastyrady.

Qaraǵandy oblysynyń ákimi Jeńis Qasymbek Soltústik-Shyǵys aınalma jolynyń qurylysyna úsh myńnan astam jol jumysshylary men 500 birlik tehnıka jumyldyrylǵanyn málim etti.

"Qurylysshylardyń 80 paıyzy oblys turǵyndary boldy. Soltústik jáne Shyǵys aınalma joldardyń óńir úshin strategııalyq mańyzy zor, sebebi jobalardy iske asyrý qala kóshelerine túsetin júktemeni aıtarlyqtaı tómendetedi, joldardyń tozýyn azaıtýǵa, apattylyqtyń tómendeýine jáne ekologııalyq jaǵdaıdyń jaqsarýyna alyp keledi. Sondaı-aq, oblys ortalyǵy men Qazaqstannyń ońtústik óńirlerin kólik baılanysymen qamtamasyz etedi", – dep atap ótti ol.

j-03

Jalpy, Qaraǵandy oblysynda jol qurylysy jobalary boıynsha aýqymdy jumystar qolǵa alynǵan. Mysaly, óńirde Jambyl men Almaty jaqqa qaraı baǵyt alǵan Balqash, Býrylbaıtal joldarynyń qurylysy iske asyrylyp jatyr, sondaı-aq, Jezqazǵan - Qyzylorda jolyn jobalaýdy aıaqtaý josparda bar. Budan bólek, bıyl Qyzylorda - Jezqazǵan jáne Jezqazǵan - Qaraǵandy joldaryn jobalaý bastalady. Qaraǵandydan Pavlodar baǵytyndaǵy jol men Qarqaraly baǵytyndaǵy joldy qaıta jańartý josparda bar.

Jalpy uzyndyǵy 48,4 shaqyrym bolatyn Soltústik-Shyǵys aınalma jolynyń qurylysy «Nurly jol» memlekettik ınfraqurylymdyq damý baǵdarlamasy boıynsha «Ortalyq-Ońtústik» dálizin qaıta jańartý josparyna engenin aıta ketken lázim.

Qaraǵandy oblysy

 

Sońǵy jańalyqtar

Ury alysqa uzamady

Aımaqtar • Keshe

Uqsas jańalyqtar