Talapkerge erkindik berildi
Eń aldymen sandardy sóıletsek, osyǵan deıingi jyldarda UBT-ǵa ótinish bergenderdiń sany bıyl rekordtyq kórsetkishke jetti. 131 754 talapker testileýge ótinim bergen. Bir ereksheligi osy jyly talapkerler UBT-ǵa ótinishti onlaın tártibinde de tapsyra aldy. Jalpy jas býynnyń jańashyldyqqa jáne jańa tehnologııaǵa beıim keletini bar ǵoı. Sonyń bir dáleli bolar, 90 myńnan asa talapker ótinishti onlaın túrde toltyrǵan. Bul bir jaǵynan vırýsty taratpaýdyń aldyn alsa, ekinshi jaǵynan zamanaýı jetistikter arqyly jyl saıynǵy sabylysty biraz jeńildetti. Al eń mańyzdysy túlekterge tańdaý erkindigi berildi. Buryn mektepti nashar baǵaǵa bitirgenderdi mektep basshylary nemese pedagogter UBT tapsyrmaýǵa úgitteıtin.
Bıylǵy UBT-nyń taǵy bir aıtýǵa turarlyq jańalyǵy – memlekettik bilim berý grantynyń budan bylaı tilge emes, bilim berý baǵdarlamasyna bólinetininde. Bul máseleniń mańyzdylyǵy sol, kóbine orys tilinde test tapsyrýshylar nebári 50 balmen grantqa tússe, dál sol mamandyqqa qazaq tilinde tapsyrǵan talapkerler 70 balmen grantqa ıe bola almaı jatatyn. Osydan kelip qazaq mektebin támamdaǵan túlekter grant alý úshin múmkindigi mol orys tobyn amalsyz tańdaıtyn edi. Al bıyl talapkerler oqý tilin grantqa táýeldilik tanytpaı tańdaı alady.
119 talapker densaýlyǵyna baılanysty UBT tapsyrmady
Bilim jáne ǵylym mınıstrliginiń aqparatyna súıensek, respýblıka boıynsha 161 pýnktte júrgizilgen UBT-nyń ádil ótkizilý barysyn qadaǵalaý maqsatynda qalalar men óńirlerge mınıstrlik tarapynan 1 983 ókil jiberilgen. Budan bólek UBT-nyń uıymdastyrylý barysyn quramyna Sybaılas jemqorlyqqa qarsy agenttik, úkimettik emes uıym, BAQ, «Adaldyq alańy» jobalyq keńseleriniń ókilderi men qoǵam belsendileri kirgen, 510 adam múshe Arnaıy monıtorıngtik top ruqsat baqylady.
Bıylǵy UBT-ǵa tirkelgen azamattardyń 92,1%-y testileýge qatysqan, 2019 jyly bul kórsetkish 94%-dy quraǵan bolatyn. Osy jyly byltyrǵymen salystyrǵanda tirkelgen testilenýshilerdiń az bolýyn pandemııanyń órship turýymen baılanystyrýǵa bolatyn sekildi. Sebebi mınıstrliktiń málimetinshe, 119 talapker densaýlyǵyna baılanysty UBT tapsyrmapty. Al osy talapkerler úshin 19 shildege deıin testileý uıymdastyrylmaq.
Ortasha kórsetkish ózgermedi
Osy jyly UBT tapsyrǵandardyń ishinde 82 154 talapker testileý tártibinde belgilengen shekti baldy jınaı aldy. Demek byltyrǵy kórsetkish kóp ózgergen joq. Aıtalyq, 2019 jyly 65,5 ball ortasha kórsetkish bolyp sanalsa, 2020 jylǵy UBT-da bul 64,06 baldy qurady.
Bıylǵy UBT-nyń burynǵydan kelesi bir ózgesheligi – testileý uıymdastyrýda alǵash ret elektrondy úkimet bazasy arqyly Face ID júıesiniń paıdalanylǵanynda. UBT-ǵa kirgizý talaptarynan talapkerlerdiń habardar bolǵany áser etti me, bıyl óziniń ornyna testileýge basqa adamdy kirgizý áreketiniń sany aıtarlyqtaı azaıdy. Máselen, ótken jyly mundaı 34 jaǵdaı oryn alsa, bıyl 7 mektep túlegi óz ornyna UBT-ǵa basqa adamdy jibermek bolǵan. Iаǵnı dál osyndaı zańsyz áreket bir jyl ishinde 27-ge tómendedi.
Kalkýlıator qoldanýǵa
ruqsat etildi
Talapkerlerge kalkýlıatordy paıdalanýǵa ruqsat berýin osy jylǵy UBT-da alǵash ret qarastyrylǵan múmkindiktiń birine jatqyzýǵa bolady. Álbette talapkerler testileýge ózderi qalaǵan esepteýish quraldy ákele almady, olarǵa kireberiste qarapaıym kalkýlıator berildi. Budan bólek bıyl birinshi ret túlekter qorytyndy mektep emtıhandarynan bosatyldy. Bul – eldegi tótenshe jaǵdaı kezinde qashyqtan oqý formatyna kóshýge májbúr bolǵandyqtan qabyldanǵan sheshim.
UBT tarıhynda alǵash ret talapkerlerdiń ata-analary testileý ótkizý pýnktterine, tipti mańaıyna jolaı almady. Buǵan da pandemııa sebep boldy. Degenmen ata-analar úıde otyryp UBT-ny baqylaýǵa múmkindik aldy. UBT júrgizilgen ár aýdıtorııa arnaıy beınebaqylaý kameralarymen jabdyqtalǵan bolatyn, nátıjesinde 9,5 mln-nan asa adam UBT-nyń ótkizilý barysyn onlaın rejimde baqylady. Bul ekinshi jaǵynan talapkerlerdiń tártibin qadaǵalaýǵa jáne testileýden keıin de olardyń ár áreketine arnaıy komıssııanyń saraptama jasaýyna qajet. О́ıtkeni UBT erejesine engizilgen jańa ózgeriske sáıkes endi 2020 jylǵy 25 tamyzǵa deıin beınejazbalar jiti tekseriledi. Eger beınejazbada grant ıelengen talapkerdiń tyıym salynǵan zattardy paıdalanǵany anyqtalsa, testilenýshiniń UBT nátıjesi joıylady.
Qosa ketý kerek, memlekettik bilim berý grantyna úmitker bolý úshin ótkizilgen maýsymdaǵy UBT-da shekti ball jınaı almaǵandar úshin tamyz aıynda taǵy da testileý uıymdastyrylady. Ondaǵy nátıjemen testilenýshiler elimizdegi joǵary oqý oryndarynyń aqyly oqý bólimine túse alady. Negizi ýnıversıtetterdiń aqyly bólimine qabyldaný úshin talapkerlerdiń shekti ball jınaǵanyn aıǵaqtaıtyn qańtar aıyndaǵy UBT sertıfıkattary da jaraıdy.
