Patrıottyq uıymynyń búgingi tynys-tirshiligi jóninde az-kem toqtalyp ótseńiz.
– Elimizdiń ár aımaǵynan osy uıymnyń fılıaldary qurylyp, belgilengen baǵyt boıynsha jumys istep keledi. Intellektýaldy saıystar, dala jıyndary, jeńil atletıka marafony, túrli aksııalar jáne basqa da tárbıelik máni bar sharalardy uıymdastyrýǵa kúsh salyp jatyrmyz. «Jas sarbaz» tárbıelenýshileri tek fızıkalyq daıyndyqpen shektelmeı, ónerdi de qatar alyp júrýi tıis. Sol sebepti shyǵarmashylyq saıystary da jıi ótkizilip turady. Joǵaryda atap ótkendeı, búginde elordada jalpy orta bilim beretin memlekettik mekemelerde 61 «Jas sarbaz» synyby, 82 áskerı-patrıottyq klýb jáne Memleket basshysy Qasym-Jomart Toqaevtyń usynysymen 27 «Smart sarbaz» synyby ashyldy. Búginde olardyń jalpy sany 170-ten asty.
– Áleýmettik jelilerden baıqaǵanymyzdaı, sizder de eriktilik qyzmetine den qoıyp, qoǵamdyq ómirge belsendi túrde aralasyp jatyr ekensizder. Qozǵalystyń osy baǵyttaǵy jumysy jóninde ne aıtasyz?
– Karantın ýaqytynda «Jas sarbaz» qozǵalysynyń tárbıelenýshileri volonterlermen birige otyryp, óz qalalaryndaǵy kómekke zárý otbasylarǵa azyq-túlik, medısınalyq jabdyqtar jetkizip berý isine belsene atsalysty. Osy oraıda áleýmettik jeliniń kómegi kóp tıdi. Instagram jelisinde jastardy karantın jáne demalys ýaqytyn tıimdi paıdalanyp, sportpen aınalysýǵa shaqyratyn beınerolık tarattyq. Budan basqa hakim Abaıdyń 175 jyldyǵyna oraı uly aqynnyń «Qara sózderin» oqýdy dáriptep júrmiz. Sondaı-aq ZOOM platformasynda Otan qorǵaýshylar kúnine oraı birqatar qoǵam qaıratkerimen onlaın kezdesý uıymdastyrdyq.
– Ulttyq biryńǵaı testileý de óz máresine jetti. Sizder bul tarapta qandaı kómek kórsettińizder?
– Memleket basshysy 2020 jyldy «Volonter jyly» dep jarııalaǵany barlyǵymyzǵa málim. Osyǵan oraı Nur-Sultan qalasy «Jas sarbaz» fılıaly janynan eriktiler shtaby qurylyp, barlyq qoǵamdyq sharalarǵa belsene atsalysýdamyz. Karantın jáne ulttyq biryńǵaı testileý ýaqytynda volonterlerdiń eńbegi eselene tústi. Jassarbazdyqtardyń da densaýlyǵyna qatty mán berilip, olar medısınalyq qolǵap jáne tıisti kólemde betperdelermen qamtamasyz etildi.
Jassarbazdyqtar Instagram jelisinde mektep bitirýshi túlekterge arnalǵan onlaın kezdesý uıymdastyrdy. UBT-ǵa qajetti málimetter jınaqtalyp, ata-analarǵa da paıdaly keńester berildi. Budan ózge 22 maýsymnan bastap, «Astana jastary» volonterlik shtabymen birlesip, 10 erikti L.N.Gýmılev atyndaǵy Eýrazııa ulttyq ýnıversıtetindegi test tapsyrý ornyna baryp, qyzmetkerlerge karantın talabyn saqtaý boıynsha kómek kórsetti. Máselen, talapkerlerge vırýstan saqtanýǵa qatysty túsindirme jumystaryn júrgizip, betperdeler, qajet quraldardy tarattyq.
Áńgimelesken
Aıym DÁÝT,
«Egemen Qazaqstan»
