Aımaqtar • 08 Shilde, 2020

Sybaılas jemqorlyqqa qarsy qyzmet dári-dármek baǵasyn baqylaýda

22 ret kórsetildi

"ANTIKOR ORTALYGY" alańynda "ANTIKOR LIVE" jobasy aıasynda Sybaılas jemqorlyqqa qarsy is-qımyl Agenttiginiń Shymkent qalasy boıynsha departamenti basshysynyń birinshi orynbasary Talǵar Serikbaev pen  densaýlyq saqtaý basqarmasynyń Dári-dármekpen qamtamasyz etý jáne lısenzııalaý bóliminiń basshysy Gaýhar Álibekova dári-dármek tapshylyǵy men onyń aldyn alý maqsatynda atqarylǵan jumystarǵa tikeleı efır barysynda jaýap berdi, dep habarlaıdy Egemen.kz.

Departament basshysynyń birinshi orynbasary Talǵar Serikbaev efır qonaǵymen, Sybaılas jemqorlyqqa qarsy qyzmetimen josparlanǵan jumystarmen tanystyrdy.

Onyń aıtýynsha dárihanalardaǵy dári-dármekterdiń  jetispeýshiligi men baǵasynyń qymbattaýynyń aldyn alý men turǵyndar arasynda túsindirý jumystaryn júrgizý maqsatynda qalada arnaıy Jumysshy Top qurylǵan.

"Top quramyna Shymkent qalasy boıynsha Sybaılas jemqorlyqqa qarsy qyzmetiniń qyzmetkerlerimen qatar densaýlyq saqtaý basqarmasy men Densaýlyq saqtaý mınıstrligi taýarlar men kórsetiletin qyzmetterdiń sapasyn baqylaý departamentiniń, "Shymkent-adaldyq alańy" jobalyq keńsesi men Arnaıy monıtorıngtik toptyń jáne jastar máslıhaty ókilderi men qoǵam belsendileri engiziligen.

Maqsaty – dári-dármek tapshylyǵy máseleleri men turǵyndar arasynda túsindirý jumystaryn júrgizý bolyp tabylady. Búginnen bastap monıtorıng jumystary bastaý aldy. Oryn alǵan jaǵdaılar boıynsha taldaý júrgizý maqsatynda tıisti suraýlar ýákiletti organdarǵa joldandy" - dedi ol.

Sonymen qatar, spıker aptasyna 3 ret osy Toptyń atqarǵan jumysymen tanystyryp otyratyndyǵyn jetkizdi.

"Qaladaǵy jekemenshik dárihanalarda dári-dármek jetispeýshiligi baıqalýda. Bul máseleler Densaýlyq saqtaý mınıstrligi taýarlar men kórsetiletin qyzmetterdiń sapasyn baqylaý Shymkent qalasy boıynsha departamentimen baqylanady. Qazirgi tańda medısınalyq mekemelermen kúndizgi stasıonarlar jumysyn kúsheıtkendikten dári-dármek máselesi birinshi orynda" - dedi Gaýhar Álibekova.

Bólim basshysynyń aıtýynsha stasıonarlyq kómek sheńberinde qalanyń medısınalyq uıymdary 6 288,29 mln.teńge somasyna dárilik zattar men medısınalyq buıymdardyń 784 ataýy boıynsha qajettilikti málimdegen.Biryńǵaı dıstrıbıýtor 5 926,82 mln.teńge somasyna dárilik zattar men medısınalyq buıymdardy 756 pozısııa boıynsha satyp alýdy júzege asyrǵan.

Aıta keteıik, kez-kelgen qala turǵyny dárini qymbatqa qaı dárihanadan, qandaı baǵaǵa alǵany týraly foto jáne vıdeo túrindegi aqparatty 8702 000 24 94 jáne 8775 306 78 50  WhatsApp nómirlerine joldaı alady.  Jáne kelip túsken aqparattar, vıdeolar jarııalanbaı, qyzmettik maqsatta paıdalanylady.

 

Sońǵy jańalyqtar

Uqsas jańalyqtar